Sukta 21

21.1

Shatrusenatrasanam, 1-12 brahma, vanaspatih, dundubhih, 10-12 adityadayah, anushtup, 1, 4-5 pathyapanktih, 6 jagati, 11 brihatigarbha trishtup, 12 tripada yavamadhya gayatri

विहृ॑दयं वैमन॒स्यं वदा॒मित्रे॑षु दुन्दुभे ।
वि॒द्वे॒षं कश्म॑शं भ॒यम॒मित्रे॑षु॒ नि द॑ध्म॒स्यवैनान् दुन्दुभे जहि ॥१॥

Vihridayam vaimanasyam vadamitreshu dundubhe
Vidvesham kashmasham bhayamamitreshu ni dadhmasyavainan dundubhe jahi

21.2

उ॒द्वेप॑माना॒ मन॑सा॒ चक्षु॑षा॒ हृद॑येन च ।
धाव॑न्तु॒ बिभ्य॑तो॒ऽमित्राः॑ प्रत्रा॒सेनाज्ये॑ हु॒ते ॥२॥

Udvepamana manasa chakshusha hridayena cha
Dhavantu bibhyatomitrah pratrasenajye hute

21.3

वा॒न॒स्प॒त्यः संभृ॑त उ॒स्रिया॑भिर्वि॒श्वगो॑त्र्यः ।
प्र॒त्रा॒सम॒मित्रे॑भ्यो व॒दाज्ये॑ना॒भिघा॑रितः ॥३॥

Vanaspatyah sambhrita usriyabhirvishvagotryah
Pratrasamamitrebhyo vadajyenabhigharitah

21.4

यथा॑ मृ॒गाः सं॑वि॒जन्त॑ आर॒ण्याः पुरु॑षा॒दधि॑ ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥४॥

Yatha mrigah sanvijanta aranyah purushadadhi
Eva tvam dundubhemitranabhi kranda pra trasayatho chittani mohaya

21.5

यथा॒ वृका॑दजा॒वयो॒ धाव॑न्ति ब॒हु बिभ्य॑तीः ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥५॥

Yatha vrikadajavayo dhavanti bahu bibhyatih
Eva tvam dundubhemitranabhi kranda pra trasayatho chittani mohaya

21.6

यथा॑ श्ये॒नात् प॑त॒त्रिणः॑ संवि॒जन्ते॒ अह॑र्दिवि सिं॒हस्य॑ स्त॒नथो॒र्यथा॑ ।
ए॒वा त्वं दु॑न्दुभे॒ऽमित्रा॑न॒भि क्र॑न्द॒ प्र त्रा॑स॒याथो॑ चि॒त्तानि॑ मोहय ॥६॥

Yatha shyenat patatrinah sanvijante ahardivi sinhasya stanathoryatha
Eva tvam dundubhemitranabhi kranda pra trasayatho chittani mohaya

21.7

परा॒मित्रा॑न् दुन्दु॒भिना॑ हरि॒णस्या॒जिने॑न च ।
सर्वे॑ दे॒वा अ॑तित्रस॒न् ये सं॑ग्रा॒मस्येशते ॥७॥

Paramitran dundubhina harinasyajinena cha
Sarve deva atitrasan ye sangramasyeshate

21.8

यैरिन्द्रः॑ प्र॒क्रीड॑ते पद्घो॒षैश्छा॒यया॑ स॒ह।
तैर॒मित्रा॑स्त्रसन्तु नो॒ऽमी ये यन्त्य॑नीक॒शः ॥८॥

Yairindrah prakridate padghoshaishchhayaya saha
Tairamitrastrasantu nomi ye yantyanikashah

21.9

ज्या॒घो॒षा दु॑न्दु॒भयो॒ भि क्रो॑शन्तु॒ या दिशः॑ ।
सेनाः॒ परा॑जिता य॒तीर॒मित्रा॑णामनीक॒शः ॥९॥

Jyaghosha dundubhayo bhi kroshantu ya dishah
Senah parajita yatiramitranamanikashah

21.10

आदि॑त्य॒ चक्षु॒रा द॑त्स्व॒ मरी॑च॒योऽनु॑ धावत ।
प॒त्स॒ङ्गिनी॒रा स॑जन्तु॒ विग॑ते बाहुवी॒र्येऽ ॥१०॥

Aditya chakshura datsva marichayonu dhavata
Patsanginira sajantu vigate bahuvirye

21.11

यू॒यमु॒ग्रा म॑रुतः पृश्निमातर॒ इन्द्रे॑ण यु॒जा प्र मृ॑णीत॒ शत्रू॑न्।
सोमो॒ राजा॒ वरु॑णो॒ राजा॑ महादे॒व उ॒त मृ॒त्युरिन्द्रः॑ ॥११॥

Yuyamugra marutah prishnimatara indrena yuja pra mrinita shatrun
Somo raja varuno raja mahadeva uta mrityurindrah

21.12

ए॒ता दे॑वसे॒नाः सूर्य॑केतवः॒ सचे॑तसः ।
अ॒मित्रा॑न् नो जयन्तु॒ स्वाहा॑ ॥१२॥

Eta devasenah suryaketavah sachetasah
Amitran no jayantu svaha