অধ্যায় 18

18.1

সূত উবাচ
এতত্তে সর্বমাখ্যাতমমৃতং মথিতং যথা
যত্র সোঽশ্বঃ সমুত্পন্নঃ শ্রীমানতুলবিক্রমঃ

যং নিশাম্য তদা কদ্রূর্বিনতামিদমব্রবীৎ
উচ্চৈঃশ্রবা নু কিংবর্ণো ভদ্রে জানীহি মাচিরম্

বিনতোবাচ
শ্বেত এবাশ্বরাজোঽয়ং কিং বা ত্বং মন্যসে শুভে
ব্রূহি বর্ণং ত্বমপ্যস্য ততোঽত্র বিপণাবহে

কদ্রূরুবাচ
কৃষ্ণবালমহং মন্যে হয়মেনং শুচিস্মিতে
এহি সার্ধং ময়া দীব্য দাসীভাবায় ভামিনি

সূত উবাচ
এবং তে সময়ং কৃত্বা দাসীভাবায় বৈ মিথঃ
জগ্মতুঃ স্বগৃহানেব শ্বো দ্রক্ষ্যাব ইতি স্ম হ

ততঃ পুত্রসহস্রং তু কদ্রূর্জিহ্মং চিকীর্ষতী
আজ্ঞাপয়ামাস তদা বালা ভূত্বাঞ্জনপ্রভাঃ

আবিশধ্বং হয়ং ক্ষিপ্রং দাসী ন স্যামহং যথা
তদ্বাক্যং নান্বপদ্যন্ত তাঞ্শশাপ ভুজংগমান্

সর্পসত্রে বর্তমানে পাবকো বঃ প্রধক্ষ্যতি
জনমেজয়স্য রাজর্ষেঃ পাণ্ডবেয়স্য ধীমতঃ

শাপমেনং তু শুশ্রাব স্বয়মেব পিতামহঃ
অতিক্রূরং সমুদ্দিষ্টং কদ্র্বা দৈবাদতীব হি

সার্ধং দেবগণৈঃ সর্বৈর্বাচং তামন্বমোদত
বহুত্বং প্রেক্ষ্য সর্পাণাং প্রজানাং হিতকাম্যয়া

তিগ্মবীর্যবিষা হ্যেতে দন্দশূকা মহাবলাঃ
তেষাং তীক্ষ্ণবিষত্বাদ্ধি প্রজানাং চ হিতায় বৈ
প্রাদাদ্বিষহণীং বিদ্যাং কাশ্যপায় মহাত্মনে