সূক্ত 38

38.1

বাজিনীবান্ ঋষভঃ। ১-৭ বাদরায়ণিঃ। ১-৪ অপ্সরসঃ, ৫-৭ ঋষভঃ। অনুষ্টুপ্, ৩ ষট্ পদা ত্র্যবসানা জগতী, ৫ ভুরিগত্যষ্টিঃ,…. ত্রিষ্টুপ্,৭ ত্র্যবসানা পঞ্চপদানুষ্টুব্গর্ভা পুরউপরিষ্টাজ্জ্যোতিষ্মতী জগতী।

উদ্ভিন্দতীং সংজয়ন্তীমপ্সরাং সাধুদেবিনীম্।
গ্লহে কৃতানি কৃণ্বানামপ্সরাং তামিহ হুবে ॥১॥

38.2

বিচিন্বতীমাকিরন্তীমপ্সরাং সাধুদেবিনীম্।
গ্লহে কৃতানি গৃহ্ণানামপ্সরাং তামিহ হুবে ॥২॥

38.3

যায়ৈঃ পরিনৃত্যত্যাদদানা কৃতং গ্লহাৎ।
সা নঃ কৃতানি সীষতী প্রহামাপ্নোতু মায়য়া ।
সা নঃ পয়স্বত্যৈতু মা নো জৈষুরিদং ধনম্ ॥৩॥

38.4

যা অক্ষেষু প্রমোদন্তে শুচং ক্রোধং চ বিভ্রতী ।
আনন্দিনীং প্রমোদিনীমপ্সরাং তামিহ হুবে ॥৪॥

38.5

সূর্যস্য রশ্মীননু যাঃ সঞ্চরন্তি মরীচীর্বা যা অনুসঞ্চরন্তি ।
যাসামৃষভো দূরতো বাজিনীবান্ত্সদ্যঃ সর্বাঁন্ লোকান্ পর্যৈতি রক্ষন্।
স ন ঐতু হোমমিমং জুষাণো৩ঽন্তরিক্ষেণ সহ বাজিনীবান্ ॥৫॥

38.6

অন্তরিক্ষেন সহ বাজিনীবন্ কর্কীং বত্সামিহ রক্ষ বাজিন্।
ইমে তে স্তোকা বহুলা এহ্যর্বাঙিয়ং তে কর্কীহ তে মনোঽস্তু ॥৬॥

38.7

অন্তরিক্ষেণ সহ বাজিনীবন্ কর্কীং বত্সামিহ রক্ষ বাজিন্।
অয়ং ঘাসো অয়ং ব্রজ ইহ বত্সাং নি বধ্নীমঃ ।
যথানাম ব ঈশ্মহে স্বাহা ॥৭॥