Sukta 3

3.1

Shatrunashanam, 1-26 chatanah, agnih, trishtup, 7, 12, 14-15, 17, 21 bhurik, 25 panchapada brihatigarbha jagati 22-23 anushtup, 26 gayatri

र॒क्षो॒हणं॑ वा॒जिन॒मा जि॑घर्मि मि॒त्रं प्रथि॑ष्ठ॒मुप॑ यामि॒ शर्म॑ ।
शिशा॑नो अ॒ग्निः क्रतु॑भिः॒ समि॑द्धः॒ स नो॒ दिवा॒ स रि॒षः पा॑तु॒ नक्त॑म् ॥१॥

Rakshohanam vajinama jigharmi mitram prathishthamupa yami sharma
Shishano agnih kratubhih samiddhah sa no diva sa rishah patu naktam

3.2

अयो॑दंष्ट्रो अ॒र्चिषा॑ यातु॒धाना॒नुप॑ स्पृश जातवेदः॒ समि॑द्धः ।
आ जि॒ह्वया॒ मूर॑देवान् रभस्व क्र॒व्यादो॑ वृ॒ष्ट्वापि॑ धत्स्वा॒सन् ॥२॥

Ayodanshtro archisha yatudhananupa sprisha jatavedah samiddhah
A jihvaya muradevan rabhasva kravyado vrishtvapi dhatsvasan

3.3

उ॒भोभ॑यावि॒न्नुप॑ धेहि॒ दंष्ट्रौ॑ हिं॒स्रः शिशा॒नोऽव॑रं॒ परं॑ च ।
उ॒तान्तरि॑क्षे॒ परि॑ याह्यग्ने॒ जम्भैः॒ सं धे॑ह्य॒भि या॑तु॒धाना॑न् ॥३॥

Ubhobhayavinnupa dhehi danshtrau hinsrah shishanovaram param cha
Utantarikshe pari yahyagne jambhaih sam dhehyabhi yatudhanan

3.4

अग्ने॒ त्वचं॑ यातु॒धान॑स्य भिन्धि हिं॒स्राशनि॒र्हर॑सा हन्त्वेनम्।
प्र पर्वा॑णि जातवेदः शृणीहि क्र॒व्यात् क्र॑वि॒ष्णुर्वि चि॑नोत्वेनम् ॥४॥

Agne tvacham yatudhanasya bhindhi hinsrashanirharasa hantvenam
Pra parvani jatavedah shrinihi kravyat kravishnurvi chinotvenam

3.5

यत्रे॒दानीं॒ पश्य॑सि जातवेद॒स्तिष्ठ॑न्तमग्न उ॒त वा॒ चर॑न्तम्।
उ॒तान्तरि॑क्षे॒ पत॑न्तं यातु॒धानं॒ तमस्ता॑ विध्य॒ शर्वा॒ शिशा॑नः ॥५॥

Yatredanim pashyasi jatavedastishthantamagna uta va charantam
Utantarikshe patantam yatudhanam tamasta vidhya sharva shishanah

3.6

य॒ज्ञरिषूः॑ सं॒नम॑मानो अग्ने वा॒चा श॒ल्याँ अ॒शनि॑भिर्दिहा॒नः ।
ताभि॑र्विध्य॒ हृद॑ये यातु॒धाना॑न् प्रती॒चो बा॒हून् प्रति॑ भङ्ग्ध्येषाम् ॥६॥

Yagyarishuh sannamamano agne vacha shalyam ashanibhirdihanah
Tabhirvidhya hridaye yatudhanan praticho bahun prati bhangdhyesham

3.7

उ॒तार॑ब्धान्त्स्पृनुहि जातवेद उ॒तारे॑भा॒णाँ ऋ॒ष्टिभि॑र्यातु॒धाना॑न्।
अग्ने॒ पूर्वो॒ नि ज॑हि॒ शोशु॑चान आ॒मादः॒ क्ष्विङ्का॒स्तम॑द॒न्त्वेनीः॑ ॥७॥

Utarabdhantsprinuhi jataveda utarebhanam rishtibhiryatudhanan
Agne purvo ni jahi shoshuchana amadah kshvinkastamadantvenih

3.8

इ॒ह प्र ब्रू॑हि यत॒मः सो अ॑ग्ने यातु॒धानो॒ य इ॒दं कृ॒णोति॑ ।
तमा र॑भस्व स॒मिधा॑ यविष्ठ नृ॒चक्ष॑स॒श्चक्षु॑षे रन्धयैनम् ॥८॥

Iha pra bruhi yatamah so agne yatudhano ya idam krinoti
Tama rabhasva samidha yavishtha nrichakshasashchakshushe randhayainam

3.9

ती॒क्ष्णेना॑ग्ने॒ चक्षु॑षा रक्ष य॒ज्ञं प्राञ्चं॒ वसु॑भ्यः॒ प्र ण॑य प्रचेतः ।
हिं॒स्रं रक्षां॑स्य॒भि शोशु॑चानं॒ मा त्वा॑ दभन् यातु॒धाना॑ नृचक्षः ॥९॥

Tikshnenagne chakshusha raksha yagyam prancham vasubhyah pra naya prachetah
Hinsram rakshansyabhi shoshuchanam ma tva dabhan yatudhana nrichakshah

3.10

नृ॒चक्षा॒ रक्षः॒ परि॑ पश्य वि॒क्षु तस्य॒ त्रीणि॒ प्रति॑ शृणी॒ह्यग्रा॑ ।
तस्या॑ग्ने पृ॒ष्टीर्हर॑सा शृणीहि त्रे॒धा मूलं॑ यातु॒धान॑स्य वृश्च ॥१०॥

Nrichaksha rakshah pari pashya vikshu tasya trini prati shrinihyagra
Tasyagne prishtirharasa shrinihi tredha mulam yatudhanasya vrishcha

3.11

त्रिर्या॑तु॒धानः॒ प्रसि॑तिं त एत्वृ॒तं यो अ॑ग्ने॒ अनृ॑तेन॒ हन्ति॑ ।
तम॒र्चिषा॑ स्फू॒र्जय॑न् जातवेदः सम॒क्षमे॑नं गृण॒ते नि यु॑ङ्ग्धि ॥११॥

Triryatudhanah prasitim ta etvritam yo agne anritena hanti
Tamarchisha sphurjayan jatavedah samakshamenam grinate ni yungdhi

3.12

यद॑ग्ने अ॒द्य मि॑थु॒ना शपा॑तो॒ यद् वा॒चस्तृ॒ष्टं ज॒नय॑न्त रे॒भाः ।
म॒न्योर्मन॑सः शर॒व्या॒३जाय॑ते॒ या तया॑ विध्य॒ हृद॑ये यातु॒धाना॑न् ॥१२॥

Yadagne adya mithuna shapato yad vachastrishtam janayanta rebhah
Manyormanasah sharavya3jayate ya taya vidhya hridaye yatudhanan

3.13

परा॑ शृणीहि॒ तप॑सा यातु॒धाना॒न् परा॑ग्ने॒ रक्षो॒ हर॑सा शृणीहि ।
परा॒र्चिषा॒ मूर॑देवान्छृणीहि॒ परा॑सु॒तृपः॒ शोशु॑चतः शृणीहि ॥१३॥

Para shrinihi tapasa yatudhanan paragne raksho harasa shrinihi
Pararchisha muradevanchhrinihi parasutripah shoshuchatah shrinihi

3.14

परा॒द्य दे॒वा वृ॑जि॒नं शृ॑णन्तु प्र॒त्यगे॑नं श॒पथा॑ यन्तु सृ॒ष्टाः ।
वा॒चास्ते॑नं॒ शर॑व ऋच्छन्तु॒ मर्म॒न् विश्व॑स्यैतु॒ प्रसि॑तिं यातु॒धानः॑ ॥१४॥

Paradya deva vrijinam shrinantu pratyagenam shapatha yantu srishtah
Vachastenam sharava richchhantu marman vishvasyaitu prasitim yatudhanah

3.15

यः पौरु॑षेयेण क्र॒विषा॑ सम॒ङ्क्ते यो अश्व्ये॑न प॒शुना॑ यातु॒धानः॑ ।
यो अ॒घ्न्याया॒ भर॑ति क्षी॒रम॑ग्ने॒ तेषां॑ शी॒र्षाणि॒ हर॒सापि॑ वृश्च ॥१५॥

Yah paurusheyena kravisha samankte yo ashvyena pashuna yatudhanah
Yo aghnyaya bharati kshiramagne tesham shirshani harasapi vrishcha

3.16

वि॒षं गवां॑ यातु॒धाना॑ भरन्ता॒मा वृ॑श्चन्ता॒मदि॑तये दु॒रेवाः॑ ।
परै॑णान् दे॒वः स॑वि॒ता द॑दातु॒ परा॑ भा॒गमोष॑धीनां जयन्ताम् ॥१६॥

Visham gavam yatudhana bharantama vrishchantamaditaye durevah
Parainan devah savita dadatu para bhagamoshadhinam jayantam

3.17

सं॒व॒त्स॒रीणं॒ पय॑ उ॒स्रिया॑या॒स्तस्य॒ माशी॑द् यातु॒धानो॑ नृचक्षः ।
पी॒यूष॑मग्ने यत॒मस्तितृ॑प्सा॒त् तं प्र॒त्यञ्च॑म॒र्चिषा॑ विध्य॒ मर्म॑णि ॥१७॥

Sanvatsarinam paya usriyayastasya mashid yatudhano nrichakshah
Piyushamagne yatamastitripsat tam pratyanchamarchisha vidhya marmani

3.18

स॒नाद॑ग्ने मृणसि यातु॒धाना॒न् न त्वा॒ रक्षां॑सि॒ पृत॑नासु जिग्युः ।
स॒हमू॑रा॒ननु॑ दह क्र॒व्यादो॒ मा ते॑ हे॒त्या मु॑क्षत॒ दैव्या॑याः ॥१८॥

Sanadagne mrinasi yatudhanan na tva rakshansi pritanasu jigyuh
Sahamurananu daha kravyado ma te hetya mukshata daivyayah

3.19

त्वं नो॑ अग्ने अध॒रादु॑द॒क्तस्त्वं प॒श्चादु॒त र॑क्षा पु॒रस्ता॑त्।
प्रति॒ त्ये ते॑ अ॒जरा॑स॒स्तपि॑ष्ठा अ॒घशं॑सं॒ शोशु॑चतो दहन्तु ॥१९॥

Tvam no agne adharadudaktastvam pashchaduta raksha purastat
Prati tye te ajarasastapishtha aghashansam shoshuchato dahantu

3.20

प॒श्चात् पु॒रस्ता॑दध॒रादु॒तोत्त॒रात् क॒विः काव्ये॑न॒ परि॑ पाह्यग्ने ।
सखा॒ सखा॑यम॒जरो॑ जरि॒म्णे अग्ने॒ मर्ताँ॒ अम॑र्त्य॒स्त्वं नः॑ ॥२०॥

Pashchat purastadadharadutottarat kavih kavyena pari pahyagne
Sakha sakhayamajaro jarimne agne martam amartyastvam nah

3.21

तद॑ग्ने॒ चक्षुः॒ प्रति॑ धेहि रे॒भे श॑फा॒रुजो॒ येन॒ पश्य॑सि यातु॒धाना॑न्।
अ॒थ॒र्व॒वज्ज्योति॑षा॒ दैव्ये॑न स॒त्यं धूर्व॑न्तम॒चितं॒ न्योऽष ॥२१॥

Tadagne chakshuh prati dhehi rebhe shapharujo yena pashyasi yatudhanan
Atharvavajjyotisha daivyena satyam dhurvantamachitam nyosha

3.22

परि॑ त्वाग्ने॒ पुरं॑ व॒यं विप्रं॑ सहस्य धीमहि ।
धृ॒षद्व॑र्णं दि॒वेदि॑वे ह॒न्तारं॑ भङ्गु॒राव॑तः ॥२२॥

Pari tvagne puram vayam vipram sahasya dhimahi
Dhrishadvarnam divedive hantaram bhanguravatah

3.23

वि॒षेण॑ भङ्गु॒राव॑तः॒ प्रति॑ स्म र॒क्षसो॑ जहि ।
अग्ने॑ ति॒ग्मेन॑ शो॒चिषा॒ तपु॑रग्राभिर॒र्चिभिः॑ ॥२३॥

Vishena bhanguravatah prati sma rakshaso jahi
Agne tigmena shochisha tapuragrabhirarchibhih

3.24

वि ज्योति॑षा बृह॒ता भा॑त्य॒ग्निरा॒विर्विश्वा॑नि कृणुते महि॒त्वा।
प्रादे॑वीर्मा॒याः स॑हते दु॒रेवाः॒ शिशी॑ते॒ शृङ्गे॒ रक्षो॑भ्यो वि॒निक्ष्वे॑ ॥२४॥

Vi jyotisha brihata bhatyagniravirvishvani krinute mahitva
Pradevirmayah sahate durevah shishite shringe rakshobhyo vinikshve

3.25

ये ते॒ शृङ्गे॑ अ॒जरे॑ जातवेदस्ति॒ग्महे॑ती॒ ब्रह्म॑संशिते ।
ताभ्यां॑ दु॒र्हार्द॑मभि॒दास॑न्तं किमी॒दिनं॑ प्र॒त्यञ्च॑म॒र्चिषा॑ जातवेदो॒ वि नि॑क्ष्व ॥२५॥

Ye te shringe ajare jatavedastigmaheti brahmasanshite
Tabhyam durhardamabhidasantam kimidinam pratyanchamarchisha jatavedo vi nikshva

3.26

अ॒ग्नी रक्षां॑सि सेधति शु॒क्रशो॑चि॒रम॑र्त्यः ।
शुचिः॑ पाव॒क ईड्यः॑ ॥२६॥

Agni rakshansi sedhati shukrashochiramartyah
Shuchih pavaka idyah