Sukta 7

7.1

Aratinashanam, 1-10 atharva, bahudaivatyam, 1-3, 6-10 aratayah, 4-5 sarasvati, anushtup, 1 viradgarbha prastarapanktih, 4 pathyabrihati, 6 prastarapanktih

आ नो॑ भर॒ मा परि॑ ष्ठा अराते॒ मा नो॑ रक्षी॒र्दक्षि॑णां नी॒यमा॑नाम्।
नमो॑ वी॒र्त्साया॒ अस॑मृद्धये॒ नमो॑ अ॒स्त्वरा॑तये ॥१॥

A no bhara ma pari shtha arate ma no rakshirdakshinam niyamanam
Namo virtsaya asamriddhaye namo astvarataye

7.2

यम॑राते पुरोध॒त्से पुरु॑षं परिरा॒पिण॑म्।
नम॑स्ते॒ तस्मै॑ कृण्मो॒ मा व॒निं व्य॑थयी॒र्मम॑ ॥२॥

Yamarate purodhatse purusham parirapinam
Namaste tasmai krinmo ma vanim vyathayirmama

7.3

प्र णो॑ व॒निर्दे॒वकृ॑ता॒ दिवा॒ नक्तं॑ च कल्पताम्।
अरा॑तिमनु॒प्रेमो॑ व॒यं नमो॑ अ॒स्त्वरा॑तये ॥३॥

Pra no vanirdevakrita diva naktam cha kalpatam
Aratimanupremo vayam namo astvarataye

7.4

सर॑स्वती॒मनु॑मतिं॒ भगं॒ यन्तो॑ हवामहे ।
वाचं॑ जु॒ष्टां मधु॑मतीमवादिषं दे॒वानां॑ दे॒वहू॑तिषु ॥४॥

Sarasvatimanumatim bhagam yanto havamahe
Vacham jushtam madhumatimavadisham devanam devahutishu

7.5

यं याचा॑म्य॒हं वा॒चा सर॑स्वत्या मनो॒युजा॑ ।
श्र॒द्धा तम॒द्य वि॑न्दतु द॒त्ता सोमे॑न ब॒भ्रुणा॑ ॥५॥

Yam yachamyaham vacha sarasvatya manoyuja
Shraddha tamadya vindatu datta somena babhruna

7.6

मा व॒निं मा वाचं॑ नो॒ वीर्त्सी॑रु॒भावि॑न्द्रा॒ग्नी आ भ॑रतां नो॒ वसू॑नि ।
सर्वे॑ नो अ॒द्य दित्स॒न्तोऽरा॑तिं॒ प्रति॑ हर्यत ॥६॥

Ma vanim ma vacham no virtsirubhavindragni a bharatam no vasuni
Sarve no adya ditsantoratim prati haryata

7.7

प॒रोऽपे॑ह्यसमृद्धे॒ वि ते॑ हे॒तिं न॑यामसि ।
वेद॑ त्वा॒हं नि॒मीव॑न्तीं नितु॒दन्ती॑मराते ॥७॥

Paropehyasamriddhe vi te hetim nayamasi
Veda tvaham nimivantim nitudantimarate

7.8

उ॒त न॒ग्ना बोभु॑वती स्वप्न॒या स॑चसे॒ जन॑म्।
अरा॑ते चि॒त्तं वीर्त्स॒न्त्याकू॑तिं॒ पुरु॑षस्य च ॥८॥

Uta nagna bobhuvati svapnaya sachase janam
Arate chittam virtsantyakutim purushasya cha

7.9

या म॑ह॒ती म॒होन्मा॑ना॒ विश्वा॒ आशा॑ व्यान॒शे।
तस्यै॑ हिरण्यके॒श्यै निरृ॑त्या अकरं॒ नमः॑ ॥९॥

Ya mahati mahonmana vishva asha vyanashe
Tasyai hiranyakeshyai nirritya akaram namah

7.10

हिर॑ण्यवर्णा सु॒भगा॒ हिर॑ण्यकशिपुर्म॒ही।
तस्यै॒ हिर॑ण्यद्राप॒येऽरा॑त्या अकरं॒ नमः॑ ॥१०॥

Hiranyavarna subhaga hiranyakashipurmahi
Tasyai hiranyadrapayeratya akaram namah