Utshovঅধ্যায় 16
16.1
সূত উবাচ
ততোঽভ্রশিখরাকারৈর্গিরিশৃঙ্গৈরলংকৃতম্
মন্দরং পর্বতবরং লতাজালসমাবৃতম্
16.2
নানাবিহগসংঘুষ্টং নানাদংষ্ট্রিসমাকুলম্
কিংনরৈরপ্সরোভিশ্চ দেবৈরপি চ সেবিতম্
16.3
একাদশ সহস্রাণি যোজনানাং সমুচ্ছ্রিতম্
অধো ভূমেঃ সহস্রেষু তাবত্স্বেব প্রতিষ্ঠিতম্
16.4
তমুদ্ধর্তুং ন শক্তা বৈ সর্বে দেবগণাস্তদা
বিষ্ণুমাসীনমভ্যেত্য ব্রহ্মাণং চেদমব্রুবন্
16.5
ভবন্তাবত্র কুরুতাং বুদ্ধিং নৈঃশ্রেয়সীং পরাম্
মন্দরোদ্ধরণে যত্নঃ ক্রিয়তাং চ হিতায় নঃ
16.6
তথেতি চাব্রবীদ্বিষ্ণুর্ব্রহ্মণা সহ ভার্গব
ততোঽনন্তঃ সমুত্থায় ব্রহ্মণা পরিচোদিতঃ
নারায়ণেন চাপ্যুক্তস্তস্মিন্কর্মণি বীর্যবান্
16.7
অথ পর্বতরাজানং তমনন্তো মহাবলঃ
উজ্জহার বলাদ্ব্রহ্মন্সবনং সবনৌকসম্
16.8
ততস্তেন সুরাঃ সার্ধং সমুদ্রমুপতস্থিরে
তমূচুরমৃতার্থায় নির্মথিষ্যামহে জলম্
16.9
অপাংপতিরথোবাচ মমাপ্যংশো ভবেত্ততঃ
সোঢাস্মি বিপুলং মর্দং মন্দরভ্রমণাদিতি
16.10
ঊচুশ্চ কূর্মরাজানমকূপারং সুরাসুরাঃ
গিরেরধিষ্ঠানমস্য ভবান্ভবিতুমর্হতি
16.11
কূর্মেণ তু তথেত্যুক্ত্বা পৃষ্ঠমস্য সমর্পিতম্
তস্য শৈলস্য চাগ্রং বৈ যন্ত্রেণেন্দ্রোঽভ্যপীডয়ৎ
16.12
মন্থানং মন্দরং কৃত্বা তথা নেত্রং চ বাসুকিম্
দেবা মথিতুমারব্ধাঃ সমুদ্রং নিধিমম্ভসাম্
অমৃতার্থিনস্ততো ব্রহ্মন্সহিতা দৈত্যদানবাঃ
16.13
একমন্তমুপাশ্লিষ্টা নাগরাজ্ঞো মহাসুরাঃ
বিবুধাঃ সহিতাঃ সর্বে যতঃ পুচ্ছং ততঃ স্থিতাঃ
16.14
অনন্তো ভগবান্দেবো যতো নারায়ণস্ততঃ
শির উদ্যম্য নাগস্য পুনঃ পুনরবাক্ষিপৎ
16.15
বাসুকেরথ নাগস্য সহসাক্ষিপ্যতঃ সুরৈঃ
সধূমাঃ সার্চিষো বাতা নিষ্পেতুরসকৃন্মুখাৎ
16.16
তে ধূমসংঘাঃ সংভূতা মেঘসংঘাঃ সবিদ্যুতঃ
অভ্যবর্ষন্সুরগণাঞ্শ্রমসংতাপকর্শিতান্
16.17
তস্মাচ্চ গিরিকূটাগ্রাত্প্রচ্যুতাঃ পুষ্পবৃষ্টয়ঃ
সুরাসুরগণান্মাল্যৈঃ সর্বতঃ সমবাকিরন্
16.18
বভূবাত্র মহাঘোষো মহামেঘরবোপমঃ
উদধের্মথ্যমানস্য মন্দরেণ সুরাসুরৈঃ
16.19
তত্র নানাজলচরা বিনিষ্পিষ্টা মহাদ্রিণা
বিলয়ং সমুপাজগ্মুঃ শতশো লবণাম্ভসি
16.20
বারুণানি চ ভূতানি বিবিধানি মহীধরঃ
পাতালতলবাসীনি বিলয়ং সমুপানয়ৎ
16.21
তস্মিংশ্চ ভ্রাম্যমাণেঽদ্রৌ সংঘৃষ্যন্তঃ পরস্পরম্
ন্যপতন্পতগোপেতাঃ পর্বতাগ্রান্মহাদ্রুমাঃ
16.22
তেষাং সংঘর্ষজশ্চাগ্নিরর্চির্ভিঃ প্রজ্বলন্মুহুঃ
বিদ্যুদ্ভিরিব নীলাভ্রমাবৃণোন্মন্দরং গিরিম্
16.23
দদাহ কুঞ্জরাংশ্চৈব সিংহাংশ্চৈব বিনিঃসৃতান্
বিগতাসূনি সর্বাণি সত্ত্বানি বিবিধানি চ
16.24
তমগ্নিমমরশ্রেষ্ঠঃ প্রদহন্তং ততস্ততঃ
বারিণা মেঘজেনেন্দ্রঃ শময়ামাস সর্বতঃ
16.25
ততো নানাবিধাস্তত্র সুস্রুবুঃ সাগরাম্ভসি
মহাদ্রুমাণাং নির্যাসা বহবশ্চৌষধীরসাঃ
16.26
তেষামমৃতবীর্যাণাং রসানাং পয়সৈব চ
অমরত্বং সুরা জগ্মুঃ কাঞ্চনস্য চ নিঃস্রবাৎ
16.27
অথ তস্য সমুদ্রস্য তজ্জাতমুদকং পয়ঃ
রসোত্তমৈর্বিমিশ্রং চ ততঃ ক্ষীরাদভূদ্ঘৃতম্
16.28
ততো ব্রহ্মাণমাসীনং দেবা বরদমব্রুবন্
শ্রান্তাঃ স্ম সুভৃশং ব্রহ্মন্নোদ্ভবত্যমৃতং চ তৎ
16.29
ঋতে নারায়ণং দেবং দৈত্যা নাগোত্তমাস্তথা
চিরারব্ধমিদং চাপি সাগরস্যাপি মন্থনম্
16.30
ততো নারায়ণং দেবং ব্রহ্মা বচনমব্রবীৎ
বিধত্স্বৈষাং বলং বিষ্ণো ভবানত্র পরায়ণম্
16.31
বিষ্ণুরুবাচ
বলং দদামি সর্বেষাং কর্মৈতদ্যে সমাস্থিতাঃ
ক্ষোভ্যতাং কলশঃ সর্বৈর্মন্দরঃ পরিবর্ত্যতাম্
16.32
সূত উবাচ
নারায়ণবচঃ শ্রুত্বা বলিনস্তে মহোদধেঃ
তত্পয়ঃ সহিতা ভূয়শ্চক্রিরে ভৃশমাকুলম্
16.33
ততঃ শতসহস্রাংশুঃ সমান ইব সাগরাৎ
প্রসন্নভাঃ সমুত্পন্নঃ সোমঃ শীতাংশুরুজ্জ্বলঃ
16.34
শ্রীরনন্তরমুত্পন্না ঘৃতাত্পাণ্ডুরবাসিনী
সুরা দেবী সমুত্পন্না তুরগঃ পাণ্ডুরস্তথা
16.35
কৌস্তুভশ্চ মণির্দিব্য উত্পন্নোঽমৃতসংভবঃ
মরীচিবিকচঃ শ্রীমান্নারায়ণউরোগতঃ
16.36
শ্রীঃ সুরা চৈব সোমশ্চ তুরগশ্চ মনোজবঃ
যতো দেবাস্ততো জগ্মুরাদিত্যপথমাশ্রিতাঃ
16.37
ধন্বন্তরিস্ততো দেবো বপুষ্মানুদতিষ্ঠত
শ্বেতং কমণ্ডলুং বিভ্রদমৃতং যত্র তিষ্ঠতি
16.38
এতদত্যদ্ভুতং দৃষ্ট্বা দানবানাং সমুত্থিতঃ
অমৃতার্থে মহান্নাদো মমেদমিতি জল্পতাম্
16.39
ততো নারায়ণো মায়ামাস্থিতো মোহিনীং প্রভুঃ
স্ত্রীরূপমদ্ভুতং কৃত্বা দানবানভিসংশ্রিতঃ
16.40
ততস্তদমৃতং তস্যৈ দদুস্তে মূঢচেতসঃ
স্ত্রিয়ৈ দানবদৈতেয়াঃ সর্বে তদ্গতমানসাঃ