সূক্ত 36

36.1

সত্যৌজা অগ্নিঃ। ১-১০ চাতনঃ। সত্যৌজা অগ্নিঃ। অনুষ্টুপ্, ৯ ভুরিক্।

তান্ত্সত্যৌজাঃ প্র দহত্বগ্নির্বৈশ্বানরোবৃষা ।
যো নো দুরস্যাদ্ দিপ্সাচ্চাথো যো নো অরাতিয়াৎ ॥১॥

36.2

যো নো দিপ্সদদিপ্সতো দিপ্সতো যশ্চ দিপ্সতি ।
বৈশ্বানরস্য দংষ্ট্রয়োরগ্নেরপি দধামি তম্ ॥২॥

36.3

য আগরে মৃগয়ন্তে প্রতিক্রোশেঽমাবাস্যে।
ক্রব্যাদো অন্যান্ দিপ্সতঃ সর্বাংস্তান্ত্সহসা সহে ॥৩॥

36.4

সহে পিশাচান্ত্সহসৈষাং দ্রবিণং দদে ।
সর্বান্ দুরস্যতো হন্মি সং ম আকূতিরৃদ্যতাম্ ॥৪॥

36.5

যে দেবাস্তেন হাসন্তে সূর্যেণ মিমতে জবম্।
নদীষু পর্বতেষু যে সং তৈঃ পশুভির্বিদে ॥৫॥

36.6

তপনো অস্মি পিশাচানাং ব্যাঘ্রো গোমতামিব ।
শ্বানঃ সিংহমিব দৃষ্ট্বা তে ন বিন্দন্তে ন্যঞ্চনম্ ॥৬॥

36.7

ন পিশাচৈঃ সং শক্নোমি ন স্তেনৈর্ন বনর্গুভিঃ ।
পিশাচাস্তস্মান্নশ্যন্তি যমহং গ্রামমাবিশে ॥৭॥

36.8

যং গ্রামমাবিশত ইদমুগ্রং সহো মম ।
পিশাচাস্তস্মান্নশ্যন্তি ন পাপমুপ জানতে ॥৮॥

36.9

যে মা ক্রোধয়ন্তি লপিতা হস্তিনং মশকা ইব ।
তানহং মন্যে দুর্হিতান্ জনে অল্পশয়ূনিব ॥৯॥

36.10

অভি তং নিরৃতির্ধত্তামশ্বমিবাশ্বাভিধান্যা ।
মল্বো যো মহ্যং ক্রুধ্যতি স উ পাশান্নমুচ্যতে ॥১০॥