সূক্ত 3

3.1

শত্রুনাশনম্। ১-২৬ চাতনঃ। অগ্নিঃ। ত্রিষ্টুপ্, ৭,১২,১৪-১৫,১৭,২১ ভুরিক্, ২৫ পঞ্চপদা বৃহতীগর্ভা জগতী ২২-২৩ অনুষ্টুপ্, ২৬ গায়ত্রী।

রক্ষোহণং বাজিনমা জিঘর্মি মিত্রং প্রথিষ্ঠমুপ যামি শর্ম ।
শিশানো অগ্নিঃ ক্রতুভিঃ সমিদ্ধঃ স নো দিবা স রিষঃ পাতু নক্তম্ ॥১॥

3.2

অয়োদংষ্ট্রো অর্চিষা যাতুধানানুপ স্পৃশ জাতবেদঃ সমিদ্ধঃ ।
আ জিহ্বয়া মূরদেবান্ রভস্ব ক্রব্যাদো বৃষ্ট্বাপি ধত্স্বাসন্ ॥২॥

3.3

উভোভয়াবিন্নুপ ধেহি দংষ্ট্রৌ হিংস্রঃ শিশানোঽবরং পরং চ ।
উতান্তরিক্ষে পরি যাহ্যগ্নে জম্ভৈঃ সং ধেহ্যভি যাতুধানান্ ॥৩॥

3.4

অগ্নে ত্বচং যাতুধানস্য ভিন্ধি হিংস্রাশনির্হরসা হন্ত্বেনম্।
প্র পর্বাণি জাতবেদঃ শৃণীহি ক্রব্যাৎ ক্রবিষ্ণুর্বি চিনোত্বেনম্ ॥৪॥

3.5

যত্রেদানীং পশ্যসি জাতবেদস্তিষ্ঠন্তমগ্ন উত বা চরন্তম্।
উতান্তরিক্ষে পতন্তং যাতুধানং তমস্তা বিধ্য শর্বা শিশানঃ ॥৫॥

3.6

যজ্ঞরিষূঃ সংনমমানো অগ্নে বাচা শল্যাঁ অশনিভির্দিহানঃ ।
তাভির্বিধ্য হৃদয়ে যাতুধানান্ প্রতীচো বাহূন্ প্রতি ভঙ্গ্ধ্যেষাম্ ॥৬॥

3.7

উতারব্ধান্ত্স্পৃনুহি জাতবেদ উতারেভাণাঁ ঋষ্টিভির্যাতুধানান্।
অগ্নে পূর্বো নি জহি শোশুচান আমাদঃ ক্ষ্বিঙ্কাস্তমদন্ত্বেনীঃ ॥৭॥

3.8

ইহ প্র ব্রূহি যতমঃ সো অগ্নে যাতুধানো য ইদং কৃণোতি ।
তমা রভস্ব সমিধা যবিষ্ঠ নৃচক্ষসশ্চক্ষুষে রন্ধয়ৈনম্ ॥৮॥

3.9

তীক্ষ্ণেনাগ্নে চক্ষুষা রক্ষ যজ্ঞং প্রাঞ্চং বসুভ্যঃ প্র ণয় প্রচেতঃ ।
হিংস্রং রক্ষাংস্যভি শোশুচানং মা ত্বা দভন্ যাতুধানা নৃচক্ষঃ ॥৯॥

3.10

নৃচক্ষা রক্ষঃ পরি পশ্য বিক্ষু তস্য ত্রীণি প্রতি শৃণীহ্যগ্রা ।
তস্যাগ্নে পৃষ্টীর্হরসা শৃণীহি ত্রেধা মূলং যাতুধানস্য বৃশ্চ ॥১০॥

3.11

ত্রির্যাতুধানঃ প্রসিতিং ত এত্বৃতং যো অগ্নে অনৃতেন হন্তি ।
তমর্চিষা স্ফূর্জয়ন্ জাতবেদঃ সমক্ষমেনং গৃণতে নি যুঙ্গ্ধি ॥১১॥

3.12

যদগ্নে অদ্য মিথুনা শপাতো যদ্ বাচস্তৃষ্টং জনয়ন্ত রেভাঃ ।
মন্যোর্মনসঃ শরব্যা৩জায়তে যা তয়া বিধ্য হৃদয়ে যাতুধানান্ ॥১২॥

3.13

পরা শৃণীহি তপসা যাতুধানান্ পরাগ্নে রক্ষো হরসা শৃণীহি ।
পরার্চিষা মূরদেবান্ছৃণীহি পরাসুতৃপঃ শোশুচতঃ শৃণীহি ॥১৩॥

3.14

পরাদ্য দেবা বৃজিনং শৃণন্তু প্রত্যগেনং শপথা যন্তু সৃষ্টাঃ ।
বাচাস্তেনং শরব ঋচ্ছন্তু মর্মন্ বিশ্বস্যৈতু প্রসিতিং যাতুধানঃ ॥১৪॥

3.15

যঃ পৌরুষেয়েণ ক্রবিষা সমঙ্ক্তে যো অশ্ব্যেন পশুনা যাতুধানঃ ।
যো অঘ্ন্যায়া ভরতি ক্ষীরমগ্নে তেষাং শীর্ষাণি হরসাপি বৃশ্চ ॥১৫॥

3.16

বিষং গবাং যাতুধানা ভরন্তামা বৃশ্চন্তামদিতয়ে দুরেবাঃ ।
পরৈণান্ দেবঃ সবিতা দদাতু পরা ভাগমোষধীনাং জয়ন্তাম্ ॥১৬॥

3.17

সংবত্সরীণং পয় উস্রিয়ায়াস্তস্য মাশীদ্ যাতুধানো নৃচক্ষঃ ।
পীয়ূষমগ্নে যতমস্তিতৃপ্সাৎ তং প্রত্যঞ্চমর্চিষা বিধ্য মর্মণি ॥১৭॥

3.18

সনাদগ্নে মৃণসি যাতুধানান্ ন ত্বা রক্ষাংসি পৃতনাসু জিগ্যুঃ ।
সহমূরাননু দহ ক্রব্যাদো মা তে হেত্যা মুক্ষত দৈব্যায়াঃ ॥১৮॥

3.19

ত্বং নো অগ্নে অধরাদুদক্তস্ত্বং পশ্চাদুত রক্ষা পুরস্তাৎ।
প্রতি ত্যে তে অজরাসস্তপিষ্ঠা অঘশংসং শোশুচতো দহন্তু ॥১৯॥

3.20

পশ্চাৎ পুরস্তাদধরাদুতোত্তরাৎ কবিঃ কাব্যেন পরি পাহ্যগ্নে ।
সখা সখায়মজরো জরিম্ণে অগ্নে মর্তাঁ অমর্ত্যস্ত্বং নঃ ॥২০॥

3.21

তদগ্নে চক্ষুঃ প্রতি ধেহি রেভে শফারুজো যেন পশ্যসি যাতুধানান্।
অথর্ববজ্জ্যোতিষা দৈব্যেন সত্যং ধূর্বন্তমচিতং ন্যোঽষ ॥২১॥

3.22

পরি ত্বাগ্নে পুরং বয়ং বিপ্রং সহস্য ধীমহি ।
ধৃষদ্বর্ণং দিবেদিবে হন্তারং ভঙ্গুরাবতঃ ॥২২॥

3.23

বিষেণ ভঙ্গুরাবতঃ প্রতি স্ম রক্ষসো জহি ।
অগ্নে তিগ্মেন শোচিষা তপুরগ্রাভিরর্চিভিঃ ॥২৩॥

3.24

বি জ্যোতিষা বৃহতা ভাত্যগ্নিরাবির্বিশ্বানি কৃণুতে মহিত্বা।
প্রাদেবীর্মায়াঃ সহতে দুরেবাঃ শিশীতে শৃঙ্গে রক্ষোভ্যো বিনিক্ষ্বে ॥২৪॥

3.25

যে তে শৃঙ্গে অজরে জাতবেদস্তিগ্মহেতী ব্রহ্মসংশিতে ।
তাভ্যাং দুর্হার্দমভিদাসন্তং কিমীদিনং প্রত্যঞ্চমর্চিষা জাতবেদো বি নিক্ষ্ব ॥২৫॥

3.26

অগ্নী রক্ষাংসি সেধতি শুক্রশোচিরমর্ত্যঃ ।
শুচিঃ পাবক ঈড্যঃ ॥২৬॥