Sukta 36

36.1

Satyauja agnih, 1-10 chatanah, satyauja agnih, anushtup, 9 bhurik

तान्त्स॒त्यौजाः॒ प्र द॑हत्व॒ग्निर्वै॑श्वान॒रोवृषा॑ ।
यो नो॑ दुर॒स्याद् दिप्सा॒च्चाथो॒ यो नो॑ अराति॒यात् ॥१॥

Tantsatyaujah pra dahatvagnirvaishvanarovrisha
Yo no durasyad dipsachchatho yo no aratiyat

यो नो॒ दिप्स॒ददि॑प्सतो॒ दिप्स॑तो॒ यश्च॒ दिप्स॑ति ।
वै॒श्वा॒न॒रस्य॒ दंष्ट्र॑योर॒ग्नेरपि॑ दधामि॒ तम् ॥२॥

Yo no dipsadadipsato dipsato yashcha dipsati
Vaishvanarasya danshtrayoragnerapi dadhami tam

य आ॑ग॒रे मृ॒गय॑न्ते प्रतिक्रो॒शेऽमावा॒स्ये।
क्र॒व्यादो॑ अ॒न्यान् दिप्स॑तः॒ सर्वां॒स्तान्त्सह॑सा सहे ॥३॥

Ya agare mrigayante pratikroshemavasye
Kravyado anyan dipsatah sarvanstantsahasa sahe

सहे॑ पिशा॒चान्त्सह॑सैषां॒ द्रवि॑णं ददे ।
सर्वा॑न् दुरस्य॒तो ह॑न्मि॒ सं म॒ आकू॑तिरृद्यताम् ॥४॥

Sahe pishachantsahasaisham dravinam dade
Sarvan durasyato hanmi sam ma akutirridyatam

ये दे॒वास्तेन॒ हास॑न्ते॒ सूर्ये॑ण मिमते ज॒वम्।
न॒दीषु॒ पर्व॑तेषु॒ ये सं तैः प॒शुभि॑र्विदे ॥५॥

Ye devastena hasante suryena mimate javam
Nadishu parvateshu ye sam taih pashubhirvide

तप॑नो अस्मि पिशा॒चानां॑ व्या॒घ्रो गोम॑तामिव ।
श्वानः॑ सिं॒हमि॑व दृ॒ष्ट्वा ते न वि॑न्दन्ते॒ न्यञ्च॑नम् ॥६॥

Tapano asmi pishachanam vyaghro gomatamiva
Shvanah sinhamiva drishtva te na vindante nyanchanam

न पि॑शा॒चैः सं श॑क्नोमि॒ न स्ते॒नैर्न व॑न॒र्गुभिः॑ ।
पि॒शा॒चास्तस्मा॑न्नश्यन्ति॒ यम॒हं ग्राम॑मावि॒शे ॥७॥

Na pishachaih sam shaknomi na stenairna vanargubhih
Pishachastasmannashyanti yamaham gramamavishe

यं ग्राम॑मावि॒शत॑ इ॒दमु॒ग्रं सहो॒ मम॑ ।
पि॒शा॒चास्तस्मा॑न्नश्यन्ति॒ न पा॒पमुप॑ जानते ॥८॥

Yam gramamavishata idamugram saho mama
Pishachastasmannashyanti na papamupa janate

ये मा॑ क्रो॒धय॑न्ति लपि॒ता ह॒स्तिनं॑ म॒शका॑ इव ।
तान॒हं म॑न्ये॒ दुर्हि॑ता॒न् जने॒ अल्प॑शयूनिव ॥९॥

Ye ma krodhayanti lapita hastinam mashaka iva
Tanaham manye durhitan jane alpashayuniva

अ॒भि तं निरृ॑तिर्धत्ता॒मश्व॑मिवाश्वाभि॒धान्या॑ ।
म॒ल्वो यो मह्यं॒ क्रुध्य॑ति॒ स उ॒ पाशा॒न्नमु॑च्यते ॥१०॥

Abhi tam nirritirdhattamashvamivashvabhidhanya
Malvo yo mahyam krudhyati sa u pashannamuchyate