Sukta 8

8.1

Shatrunashanam, 1-9 atharva, nanadaivatyam, 1, 2 agnih, 3 vishve devah, 4-9 indrah, anushtup, 2 tryavasana shat-pada jagati, 3-4 bhurikpathyapanktih, 6 astarapanktih, 7 dvyushniggarbha pathyapanktih, 9 tryavasana shat-pada yushniggarbha jagati

वै॒क॒ङ्क॒तेने॒ध्मेन॑ दे॒वेभ्य॒ आज्यं॑ वह ।
अग्ने॒ ताँ इ॒ह मा॑दय॒ सर्व॑ आ य॑न्तु मे॒ हव॑म् ॥१॥

Vaikankatenedhmena devebhya ajyam vaha
Agne tam iha madaya sarva a yantu me havam

8.2

इन्द्रा या॑हि मे॒ हव॑मि॒दं क॑रिष्यामि॒ तच्छृ॑णु ।
इ॒म ऐ॒न्द्रा अ॑तिस॒रा आकू॑तिं॒ सं न॑मन्तु मे ।
तेभिः॑ शकेम वी॒र्यं१ जात॑वेद॒स्तनू॑वशिन् ॥२॥

Indra yahi me havamidam karishyami tachchhrinu
Ima aindra atisara akutim sam namantu me
Tebhih shakema viryan1 jatavedastanuvashin

8.3

यद॒साव॒मुतो॑ देवा अदे॒वः संश्चिकी॑र्षति ।
मा तस्या॒ग्निर्ह॒व्यं वा॑क्षी॒द्धवं॑ दे॒वा अ॑स्य॒ मोप॑ गु॒र्ममै॒व हव॒मेत॑न ॥३॥

Yadasavamuto deva adevah sanshchikirshati
Ma tasyagnirhavyam vakshiddhavam deva asya mopa gurmamaiva havametana

8.4

अति॑ धावतातिसरा॒ इन्द्र॑स्य॒ वच॑सा हत ।
अविं॒ वृक॑ इव मथ्नीत॒ स वो॒ जीव॒न्मा मो॑चि प्रा॒णम॒स्यापि॑ नह्यत ॥४॥

Ati dhavatatisara indrasya vachasa hata
Avim vrika iva mathnita sa vo jivanma mochi pranamasyapi nahyata

8.5

यम॒मी पु॑रोदधि॒रे ब्र॒ह्माण॒मप॑भूतये ।
इन्द्र॒ स ते॑ अधस्प॒दं तं प्रत्य॑स्यामि मृ॒त्यवे॑ ॥५॥

Yamami purodadhire brahmanamapabhutaye
Indra sa te adhaspadam tam pratyasyami mrityave

8.6

यदि॑ प्रे॒युर्देव॑पु॒रा ब्रह्म॒ वर्मा॑णि चक्रि॒रे।
त॒नू॒पानं॑ परि॒पाणं॑ कृण्वा॒ना यदु॑पोचि॒रे सर्वं॒ तद॑र॒सं कृ॑धि ॥६॥

Yadi preyurdevapura brahma varmani chakrire
Tanupanam paripanam krinvana yadupochire sarvam tadarasam kridhi

8.7

यान॒साव॑तिस॒रांश्च॒कार॑ कृ॒णव॑च्च॒ यान्।
त्वं तानि॑न्द्र वृत्रहन् प्र॒तीचः॒ पुन॒रा कृ॑धि॒ यथा॒मुं तृ॒णहां॒ जन॑म् ॥७॥

Yanasavatisaranshchakara krinavachcha yan
Tvam tanindra vritrahan pratichah punara kridhi yathamum trinaham janam

8.8

यथेन्द्र॑ उ॒द्वाच॑नं ल॒ब्ध्वा च॒क्रे अ॑धस्प॒दम्।
कृ॒ण्वे॒३ऽहमध॑रां॒स्तथा॒मूञ्छ॑श्व॒तीभ्यः॒ समा॑भ्यः ॥८॥

Yathendra udvachanam labdhva chakre adhaspadam
Krinve3hamadharanstathamunchhashvatibhyah samabhyah

8.9

अत्रै॑नानिन्द्र वृत्रहन्नु॒ग्रो मर्म॑णि विध्य ।
अत्रै॒वैना॑न॒भि ति॒ष्ठेन्द्र मे॒द्य॑१हं तव॑ ।
अनु॑ त्वे॒न्द्रा र॑भामहे॒ स्याम॑ सुम॒तौ तव॑ ॥९॥

Atrainanindra vritrahannugro marmani vidhya
Atraivainanabhi tishthendra medya1ham tava
Anu tvendra rabhamahe syama sumatau tava