সূক্ত 2

2.1

দীর্ঘায়ুঃপ্রাপ্তিঃ। ১-২৮ ব্রহ্মা। আয়ুঃ। ত্রিষ্টুপ্, ১-২,৭ ভুরিক্, ৩,২৬ আস্তারপঙ্ক্তিঃ, ৪ প্রস্তারপঙ্ক্তিঃ, ৬,১৫ পথ্যাপঙ্ক্তিঃ, ৮ পুরস্তাজ্জ্যোতিষ্মতী জগতী, ৯ পঞ্চপদা জগতী, ১১ বিষ্টারপঙ্ক্তিঃ, ১২,২২,২৮ পুরস্তাদ্বৃহতী, ১৪ ত্র্যবসানা ষট্-পদা জগতী, ১৯ উপরিষ্টাদ্বৃহতী, ২১ সতঃ পঙ্কতিঃ ৫,১০,১৬-১৮,২০,২৩-২৫,২৭ অনুষ্টুপ্ (১৭ ত্রিপাদ্)।

আ রভস্বেমামমৃতস্য শ্নুষ্টিমচ্ছিদ্যমানা জরদষ্টিরস্তু তে ।
অসুং ত আয়ুঃ পুনরা ভরামি রজস্তমো মোপ গা মা প্র মেষ্ঠাঃ ॥১॥

2.2

জীবতাং জ্যোতিরভ্যেহ্যর্বাঙা ত্বা হরামি শতশারদায় ।
অবমুঞ্চন্ মৃত্যুপাশানশস্তিং দ্রাঘীয় আয়ুঃ প্রতরং তে দধামি ॥২॥

2.3

বাতাৎ তে প্রাণমবিদং সূর্যাচ্চক্ষুরহং তব ।
যৎ তে মনস্ত্বয়ি তদ্ ধারয়ামি সং বিত্স্বাঙ্গৈর্বদ জিহ্বয়ালপন্ ॥৩॥

2.4

প্রাণেন ত্বা দ্বিপদাং চতুষ্পদামগ্নিমিব জাতমভি সং ধমামি ।
নমস্তে মৃত্যো চক্ষুষে নমঃ প্রাণায় তেঽকরম্ ॥৪॥

2.5

অয়ং জীবতু মা মৃতেমং সমীরয়ামসি ।
কৃণোম্যস্মৈ ভেষজং মৃত্যো মা পুরুষং বধীঃ ॥৫॥

2.6

জীবলাং নঘারিষাং জীবন্তীমোষধীমহম্।
ত্রায়মাণাং সহমানাং সহস্বতীমিহ হুবেঽস্মা অরিষ্টতাতয়ে ॥৬॥

2.7

অধি ব্রূহি মা রভথাঃ সৃজেমং তবৈব সন্ত্সর্বহায়া ইহাস্তু ।
ভবাশর্বৌ মৃডতং শর্ম যচ্ছতমপসিধ্য দুরিতং ধত্তমায়ুঃ ॥৭॥

2.8

অস্মৈ মৃত্যো অধি ব্রূহীমং দয়স্বোদিতো৩য়মেতু ।
অরিষ্টঃ সর্বাঙ্গঃ সুশ্রুজ্জরসা শতহায়ন আত্মনা ভুজমশ্নুতাম্ ॥৮॥

2.9

দেবানাং হেতিঃ পরি ত্বা বৃণক্তু পারয়ামি ত্বা রজস উৎ ত্বা মৃত্যোরপীপরম্।
আরাদগ্নিং ক্রব্যাদং নিরূহং জীবাতবে তে পরিধিং দধামি ॥৯॥

2.10

যৎ তে নিয়ানং রজসং মৃত্যো অনবধর্ষ্যঽম্।
পথ ইমং তস্মাদ্ রক্ষন্তো ব্রহ্মাস্মৈ বর্ম কৃণ্মসি ॥১০॥

2.11

কৃণোমি তে প্রাণাপানৌ জরাং মৃত্যুং দীর্ঘমায়ুঃ স্বস্তি।
বৈবস্বতেন প্রহিতান্ যমদূতাংশ্চরতোঽপ সেধামি সর্বান্ ॥১১॥

2.12

আরাদরাতিং নিরৃতিং পরো গ্রাহিং ক্রব্যাদঃ পিশাচান্।
রক্ষো যৎ সর্বং দুর্ভূতং তৎ তম ইবাপ হন্মসি ॥১২॥

2.13

অগ্নেষ্টে প্রাণমমৃতাদায়ুষ্মতো বন্বে জাতবেদসঃ ।
যথা ন রিষ্যা অমৃতঃ সজূরসস্তৎ তে কৃণোমি তদু তে সমৃধ্যতাম্ ॥১৩॥

2.14

শিবে তে স্তাং দ্যাবাপৃথিবী অসংতাপে অভিশ্রিয়ৌ ।
শং তে সূর্য আ তপতু শং বাতো বাতু তে হৃদে।
শিবা অভি ক্ষরন্তু ত্বাপো দিব্যাঃ পয়স্বতীঃ ॥১৪॥

2.15

শিবাস্তে সন্ত্বোষধয় উৎ ত্বাহার্ষমধরস্যা উত্তরাং পৃথিবীমভি।
তত্র ত্বাদিত্যৌ রক্ষতাং সূর্যাচন্দ্রমসাবুভা ॥১৫॥

2.16

যৎ তে বাসঃ পরিধানং যাং নীবিং কৃণুষে ত্বম্।
শিবং তে তন্বে৩তৎ কৃণ্মঃ সংস্পর্শেঽদ্রূক্ষ্ণমস্তু তে ॥১৬॥

2.17

যৎ ক্ষুরেণ মর্চয়তা সুতেজসা বপ্তা বপসি কেশশ্মশ্রু।
শুভং মুখং মা ন আয়ুঃ প্র মোষীঃ ॥১৭॥

2.18

শিবৌ তে স্তাং ব্রীহিয়বাববলাসাবদোমধৌ।
এতৌ যক্ষ্মং বি বাধেতে এতৌ মুঞ্চতো অংহসঃ ॥১৮॥

2.19

যদশ্নাসি যৎ পিবসি ধান্যংঽ কৃষ্যাঃ পয়ঃ ।
যদাদ্যং১ যদনাদ্যং সর্বং তে অন্নমবিষং কৃণোমি ॥১৯॥

2.20

অহ্নে চ ত্বা রাত্রয়ে চোভাভ্যাং পরি দদ্মসি ।
অরায়েভ্যো জিঘত্সুভ্য ইমং মে পরি রক্ষত ॥২০॥

2.21

শতং তেঽয়ুতং হায়নান্ দ্বে যুগে ত্রীণি চত্বারি কৃণ্মঃ ।
ইন্দ্রাগ্নী বিশ্বে দেবাস্তেঽনু মন্যন্তামহৃণীয়মানাঃ ॥২১॥

2.22

শরদে ত্বা হেমন্তায় বসন্তায় গ্রীষ্মায় পরি দদ্মসি ।
বর্ষাণি তুভ্যং স্যোনানি যেষু বর্ধন্ত ওষধীঃ ॥২২॥

2.23

মৃত্যুরীশে দ্বিপদাং মৃত্যুরীশে চতুষ্পদাম্।
তস্মাৎ ত্বাং মৃত্যোর্গোপতেরুদ্ ভরামি স মা বিভেঃ ॥২৩॥

2.24

সোঽরিষ্ট ন মরিষ্যসি ন মরিষ্যসি মা বিভেঃ ।
ন বৈ তত্র ম্রিয়ন্তে নো যন্ত্যধমং তমঃ ॥২৪॥

2.25

সর্বো বৈ তত্র জীবতি গৌরশ্বঃ পুরুষঃ পশুঃ ।
যত্রেদং ব্রহ্ম ক্রিয়তে পরিধির্জীবনায় কম্ ॥২৫॥

2.26

পরি ত্বা পাতু সমানেভ্যোঽভিচারাৎ সবন্ধুভ্যঃ ।
অমম্রির্ভবামৃতোঽতিজীবো মা তে হাসিষুরসবঃ শরীরম্ ॥২৬॥

2.27

যে মৃত্যব একশতং যা নাষ্ট্রা অতিতার্যাঃ ।
মুঞ্চন্তু তস্মাৎ ত্বাং দেবা অগ্নের্বৈশ্বানরা দধি ॥২৭॥

2.28

অগ্নেঃ শরীরমসি পারয়িষ্ণু রক্ষোহাসি সপত্নহা।
অথো অমীবচাতনঃ পূতুদ্রুর্নাম ভেষজম্ ॥২৮॥