অধ্যায় 19

19.1

সূত উবাচ
ততো রজন্যাং ব্যুষ্টায়াং প্রভাত উদিতে রবৌ
কদ্রূশ্চ বিনতা চৈব ভগিন্যৌ তে তপোধন

অমর্ষিতে সুসংরব্ধে দাস্যে কৃতপণে তদা
জগ্মতুস্তুরগং দ্রষ্টুমুচ্চৈঃশ্রবসমন্তিকাৎ

দদৃশাতে তদা তত্র সমুদ্রং নিধিমম্ভসাম্
তিমিংগিলঝষাকীর্ণং মকরৈরাবৃতং তথা

সত্ত্বৈশ্চ বহুসাহস্রৈর্নানারূপৈঃ সমাবৃতম্
উগ্রৈর্নিত্যমনাধৃষ্যং কূর্মগ্রাহসমাকুলম্

আকরং সর্বরত্নানামালয়ং বরুণস্য চ
নাগানামালয়ং রম্যমুত্তমং সরিতাং পতিম্

পাতালজ্বলনাবাসমসুরাণাং চ বন্ধনম্
ভয়ংকরং চ সত্ত্বানাং পয়সাং নিধিমর্ণবম্

শুভং দিব্যমমর্ত্যানামমৃতস্যাকরং পরম্
অপ্রমেয়মচিন্ত্যং চ সুপুণ্যজলমদ্ভুতম্

ঘোরং জলচরারাবরৌদ্রং ভৈরবনিস্বনম্
গম্ভীরাবর্তকলিলং সর্বভূতভয়ংকরম্

বেলাদোলানিলচলং ক্ষোভোদ্বেগসমুত্থিতম্
বীচীহস্তৈঃ প্রচলিতৈর্নৃত্যন্তমিব সর্বশঃ

চন্দ্রবৃদ্ধিক্ষয়বশাদুদ্বৃত্তোর্মিদুরাসদম্
পাঞ্চজন্যস্য জননং রত্নাকরমনুত্তমম্

গাং বিন্দতা ভগবতা গোবিন্দেনামিতৌজসা
বরাহরূপিণা চান্তর্বিক্ষোভিতজলাবিলম্

ব্রহ্মর্ষিণা চ তপতা বর্ষাণাং শতমত্রিণা
অনাসাদিতগাধং চ পাতালতলমব্যয়ম্

অধ্যাত্ময়োগনিদ্রাং চ পদ্মনাভস্য সেবতঃ
যুগাদিকালশয়নং বিষ্ণোরমিততেজসঃ

বডবামুখদীপ্তাগ্নেস্তোয়হব্যপ্রদং শুভম্
অগাধপারং বিস্তীর্ণমপ্রমেয়ং সরিত্পতিম্

মহানদীভির্বহ্বীভিঃ স্পর্ধয়েব সহস্রশঃ
অভিসার্যমাণমনিশং দদৃশাতে মহার্ণবম্

গম্ভীরং তিমিমকরোগ্রসংকুলং তং; গর্জন্তং জলচররাবরৌদ্রনাদৈঃ
বিস্তীর্ণং দদৃশতুরম্বরপ্রকাশং; তেঽগাধং নিধিমুরুমম্ভসামনন্তম্

ইত্যেবং ঝষমকরোর্মিসংকুলং তং; গম্ভীরং বিকসিতমম্বরপ্রকাশম্
পাতালজ্বলনশিখাবিদীপিতং তং; পশ্যন্ত্যৌ দ্রুতমভিপেততুস্তদানীম্