সূক্ত 8

8.1

শত্রুনাশনম্। ১-৯ অথর্বা। নানাদৈবত্যং, ১,২ অগ্নিঃ, ৩ বিশ্বে দেবাঃ, ৪-৯ ইন্দ্রঃ। অনুষ্টুপ্, ২ ত্র্যবসানা ষট্-পদা জগতী, ৩-৪ ভুরিক্পথ্যাপঙ্ক্তিঃ, ৬ আস্তারপঙ্ক্তিঃ, ৭ দ্ব্যুষ্ণিগ্গর্ভা পথ্যাপঙ্ক্তিঃ, ৯ ত্র্যবসানা ষট্-পদা যুষ্ণিগ্গর্ভা জগতী।

বৈকঙ্কতেনেধ্মেন দেবেভ্য আজ্যং বহ ।
অগ্নে তাঁ ইহ মাদয় সর্ব আ যন্তু মে হবম্ ॥১॥

8.2

ইন্দ্রা যাহি মে হবমিদং করিষ্যামি তচ্ছৃণু ।
ইম ঐন্দ্রা অতিসরা আকূতিং সং নমন্তু মে ।
তেভিঃ শকেম বীর্যং১ জাতবেদস্তনূবশিন্ ॥২॥

8.3

যদসাবমুতো দেবা অদেবঃ সংশ্চিকীর্ষতি ।
মা তস্যাগ্নির্হব্যং বাক্ষীদ্ধবং দেবা অস্য মোপ গুর্মমৈব হবমেতন ॥৩॥

8.4

অতি ধাবতাতিসরা ইন্দ্রস্য বচসা হত ।
অবিং বৃক ইব মথ্নীত স বো জীবন্মা মোচি প্রাণমস্যাপি নহ্যত ॥৪॥

8.5

যমমী পুরোদধিরে ব্রহ্মাণমপভূতয়ে ।
ইন্দ্র স তে অধস্পদং তং প্রত্যস্যামি মৃত্যবে ॥৫॥

8.6

যদি প্রেয়ুর্দেবপুরা ব্রহ্ম বর্মাণি চক্রিরে।
তনূপানং পরিপাণং কৃণ্বানা যদুপোচিরে সর্বং তদরসং কৃধি ॥৬॥

8.7

যানসাবতিসরাংশ্চকার কৃণবচ্চ যান্।
ত্বং তানিন্দ্র বৃত্রহন্ প্রতীচঃ পুনরা কৃধি যথামুং তৃণহাং জনম্ ॥৭॥

8.8

যথেন্দ্র উদ্বাচনং লব্ধ্বা চক্রে অধস্পদম্।
কৃণ্বে৩ঽহমধরাংস্তথামূঞ্ছশ্বতীভ্যঃ সমাভ্যঃ ॥৮॥

8.9

অত্রৈনানিন্দ্র বৃত্রহন্নুগ্রো মর্মণি বিধ্য ।
অত্রৈবৈনানভি তিষ্ঠেন্দ্র মেদ্য১হং তব ।
অনু ত্বেন্দ্রা রভামহে স্যাম সুমতৌ তব ॥৯॥