Sukta 2

2.1

Dirghayuhpraptih, 1-28 brahma, ayuh, trishtup, 1-2, 7 bhurik, 3, 26 astarapanktih, 4 prastarapanktih, 6, 15 pathyapanktih, 8 purastajjyotishmati jagati, 9 panchapada jagati, 11 vishtarapanktih, 12, 22, 28 purastadbrihati, 14 tryavasana shat-pada jagati, 19 uparishtadbrihati, 21 satah pankatih 5, 10, 16-18, 20, 23-25, 27 anushtup (17 tripad)

आ र॑भस्वे॒माम॒मृत॑स्य॒ श्नुष्टि॒मच्छि॑द्यमाना ज॒रद॑ष्टिरस्तु ते ।
असुं॑ त॒ आयुः॒ पुन॒रा भ॑रामि॒ रज॒स्तमो॒ मोप॑ गा॒ मा प्र मे॑ष्ठाः ॥१॥

A rabhasvemamamritasya shnushtimachchhidyamana jaradashtirastu te
Asum ta ayuh punara bharami rajastamo mopa ga ma pra meshthah

2.2

जीव॑तां॒ ज्योति॑र॒भ्येह्य॒र्वाङा त्वा॑ हरामि श॒तशा॑रदाय ।
अ॒व॒मु॒ञ्चन् मृ॑त्युपा॒शानश॑स्तिं॒ द्राघी॑य॒ आयुः॑ प्रत॒रं ते॑ दधामि ॥२॥

Jivatam jyotirabhyehyarvanga tva harami shatasharadaya
Avamunchan mrityupashanashastim draghiya ayuh prataram te dadhami

2.3

वाता॑त् ते प्रा॒णम॑विदं॒ सूर्या॒च्चक्षु॑र॒हं तव॑ ।
यत् ते॒ मन॒स्त्वयि॒ तद् धा॑रयामि॒ सं वि॒त्स्वाङ्गै॒र्वद॑ जि॒ह्वयाल॑पन् ॥३॥

Vatat te pranamavidam suryachchakshuraham tava
Yat te manastvayi tad dharayami sam vitsvangairvada jihvayalapan

2.4

प्रा॒णेन॑ त्वा द्वि॒पदां॒ चतु॑ष्पदाम॒ग्निमि॑व जा॒तम॒भि सं ध॑मामि ।
नम॑स्ते मृत्यो॒ चक्षु॑षे॒ नमः॑ प्रा॒णाय॑ तेऽकरम् ॥४॥

Pranena tva dvipadam chatushpadamagnimiva jatamabhi sam dhamami
Namaste mrityo chakshushe namah pranaya tekaram

2.5

अ॒यं जी॑वतु॒ मा मृ॑ते॒मं समी॑रयामसि ।
कृ॒णोम्य॑स्मै भेष॒जं मृत्यो॒ मा पुरु॑षं वधीः ॥५॥

Ayam jivatu ma mritemam samirayamasi
Krinomyasmai bheshajam mrityo ma purusham vadhih

2.6

जी॒व॒लां न॑घारि॒षां जी॑व॒न्तीमोष॑धीम॒हम्।
त्रा॒य॒मा॒णां सह॑मानां॒ सह॑स्वतीमि॒ह हु॑वे॒ऽस्मा अ॑रि॒ष्टता॑तये ॥६॥

Jivalam nagharisham jivantimoshadhimaham
Trayamanam sahamanam sahasvatimiha huvesma arishtatataye

2.7

अधि॑ ब्रूहि॒ मा र॑भथाः सृ॒जेमं तवै॒व सन्त्सर्व॑हाया इ॒हास्तु॑ ।
भवा॑शर्वौ मृ॒डतं॒ शर्म॑ यच्छतमप॒सिध्य॑ दुरि॒तं ध॑त्त॒मायुः॑ ॥७॥

Adhi bruhi ma rabhathah srijemam tavaiva santsarvahaya ihastu
Bhavasharvau mridatam sharma yachchhatamapasidhya duritam dhattamayuh

2.8

अ॒स्मै मृ॑त्यो॒ अधि॑ ब्रूही॒मं द॑य॒स्वोदि॒तो॒३यमे॑तु ।
अरि॑ष्टः॒ सर्वा॑ङ्गः सु॒श्रुज्ज॒रसा॑ श॒तहा॑यन आ॒त्मना॒ भुज॑मश्नुताम् ॥८॥

Asmai mrityo adhi bruhimam dayasvodito3yametu
Arishtah sarvangah sushrujjarasa shatahayana atmana bhujamashnutam

2.9

दे॒वानां॑ हे॒तिः परि॑ त्वा वृणक्तु पा॒रया॑मि त्वा॒ रज॑स॒ उ॑त् त्वा॑ मृ॒त्योर॑पीपरम्।
आ॒राद॒ग्निं क्र॒व्यादं॑ नि॒रूहं॑ जी॒वात॑वे ते परि॒धिं द॑धामि ॥९॥

Devanam hetih pari tva vrinaktu parayami tva rajasa ut tva mrityorapiparam
Aradagnim kravyadam niruham jivatave te paridhim dadhami

2.10

यत् ते॑ नि॒यानं॑ रज॒सं मृत्यो॑ अनवध॒र्ष्यऽम्।
प॒थ इ॒मं तस्मा॒द् रक्ष॑न्तो॒ ब्रह्मा॑स्मै॒ वर्म॑ कृण्मसि ॥१०॥

Yat te niyanam rajasam mrityo anavadharshyam
Patha imam tasmad rakshanto brahmasmai varma krinmasi

2.11

कृ॒णोमि॑ ते प्राणापा॒नौ ज॒रां मृ॒त्युं दी॒र्घमायुः॑ स्व॒स्ति।
वै॒व॒स्व॒तेन॒ प्रहि॑तान् यमदू॒तांश्चर॒तोऽप॑ सेधामि॒ सर्वा॑न् ॥११॥

Krinomi te pranapanau jaram mrityum dirghamayuh svasti
Vaivasvatena prahitan yamadutanshcharatopa sedhami sarvan

2.12

आ॒रादरा॑तिं॒ निरृ॑तिं प॒रो ग्राहिं॑ क्र॒व्यादः॑ पिशा॒चान्।
रक्षो॒ यत् सर्वं॑ दुर्भू॒तं तत् तम॑ इ॒वाप॑ हन्मसि ॥१२॥

Aradaratim nirritim paro grahim kravyadah pishachan
Raksho yat sarvam durbhutam tat tama ivapa hanmasi

2.13

अ॒ग्नेष्टे॑ प्रा॒णम॒मृता॒दायु॑ष्मतो वन्वे जा॒तवे॑दसः ।
यथा॒ न रिष्या॑ अ॒मृतः॑ स॒जूरस॒स्तत् ते॑ कृणोमि॒ तदु॑ ते॒ समृ॑ध्यताम् ॥१३॥

Agneshte pranamamritadayushmato vanve jatavedasah
Yatha na rishya amritah sajurasastat te krinomi tadu te samridhyatam

2.14

शि॒वे ते॑ स्तां॒ द्यावा॑पृथि॒वी अ॑संता॒पे अ॑भि॒श्रियौ॑ ।
शं ते॒ सूर्य॒ आ त॑पतु॒ शं वातो॑ वातु ते हृ॒दे।
शि॒वा अ॒भि क्ष॑रन्तु॒ त्वापो॑ दि॒व्याः पय॑स्वतीः ॥१४॥

Shive te stam dyavaprithivi asantape abhishriyau
Sham te surya a tapatu sham vato vatu te hride
Shiva abhi ksharantu tvapo divyah payasvatih

2.15

शि॒वास्ते॑ स॒न्त्वोष॑धय॒ उत् त्वा॑हार्ष॒मध॑रस्या॒ उत्त॑रां पृथि॒वीम॒भि।
तत्र॑ त्वादि॒त्यौ र॑क्षतां सूर्याचन्द्र॒मसा॑वु॒भा ॥१५॥

Shivaste santvoshadhaya ut tvaharshamadharasya uttaram prithivimabhi
Tatra tvadityau rakshatam suryachandramasavubha

2.16

यत् ते॒ वासः॑ परि॒धानं॒ यां नी॒विं कृ॑णु॒षे त्वम्।
शि॒वं ते॑ त॒न्वे॒३तत् कृ॑ण्मः संस्प॒र्शेऽद्रू॑क्ष्णमस्तु ते ॥१६॥

Yat te vasah paridhanam yam nivim krinushe tvam
Shivam te tanve3tat krinmah sansparshedrukshnamastu te

2.17

यत् क्षु॒रेण॑ म॒र्चय॑ता सुते॒जसा॒ वप्ता॒ वप॑सि केशश्म॒श्रु।
शुभं॒ मुखं॒ मा न॒ आयुः॒ प्र मो॑षीः ॥१७॥

Yat kshurena marchayata sutejasa vapta vapasi keshashmashru
Shubham mukham ma na ayuh pra moshih

2.18

शि॒वौ ते॑ स्तां व्रीहिय॒वाव॑बला॒साव॑दोम॒धौ।
ए॒तौ यक्ष्मं॒ वि बा॑धेते ए॒तौ मु॑ञ्चतो॒ अंहसः ॥१८॥

Shivau te stam vrihiyavavabalasavadomadhau
Etau yakshmam vi badhete etau munchato anhasah

2.19

यद॒श्नासि॒ यत् पिब॑सि धा॒न्यंऽ कृ॒ष्याः पयः॑ ।
यदा॒द्यं॒१ यद॑ना॒द्यं सर्वं॑ ते॒ अन्न॑मवि॒षं कृ॑णोमि ॥१९॥

Yadashnasi yat pibasi dhanyan krishyah payah
Yadadyan1 yadanadyam sarvam te annamavisham krinomi

2.20

अह्ने॑ च त्वा॒ रात्र॑ये चो॒भाभ्यां॒ परि॑ दद्मसि ।
अ॒राये॑भ्यो जिघ॒त्सुभ्य॑ इ॒मं मे॒ परि॑ रक्षत ॥२०॥

Ahne cha tva ratraye chobhabhyam pari dadmasi
Arayebhyo jighatsubhya imam me pari rakshata

2.21

श॒तं ते॒ऽयुतं॑ हाय॒नान् द्वे यु॒गे त्रीणि॑ च॒त्वारि॑ कृण्मः ।
इ॒न्द्रा॒ग्नी विश्वे॑ दे॒वास्तेऽनु॑ मन्यन्ता॒महृ॑णीयमानाः ॥२१॥

Shatam teyutam hayanan dve yuge trini chatvari krinmah
Indragni vishve devastenu manyantamahriniyamanah

2.22

श॒रदे॑ त्वा हेम॒न्ताय॑ वस॒न्ताय॑ ग्री॒ष्माय॒ परि॑ दद्मसि ।
व॒र्षाणि॒ तुभ्यं॑ स्यो॒नानि॒ येषु॒ वर्ध॑न्त॒ ओष॑धीः ॥२२॥

Sharade tva hemantaya vasantaya grishmaya pari dadmasi
Varshani tubhyam syonani yeshu vardhanta oshadhih

2.23

मृ॒त्युरी॑शे द्वि॒पदां॑ मृ॒त्युरी॑शे॒ चतु॑ष्पदाम्।
तस्मा॒त् त्वां मृ॒त्योर्गोप॑ते॒रुद् भ॑रामि॒ स मा बि॑भेः ॥२३॥

Mrityurishe dvipadam mrityurishe chatushpadam
Tasmat tvam mrityorgopaterud bharami sa ma bibheh

2.24

सोऽरिष्ट॒ न म॑रिष्यसि॒ न म॑रिष्यसि॒ मा बि॑भेः ।
न वै तत्र॑ म्रियन्ते॒ नो य॑न्त्यध॒मं तमः॑ ॥२४॥

Sorishta na marishyasi na marishyasi ma bibheh
Na vai tatra mriyante no yantyadhamam tamah

2.25

सर्वो॒ वै तत्र॑ जीवति॒ गौरश्वः॒ पुरु॑षः प॒शुः ।
यत्रे॒दं ब्रह्म॑ क्रि॒यते॑ परि॒धिर्जीव॑नाय॒ कम् ॥२५॥

Sarvo vai tatra jivati gaurashvah purushah pashuh
Yatredam brahma kriyate paridhirjivanaya kam

2.26

परि॑ त्वा पातु समा॒नेभ्यो॑ऽभिचा॒रात् सब॑न्धुभ्यः ।
अम॑म्रिर्भवा॒मृतो॑ऽतिजी॒वो मा ते॑ हासिषु॒रस॑वः॒ शरी॑रम् ॥२६॥

Pari tva patu samanebhyobhicharat sabandhubhyah
Amamrirbhavamritotijivo ma te hasishurasavah shariram

2.27

ये मृ॒त्यव॒ एक॑शतं॒ या ना॒ष्ट्रा अ॑तिता॒र्याः ।
मु॒ञ्चन्तु॒ तस्मा॒त् त्वां दे॒वा अ॒ग्नेर्वै॑श्वान॒रा दधि॑ ॥२७॥

Ye mrityava ekashatam ya nashtra atitaryah
Munchantu tasmat tvam deva agnervaishvanara dadhi

2.28

अ॒ग्नेः शरी॑रमसि पारयि॒ष्णु र॑क्षो॒हासि॑ सपत्न॒हा।
अथो॑ अमीव॒चात॑नः पू॒तुद्रु॒र्नाम॑ भेष॒जम् ॥२८॥

Agneh shariramasi parayishnu rakshohasi sapatnaha
Atho amivachatanah putudrurnama bheshajam