অধ্যায় 14

14.1

শৌনক উবাচ
সৌতে কথয় তামেতাং বিস্তরেণ কথাং পুনঃ
আস্তীকস্য কবেঃ সাধোঃ শুশ্রূষা পরমা হি নঃ

মধুরং কথ্যতে সৌম্য শ্লক্ষ্ণাক্ষরপদং ত্বয়া
প্রীয়ামহে ভৃশং তাত পিতেবেদং প্রভাষসে

অস্মচ্ছুশ্রূষণে নিত্যং পিতা হি নিরতস্তব
আচষ্টৈতদ্যথাখ্যানং পিতা তে ত্বং তথা বদ

সূত উবাচ
আয়ুষ্যমিদমাখ্যানমাস্তীকং কথয়ামি তে
যথা শ্রুতং কথয়তঃ সকাশাদ্বৈ পিতুর্ময়া

পুরা দেবয়ুগে ব্রহ্মন্প্রজাপতিসুতে শুভে
আস্তাং ভগিন্যৌ রূপেণ সমুপেতেঽদ্ভুতেঽনঘে

তে ভার্যে কশ্যপস্যাস্তাং কদ্রূশ্চ বিনতা চ হ
প্রাদাত্তাভ্যাং বরং প্রীতঃ প্রজাপতিসমঃ পতিঃ
কশ্যপো ধর্মপত্নীভ্যাং মুদা পরময়া যুতঃ

বরাতিসর্গং শ্রুত্বৈব কশ্যপাদুত্তমং চ তে
হর্ষাদপ্রতিমাং প্রীতিং প্রাপতুঃ স্ম বরস্ত্রিয়ৌ

বব্রে কদ্রূঃ সুতান্নাগান্সহস্রং তুল্যতেজসঃ
দ্বৌ পুত্রৌ বিনতা বব্রে কদ্রূপুত্রাধিকৌ বলে
ওজসা তেজসা চৈব বিক্রমেণাধিকৌ সুতৌ

তস্যৈ ভর্তা বরং প্রাদাদধ্যর্ধং পুত্রমীপ্সিতম্
এবমস্ত্বিতি তং চাহ কশ্যপং বিনতা তদা

কৃতকৃত্যা তু বিনতা লব্ধ্বা বীর্যাধিকৌ সুতৌ
কদ্রূশ্চ লব্ধ্বা পুত্রাণাং সহস্রং তুল্যতেজসাম্

ধার্যৌ প্রয়ত্নতো গর্ভাবিত্যুক্ত্বা স মহাতপাঃ
তে ভার্যে বরসংহৃষ্টে কশ্যপো বনমাবিশৎ

কালেন মহতা কদ্রূরণ্ডানাং দশতীর্দশ
জনয়ামাস বিপ্রেন্দ্র দ্বে অণ্ডে বিনতা তদা

তয়োরণ্ডানি নিদধুঃ প্রহৃষ্টাঃ পরিচারিকাঃ
সোপস্বেদেষু ভাণ্ডেষু পঞ্চ বর্ষশতানি চ

ততঃ পঞ্চশতে কালে কদ্রূপুত্রা বিনিঃসৃতাঃ
অণ্ডাভ্যাং বিনতায়াস্তু মিথুনং ন ব্যদৃশ্যত

ততঃ পুত্রার্থিণী দেবী ব্রীডিতা সা তপস্বিনী
অণ্ডং বিভেদ বিনতা তত্র পুত্রমদৃক্ষত

পূর্বার্ধকায়সংপন্নমিতরেণাপ্রকাশতা
স পুত্রো রোষসংপন্নঃ শশাপৈনামিতি শ্রুতিঃ

যোঽহমেবং কৃতো মাতস্ত্বয়া লোভপরীতয়া
শরীরেণাসমগ্রোঽদ্য তস্মাদ্দাসী ভবিষ্যসি

পঞ্চ বর্ষশতান্যস্যা যয়া বিস্পর্ধসে সহ
এষ চ ত্বাং সুতো মাতর্দাস্যত্বান্মোক্ষয়িষ্যতি

যদ্যেনমপি মাতস্ত্বং মামিবাণ্ডবিভেদনাৎ
ন করিষ্যস্যদেহং বা ব্যঙ্গং বাপি তপস্বিনম্

প্রতিপালয়িতব্যস্তে জন্মকালোঽস্য ধীরয়া
বিশিষ্টবলমীপ্সন্ত্যা পঞ্চবর্ষশতাত্পরঃ

এবং শপ্ত্বা ততঃ পুত্রো বিনতামন্তরিক্ষগঃ
অরুণো দৃশ্যতে ব্রহ্মন্প্রভাতসময়ে সদা

গরুডোঽপি যথাকালং জজ্ঞে পন্নগসূদনঃ
স জাতমাত্রো বিনতাং পরিত্যজ্য খমাবিশৎ

আদাস্যন্নাত্মনো ভোজ্যমন্নং বিহিতমস্য যৎ
বিধাত্রা ভৃগুশার্দূল ক্ষুধিতস্য বুভুক্ষতঃ