Sukta 4

4.1

Shatrudamanam, 1-25 chatanah, indrasomau, jagati, 8-14, 16-17, 19, 22, 24 trishtup, 20, 23 bhurik, 25 anushtup

इन्द्रा॑सोमा॒ तप॑तं॒ रक्ष॑ उ॒ब्जतं॒ न्यऽर्पयतं वृषणा तमो॒वृधः॑ ।
परा॑ शृणीतम॒चितो॒ न्योऽषतं ह॒तं नु॒देथां॒ नि शि॑शीतम॒त्त्रिणः॑ ॥१॥

Indrasoma tapatam raksha ubjatam nyarpayatam vrishana tamovridhah
Para shrinitamachito nyoshatam hatam nudetham ni shishitamattrinah

4.2

इन्द्रा॑सोमा॒ सम॒घशं॑सम॒भ्य॑१घं तपु॑र्ययस्तु च॒रुर॑ग्नि॒माँ इ॑व ।
ब्र॒ह्म॒द्विषे॑ क्र॒व्यादे॑ घो॒रच॑क्षसे॒ द्वेषो॑ धत्तमनवा॒यं कि॑मी॒दिने॑ ॥२॥

Indrasoma samaghashansamabhya1gham tapuryayastu charuragnimam iva
Brahmadvishe kravyade ghorachakshase dvesho dhattamanavayam kimidine

4.3

इन्द्रा॑सोमा दु॒ष्कृतो॑ व॒व्रे अ॒न्तर॑नारम्भ॒णे तम॑सि॒ प्र वि॑ध्यतम्।
यतो॒ नैषां॒ पुन॒रेक॑श्च॒नोदय॒त् तद् वा॑मस्तु॒ सह॑से मन्यु॒मच्छवः॑ ॥३॥

Indrasoma dushkrito vavre antaranarambhane tamasi pra vidhyatam
Yato naisham punarekashchanodayat tad vamastu sahase manyumachchhavah

4.4

इन्द्रा॑सोमा व॒र्तय॑तं दि॒वो व॒धं सं पृ॑थि॒व्या अ॒घशं॑साय॒ तर्ह॑णम्।
उत् त॑क्षतं स्व॒र्यं१ पर्व॑तेभ्यो॒ येन॒ रक्षो॑ वावृधा॒नं नि॒जूर्व॑थः ॥४॥

Indrasoma vartayatam divo vadham sam prithivya aghashansaya tarhanam
Ut takshatam svaryan1 parvatebhyo yena raksho vavridhanam nijurvathah

4.5

इन्द्रा॑सोमा व॒र्तय॑तं दि॒वस्पर्य॑ग्नित॒प्तेभि॑र्यु॒वमश्म॑हन्मभिः ।
तपु॑र्वधेभिर॒जरे॑भिर॒त्त्रिणो॒ नि पर्शा॑ने विध्यतं॒ यन्तु॑ निस्व॒रम् ॥५॥

Indrasoma vartayatam divasparyagnitaptebhiryuvamashmahanmabhih
Tapurvadhebhirajarebhirattrino ni parshane vidhyatam yantu nisvaram

4.6

इन्द्रा॑सोमा॒ परि॑ वां भूतु वि॒श्वत॑ इ॒यं म॒तिः क॒क्ष्याश्वे॑व वा॒जिना॑ ।
यां वां॒ होत्रां॑ परिहि॒नोमि॑ मे॒धये॒मा ब्रह्मा॑णि नृ॒पती॑ इव जिन्वतम् ॥६॥

Indrasoma pari vam bhutu vishvata iyam matih kakshyashveva vajina
Yam vam hotram parihinomi medhayema brahmani nripati iva jinvatam

4.7

प्रति॑ स्मरेथां तु॒जय॑द्भि॒रेवै॑र्ह॒तं द्रु॒हो र॒क्षसो॑ भङ्गु॒राव॑तः ।
इन्द्रा॑सोमा दु॒ष्कृते॒ मा सु॒गं भू॒द् यो मा॑ क॒दा चि॑दभि॒दास॑ति द्रु॒हुः ॥७॥

Prati smaretham tujayadbhirevairhatam druho rakshaso bhanguravatah
Indrasoma dushkrite ma sugam bhud yo ma kada chidabhidasati druhuh

4.8

यो मा॒ पाके॑न॒ मन॑सा॒ चर॑न्तमभि॒चष्टे॒ अनृ॑तेभि॒र्वचो॑भिः ।
आप॑ इव का॒शिना॒ संगृ॑भीता॒ अस॑न्न॒स्त्वस॑तः इन्द्र व॒क्ता ॥८॥

Yo ma pakena manasa charantamabhichashte anritebhirvachobhih
Apa iva kashina sangribhita asannastvasatah indra vakta

4.9

ये पा॑कशं॒सं वि॒हर॑न्त॒ एवै॒र्ये वा॑ भ॒द्रं दू॒षय॑न्ति स्व॒धाभिः॑ ।
अह॑ये वा॒ तान् प्र॒ददा॑तु॒ सोम॒ आ वा॑ दधातु॒ निरृ॑तेरु॒पस्थे॑ ॥९॥

Ye pakashansam viharanta evairye va bhadram dushayanti svadhabhih
Ahaye va tan pradadatu soma a va dadhatu nirriterupasthe

4.10

यो नो॒ रसं॒ दिप्स॑ति पि॒त्वो अ॑ग्ने॒ अश्वा॑नां॒ गवां॒ यस्त॒नूना॑म्।
रि॒पु स्ते॒न स्ते॑य॒कृद् द॒भ्रमे॑तु॒ नि ष ही॑यतां त॒न्वा॒३ तना॑ च ॥१०॥

Yo no rasam dipsati pitvo agne ashvanam gavam yastanunam
Ripu stena steyakrid dabhrametu ni sha hiyatam tanva3 tana cha

4.11

प॒रः सो अ॑स्तु त॒न्वा॒३ तना॑ च ति॒स्रः पृ॑थि॒वीर॒धो अ॑स्तु॒ विश्वाः॑ ।
प्रति॑ शुष्यतु॒ यशो॑ अस्य देवा॒ यो मा॒ दिवा॒ दिप्स॑ति॒ यश्च॒ नक्त॑म् ॥११॥

Parah so astu tanva3 tana cha tisrah prithiviradho astu vishvah
Prati shushyatu yasho asya deva yo ma diva dipsati yashcha naktam

4.12

सु॒वि॒ज्ञा॒नं चि॑कि॒तुषे॒ जना॑य॒ सच्चास॑च्च॒ वच॑सी पस्पृधाते ।
तयो॒र्यत् स॒त्यं य॑त॒रदृजी॑य॒स्तदित् सोमो॑ऽवति॒ हन्त्यस॑त् ॥१२॥

Suvigyanam chikitushe janaya sachchasachcha vachasi paspridhate
Tayoryat satyam yataradrijiyastadit somovati hantyasat

4.13

न वा उ॒ सोमो॑ वृजि॒नं हि॑नोति॒ न क्ष॒त्रियं मिथु॒या धा॒रय॑न्तम्।
हन्ति॒ रक्षो॒ हन्त्यास॒द् वद॑न्तमु॒भाविन्द्र॑स्य॒ प्रसि॑तौ शयाते ॥१३॥

Na va u somo vrijinam hinoti na kshatriyam mithuya dharayantam
Hanti raksho hantyasad vadantamubhavindrasya prasitau shayate

4.14

यदि॑ वा॒हमनृ॑तदेवो॒ अस्मि॒ मोघं॑ वा दे॒वाँ अ॑प्यू॒हे अ॑ग्ने ।
किम॒स्मभ्यं॑ जातवेदो हृणीषे द्रोघ॒वाच॑स्ते निरृ॒थं स॑चन्ताम् ॥१४॥

Yadi vahamanritadevo asmi mogham va devam apyuhe agne
Kimasmabhyam jatavedo hrinishe droghavachaste nirritham sachantam

4.15

अ॒द्या मु॑रीय॒ यदि॑ यातु॒धानो॒ अस्मि॒ यदि॒ वायु॑स्त॒तप॒ पुरु॑षस्य ।
अ॒धा स वी॒रैर्द॒शभि॒र्वि यू॑या॒ यो मा॒ मोघं॒ यातु॑धा॒नेत्याह॑ ॥१५॥

Adya muriya yadi yatudhano asmi yadi vayustatapa purushasya
Adha sa virairdashabhirvi yuya yo ma mogham yatudhanetyaha

4.16

यो माया॑तुं॒ यातु॑धा॒नेत्याह॒ यो वा॑ र॒क्षाः शुचि॑र॒स्मीत्याह॑ ।
इन्द्र॒स्तं ह॑न्तु मह॒ता व॒धेन॒ विश्व॑स्य ज॒न्तोर॑ध॒मस्प॑दीष्ट ॥१६॥

Yo mayatum yatudhanetyaha yo va rakshah shuchirasmityaha
Indrastam hantu mahata vadhena vishvasya jantoradhamaspadishta

4.17

प्र या जिगा॑ति ख॒र्गले॑व॒ नक्त॒मप॑ द्रु॒हुस्त॒न्वं॑१गूह॑माना ।
व॒व्रम॑न॒न्तमव॒ सा प॑दीष्ट॒ ग्रावा॑णो घ्नन्तु र॒क्षस॑ उप॒ब्दैः ॥१७॥

Pra ya jigati khargaleva naktamapa druhustanvan1guhamana
Vavramanantamava sa padishta gravano ghnantu rakshasa upabdaih

4.18

वि ति॑ष्ठध्वं मरुतो वि॒क्ष्वि॒३छत॑ गृभा॒यत॑ र॒क्षसः॒ सं पि॑नष्टन।
वयो॒ ये भू॒त्वा प॒तय॑न्ति न॒क्तभि॒र्ये वा॒ रिपो॑ दधि॒रे दे॒वे अ॑ध्व॒रे ॥१८॥

Vi tishthadhvam maruto vikshvi3chhata gribhayata rakshasah sam pinashtana
Vayo ye bhutva patayanti naktabhirye va ripo dadhire deve adhvare

4.19

प्र व॑र्तय दि॒वोऽश्मा॑नमिन्द्र॒ सोम॑शितं मघव॒न्त्सं शि॑शाधि ।
प्रा॒क्तो अ॑पा॒क्तो॑अधरा॑दुदक्तो॑ऽभि॑जहि रक्ष॑सः प॑र्वतेन ॥१९॥

Pra vartaya divoshmanamindra somashitam maghavantsam shishadhi
Prakto apaktoadharadudaktobhijahi rakshasah parvatena

4.20

ए॒त उ॒ त्ये प॑तयन्ति॒ श्वया॑तव॒ इन्द्रं॑ दिप्सन्ति दि॒प्सवोऽदा॑भ्यम्।
शिशी॑ते श॒क्रः पिशु॑नेभ्यो व॒धं नु॒नं सृ॑जद॒शनिं॑ यातु॒मद्भ्यः॑ ॥२०॥

Eta u tye patayanti shvayatava indram dipsanti dipsavodabhyam
Shishite shakrah pishunebhyo vadham nunam srijadashanim yatumadbhyah

4.21

इन्द्रो॑ यातू॒नाम॑भवत् पराश॒रो ह॑वि॒र्मथी॑नाम॒भ्या॒३विवा॑सताम्।
अ॒भीदु॑ श॒क्रः प॑र॒शुर्यथा॒ वनं॒ पात्रे॑व भि॒न्दन्त्स॒त एतु र॒क्षसः॑ ॥२१॥

Indro yatunamabhavat parasharo havirmathinamabhya3vivasatam
Abhidu shakrah parashuryatha vanam patreva bhindantsata etu rakshasah

4.22

उलू॑कयातुं शुशु॒लूक॑यातुं ज॒हि श्वया॑तुमु॒त कोक॑यातुम्।
सु॒प॒र्णया॑तुमु॒त गृध्र॑यातुं दृ॒षदे॑व॒ प्र मृ॑ण॒ रक्ष॑ इन्द्र ॥२२॥

Ulukayatum shushulukayatum jahi shvayatumuta kokayatum
Suparnayatumuta gridhrayatum drishadeva pra mrina raksha indra

4.23

मा नो॒ रक्षो॑ अ॒भि न॑ड् यातु॒माव॒दपो॑च्छन्तु मिथु॒ना ये कि॑मी॒दिनः॑ ।
पृ॒थि॒वी नः॒ पार्थि॑वात् पा॒त्वंह॑सो॒ऽन्तरि॑क्षं दि॒व्यात् पा॑त्व॒स्मान् ॥२३॥

Ma no raksho abhi nad yatumavadapochchhantu mithuna ye kimidinah
Prithivi nah parthivat patvanhasontariksham divyat patvasman

4.24

इन्द्र॑ ज॒हि पुमां॑सं यातु॒धान॑मु॒त स्त्रियं॑ मा॒यया॒ शाश॑दानाम्।
विग्री॑वासो॒ मूर॑देवा ऋदन्तु॒ मा ते दृ॑श॒न्त्सूर्य॑मु॒च्चर॑न्तम् ॥२४॥

Indra jahi pumansam yatudhanamuta striyam mayaya shashadanam
Vigrivaso muradeva ridantu ma te drishantsuryamuchcharantam

4.25

प्रति॑ चक्ष्व॒ वि च॒क्ष्वेन्द्र॑श्च सोम जागृतम्।
रक्षो॑भ्यो व॒धम॑स्यतम॒शनिं॑ यातु॒मद्भ्यः॑ ॥२५॥

Prati chakshva vi chakshvendrashcha soma jagritam
Rakshobhyo vadhamasyatamashanim yatumadbhyah