Sukta 5

5.1

Pratisaro manih, 1-22 shukrah, krityadushanam, mantroktadevatah, anushtup, 1, 6 uparishtadbrihati, 2 tripada virad gayatri, 3 chatushpada bhurigjagati, 5 bhuriksanstarapanktih, 7-8 kakummati, 9 puraskritirjagati, 10 trishtup, 11 pathyapanktih, 14 tryavasana shat-pada jagati, 15 purastadbrihati, 19 jagatigarbha trishtup, 20 viradgarbha prastarapanktih, 21 virad trishtup, 22 tryavasana saptapada viradgarbha bhurikshakvari

अ॒यं प्र॑तिस॒रो म॒णिर्वी॒रो वी॒राय॑ बध्यते ।
वी॒र्यऽवान्त्सपत्न॒हा शूर॑वीरः परि॒पाणः॑ सुम॒ङ्गलः॑ ॥१॥

Ayam pratisaro manirviro viraya badhyate
Viryavantsapatnaha shuravirah paripanah sumangalah

5.2

अ॒यं म॒णिः स॑पत्न॒हा सु॒वीरः॒ सह॑स्वान् वा॒जी सह॑मान उ॒ग्रः ।
प्र॒त्यक् कृ॒त्या दू॒षय॑न्नेति वी॒रः ॥२॥

Ayam manih sapatnaha suvirah sahasvan vaji sahamana ugrah
Pratyak kritya dushayanneti virah

5.3

अ॒नेनेन्द्रो॑ म॒णिना॑ वृ॒त्रम॑हन्न॒नेनासु॑रा॒न् परा॑भावयन्मनी॒षी।
अ॒नेना॑जय॒द् द्यावा॑पृथि॒वी उ॒भे इ॒मे अ॒नेना॑जयत् प्र॒दिश॒श्चत॑स्रः ॥३॥

Anenendro manina vritramahannanenasuran parabhavayanmanishi
Anenajayad dyavaprithivi ubhe ime anenajayat pradishashchatasrah

5.4

अ॒यं स्रा॒क्त्यो म॒णिः प्र॑तीव॒र्तः प्र॑तिस॒रः ।
ओज॑स्वान् विमृ॒धो व॒शी सो अ॒स्मान् पा॑तु स॒र्वतः॑ ॥४॥

Ayam sraktyo manih prativartah pratisarah
Ojasvan vimridho vashi so asman patu sarvatah

5.5

तद॒ग्निरा॑ह॒ तदु॒ सोम॑ आह॒ बृह॒स्पतिः॑ सवि॒ता तदिन्द्रः॑ ।
ते मे॑ दे॒वाः पु॒रोहि॑ताः प्र॒तीचीः॑ कृ॒त्याः प्र॑तिस॒रैर॑जन्तु ॥५॥

Tadagniraha tadu soma aha brihaspatih savita tadindrah
Te me devah purohitah pratichih krityah pratisarairajantu

5.6

अ॒न्तर्द॑धे॒ द्यावा॑पृथि॒वी उ॒ताह॑रु॒त सूर्य॑म्।
ते मे॑ दे॒वाः पु॒रोहि॑ताः प्र॒तीचीः॑ कृ॒त्याः प्र॑तिस॒रैर॑जन्तु ॥६॥

Antardadhe dyavaprithivi utaharuta suryam
Te me devah purohitah pratichih krityah pratisarairajantu

5.7

ये स्रा॒क्त्यं म॒णिं जना॒ वर्मा॑णि कृ॒ण्वते॑ ।
सूर्य॑ इव॒ दिव॑मा॒रुह्य॒ वि कृ॒त्या बा॑धते व॒शी ॥७॥

Ye sraktyam manim jana varmani krinvate
Surya iva divamaruhya vi kritya badhate vashi

5.8

स्रा॒क्त्येन॑ म॒णिन॒ ऋषि॑णेव मनी॒षिणा॑ ।
अजै॑षं॒ सर्वाः॒ पृत॑ना॒ वि मृ॒धो॑ हन्मि र॒क्षसः॑ ॥८॥

Sraktyena manina rishineva manishina
Ajaisham sarvah pritana vi mridho hanmi rakshasah

5.9

याः कृ॒त्या आ॑ङ्गिर॒सीर्याः कृ॒त्या आ॑सु॒रीर्याः ।
कृ॒त्याः स्व॒यंकृ॑ता॒ या उ॑ चा॒न्येभि॒राभृ॑ताः ।
उ॒भयी॒स्ताः परा॑ यन्तु परा॒वतो॑ नव॒तिं ना॒व्या॒३अति॑ ॥९॥

Yah kritya angirasiryah kritya asuriryah
Krityah svayankrita ya u chanyebhirabhritah
Ubhayistah para yantu paravato navatim navya3ati

5.10

अ॒स्मै म॒णिं वर्म॑ बध्नन्तु दे॒वा इन्द्रो॒ विष्णुः॑ सवि॒ता रु॒द्रो अ॒ग्निः ।
प्र॒जाप॑तिः परमे॒ष्ठी वि॒राड् वै॑श्वान॒र ऋष॑यश्च॒ सर्वे॑ ॥१०॥

Asmai manim varma badhnantu deva indro vishnuh savita rudro agnih
Prajapatih parameshthi virad vaishvanara rishayashcha sarve

5.11

उ॒त्त॒मो अ॒स्योष॑धीनामन॒ड्वान् जग॑तामिव व्या॒घ्रः श्वप॑दामिव ।
यमैच्छामावि॑दाम॒ तं प्र॑ति॒स्पाश॑न॒मन्ति॑तम् ॥११॥

Uttamo asyoshadhinamanadvan jagatamiva vyaghrah shvapadamiva
Yamaichchhamavidama tam pratispashanamantitam

5.12

स इद् व्या॒घ्रो भ॑व॒त्यथो॑ सिं॒हो अथो॒ वृषा॑ ।
अथो॑ सपत्न॒कर्श॑नो॒ यो बिभ॑र्ती॒मं म॒णिम् ॥१२॥

Sa id vyaghro bhavatyatho sinho atho vrisha
Atho sapatnakarshano yo bibhartimam manim

5.13

नैनं॑ घ्नन्त्यप्स॒रसो॒ न ग॑न्ध॒र्वा न मर्त्याः॑ ।
सर्वा॒ दिशो॒ वि रा॑जति॒ यो बिभ॑र्ती॒मं म॒णिम् ॥१३॥

Nainam ghnantyapsaraso na gandharva na martyah
Sarva disho vi rajati yo bibhartimam manim

5.14

क॒श्यप॒स्त्वाम॑सृजत क॒श्यप॑स्त्वा॒ समै॑रयत्।
अबि॑भ॒स्त्वेन्द्रो॒ मानु॑षे॒ बिभ्र॑त् संश्रेषि॒णेऽजयत्।
म॒णिं स॒हस्र॑वीर्यं॒ वर्म॑ दे॒वा अ॑कृण्वत ॥१४॥

Kashyapastvamasrijata kashyapastva samairayat
Abibhastvendro manushe bibhrat sanshreshinejayat
Manim sahasraviryam varma deva akrinvata

5.15

यस्त्वा॑ कृ॒त्याभि॒र्यस्त्वा॑ दी॒क्षाभि॑र्य॒ज्ञैर्यस्त्वा॒ जिघां॑सति ।
प्र॒त्यक् त्वमि॑न्द्र॒ तं ज॑हि॒ वज्रे॑ण श॒तप॑र्वणा ॥१५॥

Yastva krityabhiryastva dikshabhiryagyairyastva jighansati
Pratyak tvamindra tam jahi vajrena shataparvana

5.16

अ॒यमिद् वै प्र॑तीव॒र्त ओज॑स्वान् संज॒यो म॒णिः ।
प्र॒जां धनं॑ च रक्षतु परि॒पाणः॑ सुम॒ङ्गलः ॥१६॥

Ayamid vai prativarta ojasvan sanjayo manih
Prajam dhanam cha rakshatu paripanah sumangalah

5.17

अ॒स॒प॒त्नं नो॑ अध॒राद॑सप॒त्नं न॑ उत्त॒रात्।
इन्द्रा॑सप॒त्नं नः॑ प॒श्चाज्ज्योतिः॑ शूर पु॒रस्कृ॑धि ॥१७॥

Asapatnam no adharadasapatnam na uttarat
Indrasapatnam nah pashchajjyotih shura puraskridhi

5.18

वर्म॑ मे॒ द्यावा॑पृथि॒वी वर्माह॒र्वर्म॒ सूर्यः॑ ।
वर्म॑ म॒ इन्द्र॑श्चा॒ग्निश्च॒ वर्म॑ धा॒ता द॑धातु मे ॥१८॥

Varma me dyavaprithivi varmaharvarma suryah
Varma ma indrashchagnishcha varma dhata dadhatu me

5.19

ऐ॒न्द्रा॒ग्नं वर्म॑ बहु॒लं यदु॒ग्रं विश्वे॑ दे॒वा नाति॒ विध्य॑न्ति॒ सर्वे॑ ।
तन्मे॑ त॒न्वं त्रायतां स॒र्वतो॑ बृ॒हदायु॑ष्मां ज॒रद॑ष्टि॒र्यथासा॑नि ॥१९॥

Aindragnam varma bahulam yadugram vishve deva nati vidhyanti sarve
Tanme tanvam trayatam sarvato brihadayushmam jaradashtiryathasani

5.20

आ मा॑रुक्षद् देवम॒णिर्म॒ह्या अ॑रि॒ष्टता॑तये ।
इ॒मं मे॒थिम॑भि॒संवि॑शध्वं तनू॒पानं॑ त्रि॒वरू॑थ॒मोज॑से ॥२०॥

A marukshad devamanirmahya arishtatataye
Imam methimabhisanvishadhvam tanupanam trivaruthamojase

5.21

अ॒स्मिन्निन्द्रो॒ नि द॑धातु नृ॒म्णमि॒मं दे॑वासो अभि॒संवि॑शध्वम्।
दी॒र्घा॒यु॒त्वाय॑ श॒तशा॑रदा॒यायु॑ष्मान् ज॒रद॑ष्टि॒र्यथास॑त् ॥२१॥

Asminnindro ni dadhatu nrimnamimam devaso abhisanvishadhvam
Dirghayutvaya shatasharadayayushman jaradashtiryathasat

5.22

स्व॒स्ति॒दा वि॒शां पति॑र्वृत्र॒हा वि॑मृ॒धो व॒शी।
इन्द्रो॑ बध्नातु ते म॒णिं जि॑गी॒वाँ अप॑राजितः सोम॒पा अ॑भयङ्क॒रो वृषा॑ ।
स त्वा॑ रक्षतु स॒र्वतो॒ दिवा॒ नक्तं॑ च वि॒श्वतः॑ ॥२२॥

Svastida visham patirvritraha vimridho vashi
Indro badhnatu te manim jigivam aparajitah somapa abhayankaro vrisha
Sa tva rakshatu sarvato diva naktam cha vishvatah