সূক্ত 20

20.1

শত্রুসেনাত্রাসনম্। ১-১২ ব্রহ্মা। বনস্পতিঃ, দুন্দুভিঃ। ত্রিষ্টুপ্, ১ জগতী।

উচ্চৈর্ঘোষো দুন্দুভিঃ সত্বনায়ন্ বানস্পত্যঃ সংভৃত উস্রিয়াভিঃ ।
বাচং ক্ষুণুবানো দময়ন্ত্সপত্নান্ত্সিংহ ইব জেষ্যন্নভি তংস্তনীহি ॥১॥

সিংহ ইবাস্তানীদ্ দ্রুবয়ো বিবদ্ধোঽভিক্রন্দন্নৃষভো বাসিতামিব ।
বৃষা ত্বং বধ্রয়স্তে সপত্না ঐন্দ্রস্তে শুষ্মো অভিমাতিষাহঃ ॥২॥

বৃষেব যূথে সহসা বিদানো গব্যন্নভি রুব সংধনাজিৎ।
শুচা বিধ্য হৃদয়ং পরেষাং হিত্বা গ্রামান্ প্রচ্যুতা যন্তু শত্রবঃ ॥৩॥

সংজয়ন্ পৃতনা ঊর্ধ্বমায়ুর্গৃহ্যা গৃহ্ণানো বহুধা বি চক্ষ্ব ।
দৈবীং বাচং দুন্দুভ আ গুরস্ব বেধাঃ শত্রূণামুপ ভরস্ব বেদঃ ॥৪॥

দুন্দুভের্বাচং প্রয়তাং বদন্তীমাশৃণ্বতী নাথিতা ঘোষবুদ্ধা ।
নারী পুত্রং ধাবতু হস্তগহ্যামিত্রী ভীতা সমরে বধানাম্ ॥৫॥

পূর্বো দুন্দুভে প্র বদাসি বাচং ভূম্যাঃ পৃষ্ঠে বদ রোচমানঃ ।
অমিত্রসেনামভিজঞ্জভানো দ্যুমদ্ বদ দুন্দুভে সূনৃতাবৎ ॥৬॥

অন্তরেমে নভসী ঘোষো অস্তু পৃথক্ তে ধ্বনয়ো যন্তু শীভম্।
অভি ক্রন্দ স্তনয়োত্পিপানঃ শ্লোককৃন্মিত্রতূর্যায় স্বর্ধী ॥৭॥

ধীভিঃ কৃতঃ প্র বদাতি বাচমুদ্ধর্ষয় সত্বনামায়ুধানি ।
ইন্দ্রমেদী সত্বনো নি হ্বয়স্ব মিত্রৈরমিত্রাঁ অব জঙ্ঘনীহি ॥৮॥

সংক্রন্দনঃ প্রবদো ধৃষ্ণুষেণঃ প্রবেদকৃদ্ বহুধা গ্রামঘোষী।
শ্রেয়ো বন্বানো বয়ুনানি বিদ্বান্ কীর্তিং বহুভ্যো বি হর দ্বিরাজে ॥৯॥

শ্রেয়ঃকেতো বসুজিৎ সহীয়ান্ত্সংগ্রামজিৎ সংশিতো ব্রহ্মণাসি ।
অংশূনিব গ্রাবাধিষবণে অদ্রির্গব্যন্ দুন্দুভেঽধি নৃত্য বেদঃ ॥১০॥

শত্রূষাণ্ নীষাডভিমাতিষাহো গবেষণঃ সহমান উদ্ভিৎ।
বাগ্বীব মন্ত্রং প্র ভরস্ব বাচং সাংগ্রামজিত্যায়েষমুদ্ বদেহ ॥১১॥

অচ্যুতচ্যুৎ সমদো গমিষ্ঠো মৃধো জেতা পুরএতায়োধ্যঃ ।
ইন্দ্রেণ গুপ্তো বিদথা নিচিক্যদ্ধৃদ্দ্যোতনো দ্বিষতাং যাহি শীভম্ ॥১২॥