সূক্ত 1

1.1

দীর্ঘায়ুঃপ্রাপ্তিঃ। ১-২১ ব্রহ্মা। আয়ুঃ। ত্রিষ্টুপ্, ১ পুরোবৃহতী ত্রিষ্টুপ্, ২-৩, ১৭-২১ অনুষ্টুপ্, ৪,৯,১৫-১৬ প্রস্তারপঙ্ক্তিঃ, ৭ ত্রিপদা বিরাড্ গায়ত্রী, ৮ বিরাট্ পথ্যাবৃহতী, ১২ ত্র্যবসানা পঞ্চপদা জগতী, ১৩ ত্রিপদা ভুরিঙ্মহাবৃহতী, ১৪ একাবসানা দ্বিপদা সাম্নী ভুরিগ্বৃহতী।

অন্তকায় মৃত্যবে নমঃ প্রাণা অপানা ইহ তে রমন্তাম্।
ইহায়মস্তু পুরুষঃ সহাসুনা সূর্যস্য ভাগে অমৃতস্য লোকে ॥১॥

1.2

উদেনং ভগো অগ্রভীদুদেনং সোমো অংশুমান্।
উদেনং মরুতো দেবা উদিন্দ্রাগ্নী স্বস্তয়ে ॥২॥

1.3

ইহ তেঽসুরিহ প্রাণ ইহায়ুরিহ তে মনঃ ।
উৎ ত্বা নিরৃত্যাঃ পাশেভ্যো দৈব্যা বাচা ভরামসি ॥৩॥

1.4

উৎ ক্রামাতঃ পুরুষ মাব পত্থা মৃত্যোঃ পড্বীষমবমুঞ্চমানঃ ।
মা চ্ছিত্থা অস্মাল্লোকাদগ্নেঃ সূর্যস্য সংদৃশঃ ॥৪॥

1.5

তুভ্যং বাতঃ পবতাং মাতরিশ্বা তুভ্যং বর্ষন্ত্বমৃতান্যাপঃ ।
সূর্যস্তে তন্বে৩শং তপাতি ত্বাং মৃত্যুর্দয়তাং মা প্র মেষ্ঠাঃ ॥৫॥

1.6

উদ্যানং তে পুরুষ নাবয়ানং জীবাতুং তে দক্ষতাতিং কৃণোমি ।
আ হি রোহেমমমৃতং সুখং রথমথ জির্বির্বিদথমা বদাসি ॥৬॥

1.7

মা তে মনস্তত্র গান্মা তিরো ভূন্মা জীবেভ্যঃ প্র মদো মানু গাঃ পিতৄন্।
বিশ্বে দেবা অভি রক্ষন্তু ত্বেহ ॥৭॥

1.8

মা গতানামা দীধীথা যে নয়ন্তি পরাবতম্।
আ রোহ তমসো জ্যোতিরেহ্যা তে হস্তৌ রভামহে ॥৮॥

1.9

শ্যামশ্চ ত্বা মা শবলশ্চ প্রেষিতৌ যমস্য যৌ পথিরক্ষী শ্বানৌ ।
অর্বাঙেহি মা বি দীধ্যো মাত্র তিষ্ঠঃ পরাঙ্মনাঃ ॥৯॥

1.10

মৈতং পন্থামনু গা ভীম এষ যেন পূর্বং নেয়থ তং ব্রবীমি ।
তম এতৎ পুরুষ মা প্র পত্থা ভয়ং পরস্তাদভয়ং তে অর্বাক্ ॥১০॥

1.11

রক্ষন্তু ত্বাগ্নয়ো যে অপ্স্ব১ন্তা রক্ষতু ত্বা মনুষ্যা৩ যমিন্ধতে ।
বৈশ্বানরো রক্ষতু জাতবেদা দিব্যস্ত্বা মা প্র ধাগ্ বিদ্যুতা সহ ॥১১॥

1.12

মা ত্বা ক্রব্যাদভি মংস্তারাৎ সংকসুকাচ্চর।
রক্ষতু ত্বা দ্যৌ রক্ষতু পৃথিবী সূর্যশ্চ ত্বা রক্ষতাং চন্দ্রমাশ্চ ।
অন্তরিক্ষং রক্ষতু দেবহেত্যাঃ ॥১২॥

1.13

বোধশ্চ ত্বা প্রতিবোধশ্চ রক্ষতামস্বপ্নশ্চ ত্বানবদ্রাণশ্চ রক্ষতাম্।
গোপায়ংশ্চ ত্বা জাগৃবিশ্চ রক্ষতাম্ ॥১৩॥

1.14

তে ত্বা রক্ষন্তু তে ত্বা গোপায়ন্তু তেভ্যো নমস্তেভ্যঃ স্বাহা ॥১৪॥

1.15

জীবেভ্যস্ত্বা সমুদ্রে বায়ুরিন্দ্রো ধাতা দধাতু সবিতা ত্রায়মাণঃ ।
মা ত্বা প্রাণো বলং হাসীদসুং তেঽনু হ্বয়ামসি ॥১৫॥

1.16

মা ত্বা জম্ভঃ সংহনুর্মা তমো বিদন্মা জিহ্বা বর্হিঃ প্রময়ুঃ কথা স্যাঃ ।
উৎ ত্বাদিত্যা বসবো ভরন্তূদিন্দ্রাগ্নী স্বস্তয়ে ॥১৬॥

1.17

উৎ ত্বা দ্যৌরুৎ পৃথিব্যুৎ প্রজাপতিরগ্রভীৎ।
উৎ ত্বা মৃত্যোরোষধয়ঃ সোমরাজ্ঞীরপীপরন্ ॥১৭॥

1.18

অয়ং দেবা ইহৈবাস্ত্বয়ং মামুত্র গাদিতঃ ।
ইমং সহস্রবীর্যেণ মৃত্যোরুৎ পারয়ামসি ॥১৮॥

1.19

উৎ ত্বা মৃত্যোরপীপরং সং ধমন্তু বয়োধসঃ ।
মা ত্বা ব্যস্তকেশ্যো৩মা ত্বাঘরুদো রুদন্ ॥১৯॥

1.20

আহার্ষমবিদং ত্বা পুনরাগাঃ পুনর্ণবঃ ।
সর্বাঙ্গ সর্বং তে চক্ষুঃ সর্বমায়ুশ্চ তে ঽবিদম্ ॥২০॥

1.21

ব্যঽবাৎ তে জ্যোতিরভূদপ ত্বত্তমো অক্রমীৎ।
অপ ত্বন্মৃত্যুং নিরৃতিমপ যক্ষ্মং নি দধ্মসি ॥২১॥