Utshovঅধ্যায় 13
13.1
শৌনক উবাচ
কিমর্থং রাজশার্দূলঃ স রাজা জনমেজয়ঃ
সর্পসত্রেণ সর্পাণাং গতোঽন্তং তদ্বদস্ব মে
13.2
আস্তীকশ্চ দ্বিজশ্রেষ্ঠঃ কিমর্থং জপতাং বরঃ
মোক্ষয়ামাস ভুজগান্দীপ্তাত্তস্মাদ্ধুতাশনাৎ
13.3
কস্য পুত্রঃ স রাজাসীত্সর্পসত্রং য আহরৎ
স চ দ্বিজাতিপ্রবরঃ কস্য পুত্রো বদস্ব মে
13.4
সূত উবাচ
মহদাখ্যানমাস্তীকং যত্রৈতত্প্রোচ্যতে দ্বিজ
সর্বমেতদশেষেণ শৃণু মে বদতাং বর
13.5
শৌনক উবাচ
শ্রোতুমিচ্ছাম্যশেষেণ কথামেতাং মনোরমাম্
আস্তীকস্য পুরাণস্য ব্রাহ্মণস্য যশস্বিনঃ
13.6
সূত উবাচ
ইতিহাসমিমং বৃদ্ধাঃ পুরাণং পরিচক্ষতে
কৃষ্ণদ্বৈপায়নপ্রোক্তং নৈমিষারণ্যবাসিনঃ
13.7
পূর্বং প্রচোদিতঃ সূতঃ পিতা মে লোমহর্ষণঃ
শিষ্যো ব্যাসস্য মেধাবী ব্রাহ্মণৈরিদমুক্তবান্
13.8
তস্মাদহমুপশ্রুত্য প্রবক্ষ্যামি যথাতথম্
ইদমাস্তীকমাখ্যানং তুভ্যং শৌনক পৃচ্ছতে
13.9
আস্তীকস্য পিতা হ্যাসীত্প্রজাপতিসমঃ প্রভুঃ
ব্রহ্মচারী যতাহারস্তপস্যুগ্রে রতঃ সদা
13.10
জরত্কারুরিতি খ্যাত ঊর্ধ্বরেতা মহানৃষিঃ
যায়াবরাণাং ধর্মজ্ঞঃ প্রবরঃ সংশিতব্রতঃ
13.11
অটমানঃ কদাচিত্স স্বান্দদর্শ পিতামহান্
লম্বমানান্মহাগর্তে পাদৈরূর্ধ্বৈরধোমুখান্
13.12
তানব্রবীত্স দৃষ্ট্বৈব জরত্কারুঃ পিতামহান্
কে ভবন্তোঽবলম্বন্তে গর্তেঽস্মিন্বা অধোমুখাঃ
13.13
বীরণস্তম্বকে লগ্নাঃ সর্বতঃ পরিভক্ষিতে
মূষকেন নিগূঢেন গর্তেঽস্মিন্নিত্যবাসিনা
13.14
পিতর ঊচুঃ
যায়াবরা নাম বয়মৃষয়ঃ সংশিতব্রতাঃ
সংতানপ্রক্ষয়াদ্ব্রহ্মন্নধো গচ্ছাম মেদিনীম্
13.15
অস্মাকং সংততিস্ত্বেকো জরত্কারুরিতি শ্রুতঃ
মন্দভাগ্যোঽল্পভাগ্যানাং তপ এব সমাস্থিতঃ
13.16
ন স পুত্রাঞ্জনয়িতুং দারান্মূঢশ্চিকীর্ষতি
তেন লম্বামহে গর্তে সংতানপ্রক্ষয়াদিহ
13.17
অনাথাস্তেন নাথেন যথা দুষ্কৃতিনস্তথা
কস্ত্বং বন্ধুরিবাস্মাকমনুশোচসি সত্তম
13.18
জ্ঞাতুমিচ্ছামহে ব্রহ্মন্কো ভবানিহ ধিষ্ঠিতঃ
কিমর্থং চৈব নঃ শোচ্যাননুকম্পিতুমর্হসি
13.19
জরত্কারুরুবাচ
মম পূর্বে ভবন্তো বৈ পিতরঃ সপিতামহাঃ
ব্রূত কিং করবাণ্যদ্য জরত্কারুরহং স্বয়ম্
13.20
পিতর ঊচুঃ
যতস্ব যত্নবাংস্তাত সংতানায় কুলস্য নঃ
আত্মনোঽর্থেঽস্মদর্থে চ ধর্ম ইত্যেব চাভিভো
13.21
ন হি ধর্মফলৈস্তাত ন তপোভিঃ সুসংচিতৈঃ
তাং গতিং প্রাপ্নুবন্তীহ পুত্রিণো যাং ব্রজন্তি হ
13.22
তদ্দারগ্রহণে যত্নং সংতত্যাং চ মনঃ কুরু
পুত্রকাস্মন্নিয়োগাত্ত্বমেতন্নঃ পরমং হিতম্
13.23
জরত্কারুরুবাচ
ন দারান্বৈ করিষ্যামি সদা মে ভাবিতং মনঃ
ভবতাং তু হিতার্থায় করিষ্যে দারসংগ্রহম্
13.24
সময়েন চ কর্তাহমনেন বিধিপূর্বকম্
তথা যদ্যুপলপ্স্যামি করিষ্যে নান্যথা ত্বহম্
13.25
সনাম্নী যা ভবিত্রী মে দিত্সিতা চৈব বন্ধুভিঃ
ভৈক্ষবত্তামহং কন্যামুপয়ংস্যে বিধানতঃ
13.26
দরিদ্রায় হি মে ভার্যাং কো দাস্যতি বিশেষতঃ
প্রতিগ্রহীষ্যে ভিক্ষাং তু যদি কশ্চিত্প্রদাস্যতি
13.27
এবং দারক্রিয়াহেতোঃ প্রয়তিষ্যে পিতামহাঃ
অনেন বিধিনা শশ্বন্ন করিষ্যেঽহমন্যথা
13.28
তত্র চোত্পত্স্যতে জন্তুর্ভবতাং তারণায় বৈ
শাশ্বতং স্থানমাসাদ্য মোদন্তাং পিতরো মম
13.29
সূত উবাচ
ততো নিবেশায় তদা স বিপ্রঃ সংশিতব্রতঃ
মহীং চচার দারার্থী ন চ দারানবিন্দত
13.30
স কদাচিদ্বনং গত্বা বিপ্রঃ পিতৃবচঃ স্মরন্
চুক্রোশ কন্যাভিক্ষার্থী তিস্রো বাচঃ শনৈরিব
13.31
তং বাসুকিঃ প্রত্যগৃহ্ণাদুদ্যম্য ভগিনীং তদা
ন স তাং প্রতিজগ্রাহ ন সনাম্নীতি চিন্তয়ন্
13.32
সনাম্নীমুদ্যতাং ভার্যাং গৃহ্ণীয়ামিতি তস্য হি
মনো নিবিষ্টমভবজ্জরত্কারোর্মহাত্মনঃ
13.33
তমুবাচ মহাপ্রাজ্ঞো জরত্কারুর্মহাতপাঃ
কিংনাম্নী ভগিনীয়ং তে ব্রূহি সত্যং ভুজংগম
13.34
বাসুকিরুবাচ
জরত্কারো জরত্কারুঃ স্বসেয়মনুজা মম
ত্বদর্থং রক্ষিতা পূর্বং প্রতীচ্ছেমাং দ্বিজোত্তম
13.35
সূত উবাচ
মাত্রা হি ভুজগাঃ শপ্তাঃ পূর্বং ব্রহ্মবিদাং বর
জনমেজয়স্য বো যজ্ঞে ধক্ষ্যত্যনিলসারথিঃ
13.36
তস্য শাপস্য শান্ত্যর্থং প্রদদৌ পন্নগোত্তমঃ
স্বসারমৃষয়ে তস্মৈ সুব্রতায় তপস্বিনে
13.37
স চ তাং প্রতিজগ্রাহ বিধিদৃষ্টেন কর্মণা
আস্তীকো নাম পুত্রশ্চ তস্যাং জজ্ঞে মহাত্মনঃ
13.38
তপস্বী চ মহাত্মা চ বেদবেদাঙ্গপারগঃ
সমঃ সর্বস্য লোকস্য পিতৃমাতৃভয়াপহঃ
13.39
অথ কালস্য মহতঃ পাণ্ডবেয়ো নরাধিপঃ
আজহার মহায়জ্ঞং সর্পসত্রমিতি শ্রুতিঃ
13.40
তস্মিন্প্রবৃত্তে সত্রে তু সর্পাণামন্তকায় বৈ
মোচয়ামাস তং শাপমাস্তীকঃ সুমহায়শাঃ
13.41
নাগাংশ্চ মাতুলাংশ্চৈব তথা চান্যান্স বান্ধবান্
পিতৄংশ্চ তারয়ামাস সংতত্যা তপসা তথা
ব্রতৈশ্চ বিবিধৈর্ব্রহ্মন্স্বাধ্যায়ৈশ্চানৃণোঽভবৎ
13.42
দেবাংশ্চ তর্পয়ামাস যজ্ঞৈর্বিবিধদক্ষিণৈঃ
ঋষীংশ্চ ব্রহ্মচর্যেণ সংতত্যা চ পিতামহান্
13.43
অপহৃত্য গুরুং ভারং পিতৄণাং সংশিতব্রতঃ
জরত্কারুর্গতঃ স্বর্গং সহিতঃ স্বৈঃ পিতামহৈঃ
13.44
আস্তীকং চ সুতং প্রাপ্য ধর্মং চানুত্তমং মুনিঃ
জরত্কারুঃ সুমহতা কালেন স্বর্গমীয়িবান্
13.45
এতদাখ্যানমাস্তীকং যথাবত্কীর্তিতং ময়া
প্রব্রূহি ভৃগুশার্দূল কিং ভূয়ঃ কথ্যতামিতি