UtshovChapter 18
18.1
सूत उवाच
एतत्ते सर्वमाख्यातममृतं मथितं यथा
यत्र सोऽश्वः समुत्पन्नः श्रीमानतुलविक्रमः
Suta uvacha
Etatte sarvamakhyatamamritam mathitam yatha
Yatra soshvah samutpannah shrimanatulavikramah
18.2
यं निशाम्य तदा कद्रूर्विनतामिदमब्रवीत्
उच्चैःश्रवा नु किंवर्णो भद्रे जानीहि माचिरम्
Yam nishamya tada kadrurvinatamidamabravit
Uchchaihshrava nu kinvarno bhadre janihi machiram
18.3
विनतोवाच
श्वेत एवाश्वराजोऽयं किं वा त्वं मन्यसे शुभे
ब्रूहि वर्णं त्वमप्यस्य ततोऽत्र विपणावहे
Vinatovacha
Shveta evashvarajoyam kim va tvam manyase shubhe
Bruhi varnam tvamapyasya tatotra vipanavahe
18.4
कद्रूरुवाच
कृष्णवालमहं मन्ये हयमेनं शुचिस्मिते
एहि सार्धं मया दीव्य दासीभावाय भामिनि
Kadruruvacha
Krishnavalamaham manye hayamenam shuchismite
Ehi sardham maya divya dasibhavaya bhamini
18.5
सूत उवाच
एवं ते समयं कृत्वा दासीभावाय वै मिथः
जग्मतुः स्वगृहानेव श्वो द्रक्ष्याव इति स्म ह
Suta uvacha
Evam te samayam kritva dasibhavaya vai mithah
Jagmatuh svagrihaneva shvo drakshyava iti sma ha
18.6
ततः पुत्रसहस्रं तु कद्रूर्जिह्मं चिकीर्षती
आज्ञापयामास तदा वाला भूत्वाञ्जनप्रभाः
Tatah putrasahasram tu kadrurjihmam chikirshati
Agyapayamasa tada vala bhutvanjanaprabhah
18.7
आविशध्वं हयं क्षिप्रं दासी न स्यामहं यथा
तद्वाक्यं नान्वपद्यन्त ताञ्शशाप भुजंगमान्
Avishadhvam hayam kshipram dasi na syamaham yatha
Tadvakyam nanvapadyanta tanshashapa bhujangaman
18.8
सर्पसत्रे वर्तमाने पावको वः प्रधक्ष्यति
जनमेजयस्य राजर्षेः पाण्डवेयस्य धीमतः
Sarpasatre vartamane pavako vah pradhakshyati
Janamejayasya rajarsheh pandaveyasya dhimatah
18.9
शापमेनं तु शुश्राव स्वयमेव पितामहः
अतिक्रूरं समुद्दिष्टं कद्र्वा दैवादतीव हि
Shapamenam tu shushrava svayameva pitamahah
Atikruram samuddishtam kadrva daivadativa hi
18.10
सार्धं देवगणैः सर्वैर्वाचं तामन्वमोदत
बहुत्वं प्रेक्ष्य सर्पाणां प्रजानां हितकाम्यया
Sardham devaganaih sarvairvacham tamanvamodata
Bahutvam prekshya sarpanam prajanam hitakamyaya
18.11
तिग्मवीर्यविषा ह्येते दन्दशूका महाबलाः
तेषां तीक्ष्णविषत्वाद्धि प्रजानां च हिताय वै
प्रादाद्विषहणीं विद्यां काश्यपाय महात्मने
Tigmaviryavisha hyete dandashuka mahabalah
Tesham tikshnavishatvaddhi prajanam cha hitaya vai
Pradadvishahanim vidyam kashyapaya mahatmane