সূক্ত 7

7.1

অরাতিনাশনম্। ১-১০ অথর্বা। বহুদৈবত্যম্, ১-৩, ৬-১০ অরাতয়ঃ, ৪-৫ সরস্বতী। অনুষ্টুপ্, ১ বিরাড্গর্ভা প্রস্তারপঙ্ক্তিঃ, ৪ পথ্যাবৃহতী, ৬ প্রস্তারপঙ্ক্তিঃ।

আ নো ভর মা পরি ষ্ঠা অরাতে মা নো রক্ষীর্দক্ষিণাং নীয়মানাম্।
নমো বীর্ত্সায়া অসমৃদ্ধয়ে নমো অস্ত্বরাতয়ে ॥১॥

যমরাতে পুরোধত্সে পুরুষং পরিরাপিণম্।
নমস্তে তস্মৈ কৃণ্মো মা বনিং ব্যথয়ীর্মম ॥২॥

প্র ণো বনির্দেবকৃতা দিবা নক্তং চ কল্পতাম্।
অরাতিমনুপ্রেমো বয়ং নমো অস্ত্বরাতয়ে ॥৩॥

সরস্বতীমনুমতিং ভগং যন্তো হবামহে ।
বাচং জুষ্টাং মধুমতীমবাদিষং দেবানাং দেবহূতিষু ॥৪॥

যং যাচাম্যহং বাচা সরস্বত্যা মনোয়ুজা ।
শ্রদ্ধা তমদ্য বিন্দতু দত্তা সোমেন বভ্রুণা ॥৫॥

মা বনিং মা বাচং নো বীর্ত্সীরুভাবিন্দ্রাগ্নী আ ভরতাং নো বসূনি ।
সর্বে নো অদ্য দিত্সন্তোঽরাতিং প্রতি হর্যত ॥৬॥

পরোঽপেহ্যসমৃদ্ধে বি তে হেতিং নয়ামসি ।
বেদ ত্বাহং নিমীবন্তীং নিতুদন্তীমরাতে ॥৭॥

উত নগ্না বোভুবতী স্বপ্নয়া সচসে জনম্।
অরাতে চিত্তং বীর্ত্সন্ত্যাকূতিং পুরুষস্য চ ॥৮॥

যা মহতী মহোন্মানা বিশ্বা আশা ব্যানশে।
তস্যৈ হিরণ্যকেশ্যৈ নিরৃত্যা অকরং নমঃ ॥৯॥

হিরণ্যবর্ণা সুভগা হিরণ্যকশিপুর্মহী।
তস্যৈ হিরণ্যদ্রাপয়েঽরাত্যা অকরং নমঃ ॥১০॥