Sukta 7

7.1

Oshadhayah, 1-28 atharva, bhaishajyam, ayushyam, oshadhayah, anushtup, 2 uparishtad bhurigbrihati, 3 puraushnik, 4 panchapada paranushtubatijagati, 5-6, 10, 25 pathyapanktih ( 6 virad garbha bhurik) 9 dvipadarchi bhuriganushtup, 12 panchapada viradatishakvari, 14 uparishtannichrid brihati, 26 nichrit, 28 bhurik

या ब॒भ्रवो॒ याश्च॑ शु॒क्रा रोहि॑णीरु॒त पृश्न॑यः ।
असि॑क्नीः कृ॒ष्णा ओष॑धीः॒ सर्वा॑ अ॒च्छाव॑दामसि ॥१॥

Ya babhravo yashcha shukra rohiniruta prishnayah
Asiknih krishna oshadhih sarva achchhavadamasi

7.2

त्राय॑न्तामि॒मं पुरु॑षं॒ यक्ष्मा॑द् दे॒वेषि॑ता॒दधि॑ ।
यासां॒ द्यौष्पि॒ता पृ॑थि॒वी मा॒ता स॑मु॒द्रो मूलं॑ वी॒रुधां॑ ब॒भूव॑ ॥२॥

Trayantamimam purusham yakshmad deveshitadadhi
Yasam dyaushpita prithivi mata samudro mulam virudham babhuva

7.3

आपो॒ अग्रं दि॒व्या ओष॑धयः ।
तास्ते॒ यक्ष्म॑मेन॒स्य॑१मङ्गा॑दङ्गादनीनशन् ॥३॥

Apo agram divya oshadhayah
Taste yakshmamenasya1mangadangadaninashan

7.4

प्र॒स्तृ॒ण॒ती स्त॒म्बिनी॒रेक॑शुङ्गाः प्रतन्व॒तीरोष॑धी॒रा व॑दामि ।
अं॒शु॒मतीः॑ का॒ण्डिनी॒र्या विशा॑खा॒ ह्वया॑मि ते वी॒रुधो॑ वैश्वदे॒वीरु॒ग्राः पु॑रुष॒जीव॑नीः ॥४॥

Prastrinati stambinirekashungah pratanvatiroshadhira vadami
Anshumatih kandinirya vishakha hvayami te virudho vaishvadevirugrah purushajivanih

7.5

यद् वः॒ सहः॑ सहमाना वी॒र्यं॑१यच्च॑ वो॒ बल॑म्।
तेने॒मम॒स्माद् यक्ष्मा॒त् पुरु॑षं मुञ्चतौषधी॒रथो॑ कृणोमि भेष॒जम् ॥५॥

Yad vah sahah sahamana viryan1yachcha vo balam
Tenemamasmad yakshmat purusham munchataushadhiratho krinomi bheshajam

7.6

जी॒व॒लां न॑घारि॒षां जी॑व॒न्तीमोष॑धीम॒हम्।
अ॒रु॒न्ध॒तीमु॒न्नय॑न्तीं पु॒ष्पां मधु॑मतीमि॒ह हु॑वे॒ऽस्मा अ॑रि॒ष्टता॑तये ॥६॥

Jivalam nagharisham jivantimoshadhimaham
Arundhatimunnayantim pushpam madhumatimiha huvesma arishtatataye

7.7

इ॒हा य॑न्तु॒ प्रचे॑तसो मे॒दिनी॒र्वच॑सो॒ मम॑ ।
यथे॒मं पा॒रया॑मसि॒ पुरु॑षं दुरि॒तादधि॑ ॥७॥

Iha yantu prachetaso medinirvachaso mama
Yathemam parayamasi purusham duritadadhi

7.8

अ॒ग्नेर्घा॒सो अ॒पां गर्भो॒ या रोह॑न्ति॒ पुन॑र्णवाः ।
ध्रु॒वाः स॒हस्र॑नाम्नीर्भेष॒जीः स॒न्त्वाभृ॑ताः ॥८॥

Agnerghaso apam garbho ya rohanti punarnavah
Dhruvah sahasranamnirbheshajih santvabhritah

7.9

अ॒वको॑ल्बा उ॒दका॑त्मान॒ ओष॑धयः ।
व्यृऽषन्तु दुरि॒तं ती॑क्ष्णशृ॒ङ्ग्यः ॥९॥

Avakolba udakatmana oshadhayah
Vyrishantu duritam tikshnashringyah

7.10

उ॒न्मु॒ञ्चन्ती॑र्विवरु॒णा उ॒ग्रा या वि॑ष॒दूष॑णीः ।
अथो॑ बलास॒नाश॑नीः कृत्या॒दूष॑णीश्च॒ यास्ता इ॒हा य॒न्त्वोष॑धीः ॥१०॥

Unmunchantirvivaruna ugra ya vishadushanih
Atho balasanashanih krityadushanishcha yasta iha yantvoshadhih

7.11

अ॒प॒क्री॒ताः सही॑यसीर्वी॒रुधो॒ या अ॒भिष्टु॑ताः ।
त्राय॑न्ताम॒स्मिन् ग्रामे॒ गामश्वं॒ पुरु॑षं प॒शुम् ॥११॥

Apakritah sahiyasirvirudho ya abhishtutah
Trayantamasmin grame gamashvam purusham pashum

7.12

मधु॑मन्मू॑लं म॑धुमद॑ग्रमासाम्म॑धुमन्म॑ध्यं वीरु॑धां बभूव ।
मधु॑मत् प॒र्णं मधु॑म॒त् पुष्प॑मासां॒ मधोः॒ संभक्ता अ॒मृत॑स्य भ॒क्षो घृ॒तमन्नं॑ दुह्रतां॒ गोपु॑रोगवम् ॥१२॥

Madhumanmulam madhumadagramasammadhumanmadhyam virudham babhuva
Madhumat parnam madhumat pushpamasam madhoh sambhakta amritasya bhaksho ghritamannam duhratam gopurogavam

7.13

याव॑तीः किय॑तीश्चे॒माः पृ॑थि॒व्यामध्योष॑धीः ।
ता मा॑ सहस्रप॒र्ण्योऽ मृ॒त्योर्मु॑ञ्च॒न्त्वंह॑सः ॥१३॥

Yavatih kiyatishchemah prithivyamadhyoshadhih
Ta ma sahasraparnyo mrityormunchantvanhasah

7.14

वैया॑घ्रो म॒णिर्वी॒रुधां॒ त्राय॑मानोऽभिशस्ति॒पाः ।
अमी॑वाः॒ सर्वा॒ रक्षां॒स्यप॑ ह॒न्त्वधि॑ दू॒रम॒स्मत् ॥१४॥

Vaiyaghro manirvirudham trayamanobhishastipah
Amivah sarva rakshansyapa hantvadhi duramasmat

7.15

सिं॒हस्ये॑व स्त॒नथोः॒ सं वि॑जन्ते॒ऽग्नेरि॑व विजन्त॒ आभृ॑ताभ्यः ।
गवां॒ यक्ष्मः॒ पुरु॑षाणां वी॒रुद्भि॒रति॑नुत्तो ना॒व्याऽएतु स्रो॒त्याः ॥१५॥

Sinhasyeva stanathoh sam vijantegneriva vijanta abhritabhyah
Gavam yakshmah purushanam virudbhiratinutto navyaetu srotyah

7.16

मु॒मु॒चा॒ना ओष॑धयो॒ऽग्नेर्वै॑श्वान॒रादधि॑ ।
भूमिं॑ संतन्व॒तीरि॑त॒ यासां॒ राजा॒ वन॒स्पतिः॑ ॥१६॥

Mumuchana oshadhayognervaishvanaradadhi
Bhumim santanvatirita yasam raja vanaspatih

7.17

या रोह॑न्त्याङ्गिर॒सीः पर्व॑तेषु स॒मेषु॑ च ।
ता नः॒ पय॑स्वतीः शि॒वा ओष॑धीः सन्तु॒ शं हृ॒दे ॥१७॥

Ya rohantyangirasih parvateshu sameshu cha
Ta nah payasvatih shiva oshadhih santu sham hride

7.18

याश्चा॒हं वेद॑ वी॒रुधो॒ याश्च॒ पश्या॑मि॒ चक्षु॑षा ।
अज्ञा॑ता जानी॒मश्च॒ या यासु॑ वि॒द्म च॒ संभृ॑तम् ॥१८॥

Yashchaham veda virudho yashcha pashyami chakshusha
Agyata janimashcha ya yasu vidma cha sambhritam

7.19

सर्वाः॑ सम॒ग्रा ओष॑धी॒र्बोध॑न्तु॒ वच॑सो॒ मम॑ ।
यथे॒मं पा॒रया॑मसि॒ पुरु॑षं दुरि॒तादधि॑ ॥१९॥

Sarvah samagra oshadhirbodhantu vachaso mama
Yathemam parayamasi purusham duritadadhi

7.20

अ॒श्व॒त्थो द॒र्भो वी॒रुधां॒ सोमो॒ राजा॒मृतं॑ ह॒विः ।
व्री॒हिर्यव॑श्च भेष॒जौ दि॒वस्पु॒त्रावम॑र्त्यौ ॥२०॥

Ashvattho darbho virudham somo rajamritam havih
Vrihiryavashcha bheshajau divasputravamartyau

7.21

उज्जि॑हीध्वे स्त॒नय॑त्यभि॒क्रन्द॑त्योषधीः ।
य॒दा वः॑ पृश्निमातरः प॒र्जन्यो॒ रेत॒साव॑ति ॥२१॥

Ujjihidhve stanayatyabhikrandatyoshadhih
Yada vah prishnimatarah parjanyo retasavati

7.22

तस्या॒मृत॑स्ये॒मं बलं॒ पुरु॑षं पाययामसि ।
अथो॑ कृणोमि भेष॒जं यथा स॑च्छ॒तहा॑यनः ॥२२॥

Tasyamritasyemam balam purusham payayamasi
Atho krinomi bheshajam yatha sachchhatahayanah

7.23

व॒रा॒हो वे॑द वी॒रुधं॑ नकु॒लो वे॑द भेष॒जीम्।
स॒र्पा ग॑न्ध॒र्वा या वि॒दुस्ता अ॒स्मा अव॑से हुवे ॥२३॥

Varaho veda virudham nakulo veda bheshajim
Sarpa gandharva ya vidusta asma avase huve

7.24

याः सु॑प॒र्णा आ॑ङ्गिर॒सीर्दि॒व्या या र॒घतो॑ वि॒दुः ।
वयां॑सि हं॒सा या वि॒दुर्याश्च॒ सर्वे॑ पत॒त्रिणः॑ ।
मृ॒गा या वि॒दुरोष॑धी॒स्ता अ॒स्मा अव॑से हुवे ॥२४॥

Yah suparna angirasirdivya ya raghato viduh
Vayansi hansa ya viduryashcha sarve patatrinah
Mriga ya viduroshadhista asma avase huve

7.25

याव॑तीना॒मोष॑धीनां॒ गा॑वः प्रा॒श्नन्त्य॒घ्न्या याव॑तीनामजा॒वयः॑ ।
ताव॑ती॒स्तुभ्य॒मोष॑धीः॒ शर्म॑ यच्छ॒न्त्वाभृ॑ताः ॥२५॥

Yavatinamoshadhinam gavah prashnantyaghnya yavatinamajavayah
Tavatistubhyamoshadhih sharma yachchhantvabhritah

7.26

याव॑तीषु मनु॒ष्याऽ भेष॒जं भि॒षजो॑ वि॒दुः ।
ताव॑तीर्वि॒श्वभे॑षजी॒रा भ॑रामि॒ त्वाम॒भि ॥२६॥

Yavatishu manushya bheshajam bhishajo viduh
Tavatirvishvabheshajira bharami tvamabhi

7.27

पुष्प॑वतीः प्र॒सूम॑तीः फ॒लिनी॑रफ॒ला उ॒त।
सं॒मा॒तर॑ इव दुह्राम॒स्मा अ॑रि॒ष्टता॑तये ॥२७॥

Pushpavatih prasumatih phaliniraphala uta
Sammatara iva duhramasma arishtatataye

7.28

उत् त्वा॑हार्षं॒ पञ्च॑शला॒दथो॒ दश॑शलादु॒त।
अथो॑ य॒मस्य॒ पड्वी॑शा॒द् विश्व॑स्माद् देवकिल्बि॒षात् ॥२८॥

Ut tvaharsham panchashaladatho dashashaladuta
Atho yamasya padvishad vishvasmad devakilbishat