Sukta 6

6.1

Garbhadoshanivaranam, 1-26 matrinama, mantroktah, matrinama, 15 brahmanaspatih, anushtup, 2 purastadbrihati, 10 tryavasana shat-pada jagati, 11, 12, 14, 16 pathyapanktih, 15 tryavasana saptapada shakvari, 17 tryavasana saptapada jagati

यौ ते॑ मा॒तोन्म॒मार्ज॑ जा॒तायाः॑ पति॒वेद॑नौ ।
दु॒र्णामा॒ तत्र॒ मा गृ॑धद॒लिंश॑ उ॒त व॒त्सपः॑ ॥१॥

Yau te matonmamarja jatayah pativedanau
Durnama tatra ma gridhadalinsha uta vatsapah

6.2

प॒ला॒ला॒नु॒प॒ला॒लौ शर्कुं॒ कोकं॑ मलिम्लु॒चं प॒लीज॑कम्।
आ॒श्रेषं॑ व॒व्रिवा॑सस॒मृक्ष॑ग्रीवं प्रमी॒लिन॑म् ॥२॥

Palalanupalalau sharkum kokam malimlucham palijakam
Ashresham vavrivasasamrikshagrivam pramilinam

6.3

मा सं वृ॑तो॒ मोप॑ सृप ऊ॒रू माव॑ सृपोऽन्त॒रा।
कृ॒णोम्य॑स्यै भेष॒जं ब॒जं दु॑र्णाम॒चात॑नम् ॥३॥

Ma sam vrito mopa sripa uru mava sripontara
Krinomyasyai bheshajam bajam durnamachatanam

6.4

दु॒र्णामा॑ च सु॒नामा॑ चो॒भा सं॒वृत॑मिच्छतः ।
अ॒राया॒नप॑ हन्मः सु॒नामा॒ स्त्रैण॑मिच्छताम् ॥४॥

Durnama cha sunama chobha sanvritamichchhatah
Arayanapa hanmah sunama strainamichchhatam

6.5

यः कृ॒ष्णः के॒श्यसु॑र स्तम्ब॒ज उ॒त तुण्डि॑कः ।
अ॒राया॑नस्या मु॒ष्काभ्यां॒ भंस॒सोप॑ हन्मसि ॥५॥

Yah krishnah keshyasura stambaja uta tundikah
Arayanasya mushkabhyam bhansasopa hanmasi

6.6

अ॒नु॒जि॒घ्रं प्र॑मृ॒शन्तं॑ क्र॒व्याद॑मु॒त रे॑रि॒हम्।
अ॒रायां॑छ्वकि॒ष्किणो॑ ब॒जः पि॒ङ्गो अ॑नीनशत् ॥६॥

Anujighram pramrishantam kravyadamuta reriham
Arayanchhvakishkino bajah pingo aninashat

6.7

यस्त्वा॒ स्वप्ने॑ नि॒पद्य॑ते॒ भ्राता॑ भू॒त्वा पि॒तेव॑ च ।
ब॒जस्तान्त्स॑हतामि॒तः क्ली॒बरू॑पांस्तिरी॒टिनः॑ ॥७॥

Yastva svapne nipadyate bhrata bhutva piteva cha
Bajastantsahatamitah klibarupanstiritinah

6.8

यस्त्वा॑ स्व॒पन्तीं॒ त्सर॑ति॒ यस्त्वा॒ दिप्स॑ति॒ जाग्र॑तीम्।
छा॒यामि॑व॒ प्र तान्त्सूर्यः॑ परि॒क्राम॑न्ननीनशत् ॥८॥

Yastva svapantim tsarati yastva dipsati jagratim
Chhayamiva pra tantsuryah parikramannaninashat

6.9

यः कृ॒णोति॑ मृ॒तव॑त्सा॒मव॑तोकामि॒मां स्त्रिय॑म्।
तमो॑षधे॒ त्वं ना॑शया॒स्याः क॒मल॑मञ्जि॒वम् ॥९॥

Yah krinoti mritavatsamavatokamimam striyam
Tamoshadhe tvam nashayasyah kamalamanjivam

6.10

ये शालाः॑ परि॒नृत्य॑न्ति सा॒यं ग॑र्दभना॒दिनः॑ ।
कु॒सूला॒ ये च॑ कुक्षि॒लाः क॑कु॒भाः क॒रुमाः॒ स्रिमाः॑ ।
तानो॑षधे॒ त्वं ग॒न्धेन॑ विषू॒चीना॒न् वि ना॑शय ॥१०॥

Ye shalah parinrityanti sayam gardabhanadinah
Kusula ye cha kukshilah kakubhah karumah srimah
Tanoshadhe tvam gandhena vishuchinan vi nashaya

6.11

ये कु॒कुन्धाः॑ कु॒कूर॑भाः॒ कृत्ती॑र्दू॒र्शानि॒ बिभ्र॑ति ।
क्ली॒बा इ॑व प्र॒नृत्य॑न्तो॒ वने॒ ये कु॒र्वते॒ घोषं॒ तानि॒तो ना॑शयामसि ॥११॥

Ye kukundhah kukurabhah krittirdurshani bibhrati
Kliba iva pranrityanto vane ye kurvate ghosham tanito nashayamasi

6.12

ये सूर्यं॒ न तिति॑क्षन्त आ॒तप॑न्तम॒मुं दि॒वः ।
अ॒राया॑न् बस्तवा॒सिनो॑ दु॒र्गन्धीं॒ल्लोहि॑तास्या॒न् मक॑कान् नाशयामसि ॥१२॥

Ye suryam na titikshanta atapantamamum divah
Arayan bastavasino durgandhinllohitasyan makakan nashayamasi

6.13

य आ॒त्मान॑मतिमा॒त्रमंस॑ आ॒धाय॒ बिभ्र॑ति ।
स्त्री॒णां श्रो॑णिप्रतो॒दिन॒ इन्द्र॒ रक्षां॑सि नाशय ॥१३॥

Ya atmanamatimatramansa adhaya bibhrati
Strinam shronipratodina indra rakshansi nashaya

6.14

ये पूर्वे॑ ब॒ध्वो॒३यन्ति॒ हस्ते॒ शृङ्गा॑णि॒ बिभ्र॑तः ।
आ॒पा॒के॒स्थाः प्र॑हा॒सिन॑ स्त॒म्बे ये कु॒र्वते॒ ज्योति॒स्तानि॒तो ना॑शयामसि ॥१४॥

Ye purve badhvo3yanti haste shringani bibhratah
Apakesthah prahasina stambe ye kurvate jyotistanito nashayamasi

6.15

येषां॑ प॒श्चात् प्रप॑दानि पु॒रः पार्ष्णीः॑ पु॒रो मुखा॑ ।
ख॒ल॒जाः श॑कधूम॒जा उरु॑ण्डा॒ ये च॑ मट्म॒टाः कु॒म्भमु॑ष्का अया॒शवः॑ ।
तान॒स्या ब्र॑ह्मणस्पते प्रतीबो॒धेन॑ नाशय ॥१५॥

Yesham pashchat prapadani purah parshnih puro mukha
Khalajah shakadhumaja urunda ye cha matmatah kumbhamushka ayashavah
Tanasya brahmanaspate pratibodhena nashaya

6.16

प॒र्य॒स्ता॒क्षा अप्र॑चङ्कशा अस्त्रै॒णाः स॑न्तु॒ पण्ड॑गाः ।
अव॑ भेषज पादय॒ य इ॒मां सं॒विवृ॑त्स॒त्यप॑तिः स्वप॒तिं स्त्रिय॑म् ॥१६॥

Paryastaksha aprachankasha astrainah santu pandagah
Ava bheshaja padaya ya imam sanvivritsatyapatih svapatim striyam

6.17

उ॒द्ध॒र्षिणं॒ मुनि॑केशं ज॒म्भय॑न्तं मरीमृ॒शम्।
उपेष॑न्तमुदु॒म्बलं॑ तु॒ण्डेल॑मु॒त शालु॑डम्।
प॒दा प्र वि॑ध्य॒ पार्ष्ण्या॑ स्था॒लीं गौरि॑व स्पन्द॒ना ॥१७॥

Uddharshinam munikesham jambhayantam marimrisham
Upeshantamudumbalam tundelamuta shaludam
Pada pra vidhya parshnya sthalim gauriva spandana

6.18

यस्ते॒ गर्भं॑ प्रतिमृ॒शाज्जा॒तं वा॑ मा॒रया॑ति ते ।
पि॒ङ्गस्तमु॒ग्रध॑न्वा कृ॒णोतु॑ हृदया॒विध॑म् ॥१८॥

Yaste garbham pratimrishajjatam va marayati te
Pingastamugradhanva krinotu hridayavidham

6.19

ये अ॒म्नो जा॒तान् मा॒रय॑न्ति॒ सूति॑का अनु॒शेर॑ते ।
स्त्रीभा॑गान् पि॒ङ्गो ग॑न्ध॒र्वान् वातो॑ अ॒भ्रमि॑वाजतु ॥१९॥

Ye amno jatan marayanti sutika anusherate
Stribhagan pingo gandharvan vato abhramivajatu

6.20

परि॑सृष्टं धरयतु॒ यद्धि॒तं माव॑ पादि॒ तत्।
गर्भं॑ त उ॒ग्रौ र॑क्षतां भेष॒जौ नी॑विभा॒र्यौऽ ॥२०॥

Parisrishtam dharayatu yaddhitam mava padi tat
Garbham ta ugrau rakshatam bheshajau nivibharyau

6.21

प॒वी॒न॒सात् त॑ङ्ग॒ल्वा॒३च्छाय॑कादु॒त नग्न॑कात्।
प्र॒जायै॒ पत्ये॑ त्वा पि॒ङ्गः परि॑ पातु किमी॒दिनः॑ ॥२१॥

Pavinasat tangalva3chchhayakaduta nagnakat
Prajayai patye tva pingah pari patu kimidinah

6.22

द्व्याऽस्याच्चतुर॒क्षात् पञ्चपदादनङ्गु॒रेः ।
वृन्ता॑द॒भि प्र॒सर्प॑तः॒ परि॑ पाहि वरीवृ॒तात् ॥२२॥

Dvyasyachchaturakshat panchapadadanangureh
Vrintadabhi prasarpatah pari pahi varivritat

6.23

यआ॒मं मां॒सम॒दन्ति॒ पौरु॑षेयं च॒ ये क्र॒विः ।
गर्भा॒न् खाद॑न्ति केश॒वास्तानि॒तो ना॑शयामसि ॥२३॥

Yaamam mansamadanti paurusheyam cha ye kravih
Garbhan khadanti keshavastanito nashayamasi

6.24

ये सूर्या॑त् परि॒सर्प॑न्ति स्नु॒षेव॒ श्वशु॑रा॒दधि॑ ।
ब॒जश्च॒ तेषां॑ पि॒ङ्गश्च॒ हृद॒येऽधि॒ नि वि॑ध्यताम् ॥२४॥

Ye suryat parisarpanti snusheva shvashuradadhi
Bajashcha tesham pingashcha hridayedhi ni vidhyatam

6.25

पिङ्ग॒ रक्ष॒ जाय॑मानं॒ मा पुमां॑सं॒ स्त्रियं॑ क्रन्।
आ॒ण्डादो॒ गर्भा॒न्मा द॑भ॒न् बाध॑स्वे॒तः कि॑मी॒दिनः॑ ॥२५॥

Pinga raksha jayamanam ma pumansam striyam kran
Andado garbhanma dabhan badhasvetah kimidinah

6.26

अ॒प्र॒जा॒स्त्वं मार्त॑वत्स॒माद् रोद॑म॒घमा॑व॒यम्।
वृ॒क्षादि॑व॒ स्रजं॑ कृ॒त्वाप्रि॑ये॒ प्रति॑ मुञ्च॒ तत् ॥२६॥

Aprajastvam martavatsamad rodamaghamavayam
Vrikshadiva srajam kritvapriye prati muncha tat