অধ্যায় 20

20.1

সূত উবাচ
তং সমুদ্রমতিক্রম্য কদ্রূর্বিনতয়া সহ
ন্যপতত্তুরগাভ্যাশে নচিরাদিব শীঘ্রগা

নিশাম্য চ বহূন্বালান্কৃষ্ণান্পুচ্ছং সমাশ্রিতান্
বিনতাং বিষণ্ণবদনাং কদ্রূর্দাস্যে ন্যয়োজয়ৎ

ততঃ সা বিনতা তস্মিন্পণিতেন পরাজিতা
অভবদ্দুঃখসংতপ্তা দাসীভাবং সমাস্থিতা

এতস্মিন্নন্তরে চৈব গরুডঃ কাল আগতে
বিনা মাত্রা মহাতেজা বিদার্যাণ্ডমজায়ত

অগ্নিরাশিরিবোদ্ভাসন্সমিদ্ধোঽতিভয়ংকরঃ
প্রবৃদ্ধঃ সহসা পক্ষী মহাকায়ো নভোগতঃ

তং দৃষ্ট্বা শরণং জগ্মুঃ প্রজাঃ সর্বা বিভাবসুম্
প্রণিপত্যাব্রুবংশ্চৈনমাসীনং বিশ্বরূপিণম্

অগ্নে মা ত্বং প্রবর্ধিষ্ঠাঃ কচ্চিন্নো ন দিধক্ষসি
অসৌ হি রাশিঃ সুমহান্সমিদ্ধস্তব সর্পতি

অগ্নিরুবাচ
নৈতদেবং যথা যূয়ং মন্যধ্বমসুরার্দনাঃ
গরুডো বলবানেষ মম তুল্যঃ স্বতেজসা

সূত উবাচ
এবমুক্তাস্ততো গত্বা গরুডং বাগ্ভিরস্তুবন্
অদূরাদভ্যুপেত্যৈনং দেবাঃ সর্ষিগণাস্তদা

ত্বমৃষিস্ত্বং মহাভাগস্ত্বং দেবঃ পতগেশ্বরঃ
ত্বং প্রভুস্তপনপ্রখ্যস্ত্বং নস্ত্রাণমনুত্তমম্

বলোর্মিমান্সাধুরদীনসত্ত্বঃ; সমৃদ্ধিমান্দুষ্প্রসহস্ত্বমেব
তপঃ শ্রুতং সর্বমহীনকীর্তে; অনাগতং চোপগতং চ সর্বম্

ত্বমুত্তমঃ সর্বমিদং চরাচরং; গভস্তিভির্ভানুরিবাবভাসসে
সমাক্ষিপন্ভানুমতঃ প্রভাং মুহু;স্ত্বমন্তকঃ সর্বমিদং ধ্রুবাধ্রুবম্

দিবাকরঃ পরিকুপিতো যথা দহে;ত্প্রজাস্তথা দহসি হুতাশনপ্রভ
ভয়ংকরঃ প্রলয় ইবাগ্নিরুত্থিতো; বিনাশয়ন্যুগপরিবর্তনান্তকৃৎ

খগেশ্বরং শরণমুপস্থিতা বয়ং; মহৌজসং বিতিমিরমভ্রগোচরম্
মহাবলং গরুডমুপেত্য খেচরং; পরাবরং বরদমজয্যবিক্রমম্

এবং স্তুতঃ সুপর্ণস্তু দেবৈঃ সর্ষিগণৈস্তদা
তেজসঃ প্রতিসংহারমাত্মনঃ স চকার হ