Sukta 6

6.1

Brahmavidya, 1-14 atharva, somarudrau, 1 brahma, 2 karmani, 3-4 rudraganah, 5-8 somarudrau, 9 hetih, 10-14 sarvatma rudrah, trishtup, 2 anushtup, 3 jagati, 4 anushtubushnik-trishtubgarbha panchapada jagati, 5-7 tripada virannama gayatri, 8 ekavasana dvipadarchyanushtup, 10 prastarapanktih, 11-13 panktih, 14 svarat-panktih

ब्रह्म॑ जज्ञा॒नं प्र॑थ॒मं पु॒रस्ता॒द् वि सी॑म॒तः सु॒रुचो॑ वे॒न आ॑वः ।
स बु॒ध्न्याऽ उप॒मा अ॑स्य वि॒ष्ठाः स॒तश्च॒ योनि॒मस॑तश्च॒ वि वः॑ ॥१॥

Brahma jagyanam prathamam purastad vi simatah surucho vena avah
Sa budhnya upama asya vishthah satashcha yonimasatashcha vi vah

6.2

अना॑प्ता॒ ये वः॑ प्रथ॒मा यानि॒ कर्मा॑णि चक्रि॒रे।
वी॒रान् नो॒ अत्र मा द॑भ॒न् तद् व॑ ए॒तत् पु॒रो द॑धे ॥२॥

Anapta ye vah prathama yani karmani chakrire
Viran no atra ma dabhan tad va etat puro dadhe

6.3

स॒हस्र॑धार ए॒व ते सम॑स्वरन् दि॒वो नाके॒ मधु॑जिह्वा अस॒श्चतः॑ ।
तस्य॒ स्पशो॒ न नि मि॑षन्ति॒ भूर्ण॑यः प॒देप॑दे पा॒शिनः॑ सन्ति॒ सेत॑वे ॥३॥

Sahasradhara eva te samasvaran divo nake madhujihva asashchatah
Tasya spasho na ni mishanti bhurnayah padepade pashinah santi setave

6.4

पर्यू॒ षु प्र ध॑न्वा॒ वाज॑सातये॒ परि॑ वृ॒त्राणि॑ स॒क्षणिः॑ ।
द्वि॒षस्तदध्य॑र्ण॒वेने॑यसे सनिस्र॒सो नामा॑सि त्रयोद॒शो मास॒ इन्द्र॑स्य गृ॒हः ॥४॥

Paryu shu pra dhanva vajasataye pari vritrani sakshanih
Dvishastadadhyarnaveneyase sanisraso namasi trayodasho masa indrasya grihah

6.5

न्वे॒३तेना॑रात्सीरसौ॑ स्वाहा॑ ।
ति॒ग्मायु॑धौ ति॒ग्महे॑ती सु॒शेवौ॒ सोमा॑रुद्रावि॒ह सु मृ॑डतं नः ॥५॥

Nve3tenaratsirasau svaha
Tigmayudhau tigmaheti sushevau somarudraviha su mridatam nah

6.6

अवै॒तेना॑रात्सीरसौ॒ स्वाहा॑ ।
ति॒ग्मायु॑धौ ति॒ग्महे॑ती सु॒शेवौ॒ सोमा॑रुद्रावि॒ह सु मृ॑डतं नः ॥६॥

Avaitenaratsirasau svaha
Tigmayudhau tigmaheti sushevau somarudraviha su mridatam nah

6.7

अपै॒तेना॑रात्सीरसौ॒ स्वाहा॑ ।
ति॒ग्मायु॑धौ ति॒ग्महे॑ती सु॒शेवौ॒ सोमा॑रुद्रावि॒ह सु मृ॑डतं नः ॥७॥

Apaitenaratsirasau svaha
Tigmayudhau tigmaheti sushevau somarudraviha su mridatam nah

6.8

मु॒मु॒क्तम॒स्मान् दु॑रि॒ताद॑व॒द्याज्जु॒षेथां य॒ज्ञम॒मृत॑म॒स्मासु॑ धत्तम् ॥८॥

Mumuktamasman duritadavadyajjushetham yagyamamritamasmasu dhattam

6.9

चक्षु॑षो हेते॒ मन॑सो हेते॒ ब्रह्म॑णो हेते॒ तप॑सश्च हेते ।
मे॒न्या मे॒निर॑स्यमे॒नय॒स्ते स॑न्तु॒ ये॒३स्माँ अ॑भ्यघा॒यन्ति॑ ॥९॥

Chakshusho hete manaso hete brahmano hete tapasashcha hete
Menya menirasyamenayaste santu ye3smam abhyaghayanti

6.10

यो॒३ऽस्मांश्चक्षु॑षा॒ मन॑सा॒ चित्त्याकू॑त्या च॒ यो अ॑घा॒युर॑भि॒दासा॑त्।
त्वं तान॑ग्ने मे॒न्यामे॒नीन् कृ॑णु॒ स्वाहा॑ ॥१०॥

Yo3smanshchakshusha manasa chittyakutya cha yo aghayurabhidasat
Tvam tanagne menyamenin krinu svaha

6.11

इन्द्र॑स्य गृ॒होऽसि । तं त्वा॒ प्र प॑द्ये॒ तं त्वा॒ प्र वि॑शामि॒ सर्व॑गुः॒
सर्व॑पूरु॒षः सर्वा॑त्मा॒ सर्व॑तनूः स॒ह यन्मेऽस्ति॒ तेन॑ ॥११॥

Indrasya grihosi, tam tva pra padye tam tva pra vishami sarvaguh
Sarvapurushah sarvatma sarvatanuh saha yanmesti tena

6.12

इन्द्र॑स्य॒ शर्मा॑सि ।तं त्वा॒ प्र प॑द्ये॒ तं त्वा॒ प्र वि॑शामि॒ सर्व॑गुः॒
सर्व॑पूरु॒षः सर्वा॑त्मा॒ सर्व॑तनूः स॒ह यन्मेऽस्ति॒ तेन॑ ॥१२॥

Indrasya sharmasi, tam tva pra padye tam tva pra vishami sarvaguh
Sarvapurushah sarvatma sarvatanuh saha yanmesti tena

6.13

इन्द्र॑स्य॒ वर्मा॑सि ।तं त्वा॒ प्र प॑द्ये॒ तं त्वा॒ प्रवि॑शामि॒ सर्व॑गुः॒
सर्व॑पूरु॒षः सर्वा॑त्मा॒ सर्व॑तनूः स॒ह यन्मेऽस्ति॒ तेन॑ ॥१३॥

Indrasya varmasi, tam tva pra padye tam tva pravishami sarvaguh
Sarvapurushah sarvatma sarvatanuh saha yanmesti tena

6.14

इन्द्र॑स्य॒ वरू॑थमसि । तं त्वा॒ प्र प॑द्ये॒ तं त्वा॒ प्रवि॑शामि॒ सर्व॑गुः॒
सर्व॑पूरु॒षः सर्वा॑त्मा॒ सर्व॑तनूः स॒ह यन्मेऽस्ति॒ तेन॑ ॥१४॥

Indrasya varuthamasi, tam tva pra padye tam tva pravishami sarvaguh
Sarvapurushah sarvatma sarvatanuh saha yanmesti tena