সূক্ত 6

6.1

গর্ভদোষনিবারণম্। ১-২৬ মাতৃনামা। মন্ত্রোক্তাঃ, মাতৃনামা, ১৫ ব্রহ্মণস্পতিঃ। অনুষ্টুপ্, ২ পুরস্তাদ্বৃহতী, ১০ ত্র্যবসানা ষট্-পদা জগতী, ১১,১২,১৪,১৬ পথ্যাপঙ্ক্তিঃ, ১৫ ত্র্যবসানা সপ্তপদা শক্বরী, ১৭ ত্র্যবসানা সপ্তপদা জগতী।

যৌ তে মাতোন্মমার্জ জাতায়াঃ পতিবেদনৌ ।
দুর্ণামা তত্র মা গৃধদলিংশ উত বত্সপঃ ॥১॥

6.2

পলালানুপলালৌ শর্কুং কোকং মলিম্লুচং পলীজকম্।
আশ্রেষং বব্রিবাসসমৃক্ষগ্রীবং প্রমীলিনম্ ॥২॥

6.3

মা সং বৃতো মোপ সৃপ ঊরূ মাব সৃপোঽন্তরা।
কৃণোম্যস্যৈ ভেষজং বজং দুর্ণামচাতনম্ ॥৩॥

6.4

দুর্ণামা চ সুনামা চোভা সংবৃতমিচ্ছতঃ ।
অরায়ানপ হন্মঃ সুনামা স্ত্রৈণমিচ্ছতাম্ ॥৪॥

6.5

যঃ কৃষ্ণঃ কেশ্যসুর স্তম্বজ উত তুণ্ডিকঃ ।
অরায়ানস্যা মুষ্কাভ্যাং ভংসসোপ হন্মসি ॥৫॥

6.6

অনুজিঘ্রং প্রমৃশন্তং ক্রব্যাদমুত রেরিহম্।
অরায়াংছ্বকিষ্কিণো বজঃ পিঙ্গো অনীনশৎ ॥৬॥

6.7

যস্ত্বা স্বপ্নে নিপদ্যতে ভ্রাতা ভূত্বা পিতেব চ ।
বজস্তান্ত্সহতামিতঃ ক্লীবরূপাংস্তিরীটিনঃ ॥৭॥

6.8

যস্ত্বা স্বপন্তীং ত্সরতি যস্ত্বা দিপ্সতি জাগ্রতীম্।
ছায়ামিব প্র তান্ত্সূর্যঃ পরিক্রামন্ননীনশৎ ॥৮॥

6.9

যঃ কৃণোতি মৃতবত্সামবতোকামিমাং স্ত্রিয়ম্।
তমোষধে ত্বং নাশয়াস্যাঃ কমলমঞ্জিবম্ ॥৯॥

6.10

যে শালাঃ পরিনৃত্যন্তি সায়ং গর্দভনাদিনঃ ।
কুসূলা যে চ কুক্ষিলাঃ ককুভাঃ করুমাঃ স্রিমাঃ ।
তানোষধে ত্বং গন্ধেন বিষূচীনান্ বি নাশয় ॥১০॥

6.11

যে কুকুন্ধাঃ কুকূরভাঃ কৃত্তীর্দূর্শানি বিভ্রতি ।
ক্লীবা ইব প্রনৃত্যন্তো বনে যে কুর্বতে ঘোষং তানিতো নাশয়ামসি ॥১১॥

6.12

যে সূর্যং ন তিতিক্ষন্ত আতপন্তমমুং দিবঃ ।
অরায়ান্ বস্তবাসিনো দুর্গন্ধীংল্লোহিতাস্যান্ মককান্ নাশয়ামসি ॥১২॥

6.13

য আত্মানমতিমাত্রমংস আধায় বিভ্রতি ।
স্ত্রীণাং শ্রোণিপ্রতোদিন ইন্দ্র রক্ষাংসি নাশয় ॥১৩॥

6.14

যে পূর্বে বধ্বো৩য়ন্তি হস্তে শৃঙ্গাণি বিভ্রতঃ ।
আপাকেস্থাঃ প্রহাসিন স্তম্বে যে কুর্বতে জ্যোতিস্তানিতো নাশয়ামসি ॥১৪॥

6.15

যেষাং পশ্চাৎ প্রপদানি পুরঃ পার্ষ্ণীঃ পুরো মুখা ।
খলজাঃ শকধূমজা উরুণ্ডা যে চ মট্মটাঃ কুম্ভমুষ্কা অয়াশবঃ ।
তানস্যা ব্রহ্মণস্পতে প্রতীবোধেন নাশয় ॥১৫॥

6.16

পর্যস্তাক্ষা অপ্রচঙ্কশা অস্ত্রৈণাঃ সন্তু পণ্ডগাঃ ।
অব ভেষজ পাদয় য ইমাং সংবিবৃত্সত্যপতিঃ স্বপতিং স্ত্রিয়ম্ ॥১৬॥

6.17

উদ্ধর্ষিণং মুনিকেশং জম্ভয়ন্তং মরীমৃশম্।
উপেষন্তমুদুম্বলং তুণ্ডেলমুত শালুডম্।
পদা প্র বিধ্য পার্ষ্ণ্যা স্থালীং গৌরিব স্পন্দনা ॥১৭॥

6.18

যস্তে গর্ভং প্রতিমৃশাজ্জাতং বা মারয়াতি তে ।
পিঙ্গস্তমুগ্রধন্বা কৃণোতু হৃদয়াবিধম্ ॥১৮॥

6.19

যে অম্নো জাতান্ মারয়ন্তি সূতিকা অনুশেরতে ।
স্ত্রীভাগান্ পিঙ্গো গন্ধর্বান্ বাতো অভ্রমিবাজতু ॥১৯॥

6.20

পরিসৃষ্টং ধরয়তু যদ্ধিতং মাব পাদি তৎ।
গর্ভং ত উগ্রৌ রক্ষতাং ভেষজৌ নীবিভার্যৌঽ ॥২০॥

6.21

পবীনসাৎ তঙ্গল্বা৩চ্ছায়কাদুত নগ্নকাৎ।
প্রজায়ৈ পত্যে ত্বা পিঙ্গঃ পরি পাতু কিমীদিনঃ ॥২১॥

6.22

দ্ব্যাঽস্যাচ্চতুরক্ষাৎ পঞ্চপদাদনঙ্গুরেঃ ।
বৃন্তাদভি প্রসর্পতঃ পরি পাহি বরীবৃতাৎ ॥২২॥

6.23

যআমং মাংসমদন্তি পৌরুষেয়ং চ যে ক্রবিঃ ।
গর্ভান্ খাদন্তি কেশবাস্তানিতো নাশয়ামসি ॥২৩॥

6.24

যে সূর্যাৎ পরিসর্পন্তি স্নুষেব শ্বশুরাদধি ।
বজশ্চ তেষাং পিঙ্গশ্চ হৃদয়েঽধি নি বিধ্যতাম্ ॥২৪॥

6.25

পিঙ্গ রক্ষ জায়মানং মা পুমাংসং স্ত্রিয়ং ক্রন্।
আণ্ডাদো গর্ভান্মা দভন্ বাধস্বেতঃ কিমীদিনঃ ॥২৫॥

6.26

অপ্রজাস্ত্বং মার্তবত্সমাদ্ রোদমঘমাবয়ম্।
বৃক্ষাদিব স্রজং কৃত্বাপ্রিয়ে প্রতি মুঞ্চ তৎ ॥২৬॥