সূক্ত 5

5.1

প্রতিসরো মণিঃ। ১-২২ শুক্রঃ। কৃত্যাদূষণং, মন্ত্রোক্তদেবতাঃ। অনুষ্টুপ্, ১,৬ উপরিষ্টাদ্বৃহতী, ২ ত্রিপদা বিরাড্ গায়ত্রী, ৩ চতুষ্পদা ভুরিগ্জগতী, ৫ ভুরিক্সংস্তারপঙ্ক্তিঃ, ৭-৮ ককুম্মতী, ৯ পুরস্কৃতির্জগতী, ১০ ত্রিষ্টুপ্, ১১ পথ্যাপঙ্ক্তিঃ, ১৪ ত্র্যবসানা ষট্-পদা জগতী, ১৫ পুরস্তাদ্বৃহতী, ১৯ জগতীগর্ভা ত্রিষ্টুপ্, ২০ বিরাড্গর্ভা প্রস্তারপঙ্ক্তিঃ, ২১ বিরাড্ ত্রিষ্টুপ্, ২২ ত্র্যবসানা সপ্তপদা বিরাড্গর্ভা ভুরিক্শক্বরী।

অয়ং প্রতিসরো মণির্বীরো বীরায় বধ্যতে ।
বীর্যঽবান্ত্সপত্নহা শূরবীরঃ পরিপাণঃ সুমঙ্গলঃ ॥১॥

5.2

অয়ং মণিঃ সপত্নহা সুবীরঃ সহস্বান্ বাজী সহমান উগ্রঃ ।
প্রত্যক্ কৃত্যা দূষয়ন্নেতি বীরঃ ॥২॥

5.3

অনেনেন্দ্রো মণিনা বৃত্রমহন্ননেনাসুরান্ পরাভাবয়ন্মনীষী।
অনেনাজয়দ্ দ্যাবাপৃথিবী উভে ইমে অনেনাজয়ৎ প্রদিশশ্চতস্রঃ ॥৩॥

5.4

অয়ং স্রাক্ত্যো মণিঃ প্রতীবর্তঃ প্রতিসরঃ ।
ওজস্বান্ বিমৃধো বশী সো অস্মান্ পাতু সর্বতঃ ॥৪॥

5.5

তদগ্নিরাহ তদু সোম আহ বৃহস্পতিঃ সবিতা তদিন্দ্রঃ ।
তে মে দেবাঃ পুরোহিতাঃ প্রতীচীঃ কৃত্যাঃ প্রতিসরৈরজন্তু ॥৫॥

5.6

অন্তর্দধে দ্যাবাপৃথিবী উতাহরুত সূর্যম্।
তে মে দেবাঃ পুরোহিতাঃ প্রতীচীঃ কৃত্যাঃ প্রতিসরৈরজন্তু ॥৬॥

5.7

যে স্রাক্ত্যং মণিং জনা বর্মাণি কৃণ্বতে ।
সূর্য ইব দিবমারুহ্য বি কৃত্যা বাধতে বশী ॥৭॥

5.8

স্রাক্ত্যেন মণিন ঋষিণেব মনীষিণা ।
অজৈষং সর্বাঃ পৃতনা বি মৃধো হন্মি রক্ষসঃ ॥৮॥

5.9

যাঃ কৃত্যা আঙ্গিরসীর্যাঃ কৃত্যা আসুরীর্যাঃ ।
কৃত্যাঃ স্বয়ংকৃতা যা উ চান্যেভিরাভৃতাঃ ।
উভয়ীস্তাঃ পরা যন্তু পরাবতো নবতিং নাব্যা৩অতি ॥৯॥

5.10

অস্মৈ মণিং বর্ম বধ্নন্তু দেবা ইন্দ্রো বিষ্ণুঃ সবিতা রুদ্রো অগ্নিঃ ।
প্রজাপতিঃ পরমেষ্ঠী বিরাড্ বৈশ্বানর ঋষয়শ্চ সর্বে ॥১০॥

5.11

উত্তমো অস্যোষধীনামনড্বান্ জগতামিব ব্যাঘ্রঃ শ্বপদামিব ।
যমৈচ্ছামাবিদাম তং প্রতিস্পাশনমন্তিতম্ ॥১১॥

5.12

স ইদ্ ব্যাঘ্রো ভবত্যথো সিংহো অথো বৃষা ।
অথো সপত্নকর্শনো যো বিভর্তীমং মণিম্ ॥১২॥

5.13

নৈনং ঘ্নন্ত্যপ্সরসো ন গন্ধর্বা ন মর্ত্যাঃ ।
সর্বা দিশো বি রাজতি যো বিভর্তীমং মণিম্ ॥১৩॥

5.14

কশ্যপস্ত্বামসৃজত কশ্যপস্ত্বা সমৈরয়ৎ।
অবিভস্ত্বেন্দ্রো মানুষে বিভ্রৎ সংশ্রেষিণেঽজয়ৎ।
মণিং সহস্রবীর্যং বর্ম দেবা অকৃণ্বত ॥১৪॥

5.15

যস্ত্বা কৃত্যাভির্যস্ত্বা দীক্ষাভির্যজ্ঞৈর্যস্ত্বা জিঘাংসতি ।
প্রত্যক্ ত্বমিন্দ্র তং জহি বজ্রেণ শতপর্বণা ॥১৫॥

5.16

অয়মিদ্ বৈ প্রতীবর্ত ওজস্বান্ সংজয়ো মণিঃ ।
প্রজাং ধনং চ রক্ষতু পরিপাণঃ সুমঙ্গলঃ ॥১৬॥

5.17

অসপত্নং নো অধরাদসপত্নং ন উত্তরাৎ।
ইন্দ্রাসপত্নং নঃ পশ্চাজ্জ্যোতিঃ শূর পুরস্কৃধি ॥১৭॥

5.18

বর্ম মে দ্যাবাপৃথিবী বর্মাহর্বর্ম সূর্যঃ ।
বর্ম ম ইন্দ্রশ্চাগ্নিশ্চ বর্ম ধাতা দধাতু মে ॥১৮॥

5.19

ঐন্দ্রাগ্নং বর্ম বহুলং যদুগ্রং বিশ্বে দেবা নাতি বিধ্যন্তি সর্বে ।
তন্মে তন্বং ত্রায়তাং সর্বতো বৃহদায়ুষ্মাং জরদষ্টির্যথাসানি ॥১৯॥

5.20

আ মারুক্ষদ্ দেবমণির্মহ্যা অরিষ্টতাতয়ে ।
ইমং মেথিমভিসংবিশধ্বং তনূপানং ত্রিবরূথমোজসে ॥২০॥

5.21

অস্মিন্নিন্দ্রো নি দধাতু নৃম্ণমিমং দেবাসো অভিসংবিশধ্বম্।
দীর্ঘায়ুত্বায় শতশারদায়ায়ুষ্মান্ জরদষ্টির্যথাসৎ ॥২১॥

5.22

স্বস্তিদা বিশাং পতির্বৃত্রহা বিমৃধো বশী।
ইন্দ্রো বধ্নাতু তে মণিং জিগীবাঁ অপরাজিতঃ সোমপা অভয়ঙ্করো বৃষা ।
স ত্বা রক্ষতু সর্বতো দিবা নক্তং চ বিশ্বতঃ ॥২২॥