Sukta 20

20.1

Shatrusenatrasanam, 1-12 brahma, vanaspatih, dundubhih, trishtup, 1 jagati

उ॒च्चैर्घो॑षो दुन्दु॒भिः स॑त्वना॒यन् वा॑नस्प॒त्यः संभृ॑त उ॒स्रिया॑भिः ।
वाचं॑ क्षुणुवा॒नो द॒मय॑न्त्स॒पत्ना॑न्त्सिं॒ह इ॑व जे॒ष्यन्न॒भि तंस्तनीहि ॥१॥

Uchchairghosho dundubhih satvanayan vanaspatyah sambhrita usriyabhih
Vacham kshunuvano damayantsapatnantsinha iva jeshyannabhi tanstanihi

20.2

सिं॒ह इ॑वास्तानीद् द्रु॒वयो॒ विब॑द्धोऽभि॒क्रन्द॑न्नृष॒भो वा॑सि॒तामि॑व ।
वृषा॒ त्वं वध्र॑यस्ते स॒पत्ना॑ ऐ॒न्द्रस्ते॒ शुष्मो॑ अभिमातिषा॒हः ॥२॥

Sinha ivastanid druvayo vibaddhobhikrandannrishabho vasitamiva
Vrisha tvam vadhrayaste sapatna aindraste shushmo abhimatishahah

20.3

वृषे॑व यू॒थे सह॑सा विदा॒नो ग॒व्यन्न॒भि रु॑व संधनाजित्।
शु॒चा वि॑ध्य॒ हृद॑यं॒ परे॑षां हि॒त्वा ग्रामा॒न् प्रच्यु॑ता यन्तु॒ शत्र॑वः ॥३॥

Vrisheva yuthe sahasa vidano gavyannabhi ruva sandhanajit
Shucha vidhya hridayam paresham hitva graman prachyuta yantu shatravah

20.4

सं॒जय॒न् पृत॑ना ऊ॒र्ध्वमा॑यु॒र्गृह्या॑ गृह्णा॒नो ब॑हु॒धा वि च॑क्ष्व ।
दैवीं॒ वाचं॑ दुन्दुभ॒ आ गु॑रस्व वे॒धाः शत्रू॑णा॒मुप॑ भरस्व॒ वेदः॑ ॥४॥

Sanjayan pritana urdhvamayurgrihya grihnano bahudha vi chakshva
Daivim vacham dundubha a gurasva vedhah shatrunamupa bharasva vedah

20.5

दु॒न्दु॒भेर्वाचं॒ प्रय॑तां॒ वद॑न्तीमाशृण्व॒ती ना॑थि॒ता घोष॑बुद्धा ।
नारी॑ पु॒त्रं धा॑वतु हस्त॒गह्या॑मि॒त्री भी॒ता स॑म॒रे व॒धाना॑म् ॥५॥

Dundubhervacham prayatam vadantimashrinvati nathita ghoshabuddha
Nari putram dhavatu hastagahyamitri bhita samare vadhanam

20.6

पूर्वो॑ दुन्दुभे॒ प्र व॑दासि॒ वाचं॒ भूम्याः॑ पृ॒ष्ठे व॑द॒ रोच॑मानः ।
अ॒मि॒त्र॒से॒नाम॑भि॒जञ्ज॑भानो द्यु॒मद् व॑द दुन्दुभे सू॒नृता॑वत् ॥६॥

Purvo dundubhe pra vadasi vacham bhumyah prishthe vada rochamanah
Amitrasenamabhijanjabhano dyumad vada dundubhe sunritavat

20.7

अ॒न्त॒रेमे नभ॑सी॒ घोषो॑ अस्तु॒ पृथ॑क् ते ध्व॒नयो॑ यन्तु॒ शीभ॑म्।
अ॒भि क्र॑न्द स्त॒नयो॒त्पिपा॑नः श्लोक॒कृन्मि॑त्र॒तूर्या॑य स्व॒र्धी ॥७॥

Antareme nabhasi ghosho astu prithak te dhvanayo yantu shibham
Abhi kranda stanayotpipanah shlokakrinmitraturyaya svardhi

20.8

धी॒भिः कृ॒तः प्र व॑दाति॒ वाच॒मुद्ध॑र्षय॒ सत्व॑ना॒मायु॑धानि ।
इन्द्र॑मेदी॒ सत्व॑नो॒ नि ह्व॑यस्व मि॒त्रैर॒मित्राँ॒ अव॑ जङ्घनीहि ॥८॥

Dhibhih kritah pra vadati vachamuddharshaya satvanamayudhani
Indramedi satvano ni hvayasva mitrairamitram ava janghanihi

20.9

सं॒क्रन्दनः॑ प्रव॒दो धृ॒ष्णुषे॑णः प्रवेद॒कृद् ब॑हु॒धा ग्रा॑मघो॒षी।
श्रेयो॑ वन्वा॒नो व॒युना॑नि वि॒द्वान् की॒र्तिं ब॒हुभ्यो॒ वि ह॑र द्विरा॒जे ॥९॥

Sankrandanah pravado dhrishnushenah pravedakrid bahudha gramaghoshi
Shreyo vanvano vayunani vidvan kirtim bahubhyo vi hara dviraje

20.10

श्रेयः॑केतो वसु॒जित् सहीयान्त्संग्राम॒जित् संशि॑तो॒ ब्रह्म॑णासि ।
अं॒शूनि॑व॒ ग्रावा॑धि॒षव॑णे॒ अद्रि॑र्ग॒व्य॑न् दु॑न्दु॒भेऽधि॑ नृत्य॒ वेदः॑ ॥१०॥

Shreyahketo vasujit sahiyantsangramajit sanshito brahmanasi
Anshuniva gravadhishavane adrirgavyan dundubhedhi nritya vedah

20.11

श॒त्रू॒षाण् नी॒षाड॑भिमातिषा॒हो ग॒वेष॑णः॒ सह॑मान उ॒द्भित्।
वा॒ग्वीव॒ मन्त्रं॒ प्र भ॑रस्व॒ वाचं॒ सांग्रा॑मजित्या॒येष॒मुद् व॑दे॒ह ॥११॥

Shatrushan nishadabhimatishaho gaveshanah sahamana udbhit
Vagviva mantram pra bharasva vacham sangramajityayeshamud vadeha

20.12

अ॒च्यु॒त॒च्युत् स॒मदो॒ गमि॑ष्ठो॒ मृधो॒ जेता॑ पुरए॒तायो॒ध्यः ।
इन्द्रे॑ण गु॒प्तो वि॒दथा॑ नि॒चिक्य॑द्धृ॒द्द्योत॑नो द्विष॒तां या॑हि॒ शीभ॑म् ॥१२॥

Achyutachyut samado gamishtho mridho jeta puraetayodhyah
Indrena gupto vidatha nichikyaddhriddyotano dvishatam yahi shibham