Utshovঅধ্যায় 17
17.1
সূত উবাচ
অথাবরণমুখ্যানি নানাপ্রহরণানি চ
প্রগৃহ্যাভ্যদ্রবন্দেবান্সহিতা দৈত্যদানবাঃ
17.2
ততস্তদমৃতং দেবো বিষ্ণুরাদায় বীর্যবান্
জহার দানবেন্দ্রেভ্যো নরেণ সহিতঃ প্রভুঃ
17.3
ততো দেবগণাঃ সর্বে পপুস্তদমৃতং তদা
বিষ্ণোঃ সকাশাত্সংপ্রাপ্য সংভ্রমে তুমুলে সতি
17.4
ততঃ পিবত্সু তত্কালং দেবেষ্বমৃতমীপ্সিতম্
রাহুর্বিবুধরূপেণ দানবঃ প্রাপিবত্তদা
17.5
তস্য কণ্ঠমনুপ্রাপ্তে দানবস্যামৃতে তদা
আখ্যাতং চন্দ্রসূর্যাভ্যাং সুরাণাং হিতকাম্যয়া
17.6
ততো ভগবতা তস্য শিরশ্ছিন্নমলংকৃতম্
চক্রায়ুধেন চক্রেণ পিবতোঽমৃতমোজসা
17.7
তচ্ছৈলশৃঙ্গপ্রতিমং দানবস্য শিরো মহৎ
চক্রেণোত্কৃত্তমপতচ্চালয়দ্বসুধাতলম্
17.8
ততো বৈরবিনির্বন্ধঃ কৃতো রাহুমুখেন বৈ
শাশ্বতশ্চন্দ্রসূর্যাভ্যাং গ্রসত্যদ্যাপি চৈব তৌ
17.9
বিহায় ভগবাংশ্চাপি স্ত্রীরূপমতুলং হরিঃ
নানাপ্রহরণৈর্ভীমৈর্দানবান্সমকম্পয়ৎ
17.10
ততঃ প্রবৃত্তঃ সংগ্রামঃ সমীপে লবণাম্ভসঃ
সুরাণামসুরাণাং চ সর্বঘোরতরো মহান্
17.11
প্রাসাঃ সুবিপুলাস্তীক্ষ্ণা ন্যপতন্ত সহস্রশঃ
তোমরাশ্চ সুতীক্ষ্ণাগ্রাঃ শস্ত্রাণি বিবিধানি চ
17.12
ততোঽসুরাশ্চক্রভিন্না বমন্তো রুধিরং বহু
অসিশক্তিগদারুগ্ণা নিপেতুর্ধরণীতলে
17.13
ছিন্নানি পট্টিশৈশ্চাপি শিরাংসি যুধি দারুণে
তপ্তকাঞ্চনজালানি নিপেতুরনিশং তদা
17.14
রুধিরেণাবলিপ্তাঙ্গা নিহতাশ্চ মহাসুরাঃ
অদ্রীণামিব কূটানি ধাতুরক্তানি শেরতে
17.15
হাহাকারঃ সমভবত্তত্র তত্র সহস্রশঃ
অন্যোন্যং ছিন্দতাং শস্ত্রৈরাদিত্যে লোহিতায়তি
17.16
পরিঘৈশ্চায়সৈঃ পীতৈঃ সংনিকর্ষে চ মুষ্টিভিঃ
নিঘ্নতাং সমরেঽন্যোন্যং শব্দো দিবমিবাস্পৃশৎ
17.17
ছিন্ধি ভিন্ধি প্রধাবধ্বং পাতয়াভিসরেতি চ
ব্যশ্রূয়ন্ত মহাঘোরাঃ শব্দাস্তত্র সমন্ততঃ
17.18
এবং সুতুমুলে যুদ্ধে বর্তমানে ভয়াবহে
নরনারায়ণৌ দেবৌ সমাজগ্মতুরাহবম্
17.19
তত্র দিব্যং ধনুর্দৃষ্ট্বা নরস্য ভগবানপি
চিন্তয়ামাস বৈ চক্রং বিষ্ণুর্দানবসূদনম্
17.20
ততোঽম্বরাচ্চিন্তিতমাত্রমাগতং; মহাপ্রভং চক্রমমিত্রতাপনম্
বিভাবসোস্তুল্যমকুণ্ঠমণ্ডলং; সুদর্শনং ভীমমজয্যমুত্তমম্
17.21
তদাগতং জ্বলিতহুতাশনপ্রভং; ভয়ংকরং করিকরবাহুরচ্যুতঃ
মুমোচ বৈ চপলমুদগ্রবেগব;ন্মহাপ্রভং পরনগরাবদারণম্
17.22
তদন্তকজ্বলনসমানবর্চসং; পুনঃ পুনর্ন্যপতত বেগবত্তদা
বিদারয়দ্দিতিদনুজান্সহস্রশঃ; করেরিতং পুরুষবরেণ সংয়ুগে
17.23
দহত্ক্বচিজ্জ্বলন ইবাবলেলিহ;ত্প্রসহ্য তানসুরগণান্ন্যকৃন্তত
প্রবেরিতং বিয়তি মুহুঃ ক্ষিতৌ তদা; পপৌ রণে রুধিরমথো পিশাচবৎ
17.24
অথাসুরা গিরিভিরদীনচেতসো; মুহুর্মুহুঃ সুরগণমর্দয়ংস্তদা
মহাবলা বিগলিতমেঘবর্চসঃ; সহস্রশো গগনমভিপ্রপদ্য হ
17.25
অথাম্বরাদ্ভয়জননাঃ প্রপেদিরে; সপাদপা বহুবিধমেঘরূপিণঃ
মহাদ্রয়ঃ প্রবিগলিতাগ্রসানবঃ; পরস্পরং দ্রুতমভিহত্য সস্বনাঃ
17.26
ততো মহী প্রবিচলিতা সকাননা; মহাদ্রিপাতাভিহতা সমন্ততঃ
পরস্পরং ভৃশমভিগর্জতাং মুহূ; রণাজিরে ভৃশমভিসংপ্রবর্তিতে
17.27
নরস্ততো বরকনকাগ্রভূষণৈ;র্মহেষুভির্গগনপথং সমাবৃণোৎ
বিদারয়ন্গিরিশিখরাণি পত্রিভি;র্মহাভয়েঽসুরগণবিগ্রহে তদা
17.28
ততো মহীং লবণজলং চ সাগরং; মহাসুরাঃ প্রবিবিশুরর্দিতাঃ সুরৈঃ
বিয়দ্গতং জ্বলিতহুতাশনপ্রভং; সুদর্শনং পরিকুপিতং নিশাম্য চ
17.29
ততঃ সুরৈর্বিজয়মবাপ্য মন্দরঃ; স্বমেব দেশং গমিতঃ সুপূজিতঃ
বিনাদ্য খং দিবমপি চৈব সর্বশ;স্ততো গতাঃ সলিলধরা যথাগতম্
17.30
ততোঽমৃতং সুনিহিতমেব চক্রিরে; সুরাঃ পরাং মুদমভিগম্য পুষ্কলাম্
দদৌ চ তং নিধিমমৃতস্য রক্ষিতুং; কিরীটিনে বলভিদথামরৈঃ সহ