সূক্ত 37

37.1

কৃমিনাশনম্। ১২ বাদরায়ণিঃ। অজশৃঙ্গী, ১ অপ্সরসঃ, ১-২, ৬-১০ ঔষধী অজশৃঙ্গী, ৩-৫ অপ্সরসঃ, ৭-১২ গন্ধর্বাপ্সরসঃ। অনুষ্টুপ্, ৩ ত্র্যবসানা ষট্ পদা ত্রিষ্টুপ্, ৫ প্রস্তারপঙ্ক্তিঃ, ৭ পরোষ্ণিক্, ১১ ষট্ পদা জগতী, ১২ নিচৃৎ।

ত্বয়া পূর্বমথর্বাণো জঘ্নূ রক্ষাংস্যোষধে ।
ত্বয়া জঘান কশ্যপস্ত্বয়া কণ্বো অগস্ত্যঃ ॥১॥

37.2

ত্বয়া বয়মপ্সরসো গন্ধর্বাংস্চাতয়ামহে ।
অজশৃঙ্গ্যজ রক্ষঃ সর্বান্ গন্ধেন নাশয় ॥২॥

37.3

নদীং যন্ত্বপ্সরসোঽপাং তারমবশ্বসম্।
গুল্গুলূঃ পীলা নলদ্যৌ৩ক্ষগন্ধিঃ প্রমন্দনী।
তৎ পরেতাপ্সরসঃ প্রতিবুদ্ধা অভূতন ॥৩॥

37.4

যত্রাশ্বত্থা ন্যগ্রোধা মহাবৃক্ষাঃ শিখণ্ডিনঃ ।
তৎ পরেতাপ্সরসঃ প্রতিবুদ্ধা অভূতন ॥৪॥

37.5

যত্র বঃ প্রেঙ্খা হরিতা অর্জুনা উত যত্রাঘাতাঃ কর্কর্যঃ সংবদন্তি ।
তৎ পরেতাপ্সরসঃ প্রতিবুদ্ধা অভূতন ॥৫॥

37.6

এয়মগন্নোষধীনাং বীরুধাং বীর্যাঽবতী ।
অজশৃঙ্গ্যঽরাটকী তীক্ষ্ণশৃঙ্গী ব্যৃঽষতু ॥৬॥

37.7

আনৃত্যতঃ শিখণ্ডিনো গন্ধর্বস্যাপ্সরাপতেঃ ।
ভিনদ্মি মুষ্কাবপি যামি শেপঃ ॥৭॥

37.8

ভীমা ইন্দ্রস্য হেতয়ঃ শতমৃষ্টীরয়স্ময়ীঃ ।
তাভির্হবিরদান্ গন্ধর্বানবকাদান্ ব্যৃঽষতু ॥৮॥

37.9

ভীমা ইন্দ্রস্য হেতয়ঃ শতমৃষ্টীর্হিরণ্যয়ীঃ ।
তাভির্হবিরদান্ গন্ধর্বানবকাদান্ ব্যুঽষতু ॥৯॥

37.10

অবকাদানভিশোচানপ্সু জ্যোতয় মামকান্।
পিশাচান্ত্সর্বানোষধে প্র মৃণীহি সহস্ব চ ॥১০॥

37.11

স্বেবৈকঃ কপিরিবৈকঃ কুমারঃ সর্বকেশকঃ ।
প্রিয়ো দৃশ ইব ভূত্বা গন্ধর্বঃ সচতে স্ত্রিয়স্তমিতো নাশয়ামসি ব্রহ্মণা বীর্যাঽবতা ॥১১॥

37.12

জায়া ইদ্ বো অপ্সরসো গন্ধর্বাঃ পতয়ো যূয়ম্।
অপ ধাবতামর্ত্যা মর্ত্যান্ মা সচধ্বম্ ॥১২॥