সূক্ত 31

31.1

সেনানিরীক্ষণম্। ১-৭ ব্রহ্ম স্কন্দঃ। মন্যুঃ। ত্রিষ্টুপ্, ২, ৪ ভুরিক্, ৫-৭ জগতী।

ত্বয়া মন্যো সরথমারুজন্তো হর্ষমাণা হৃষিতাসো মরুত্বন্।
তিগ্মেষব আয়ুধা সংশিশানা উপ প্র যন্তু নরো অগ্নিরূপাঃ ॥১॥

31.2

অগ্নিরিব মন্যো ত্বিষিতঃ সহস্ব সেনানীর্নঃ সহুরে হূত এধি ।
হত্বায় শত্রূন্ বি ভজস্ব বেদ ওজো মিমানো বি মৃধো নুদস্ব ॥২॥

31.3

সহস্ব মন্যো অভিমাতিমস্মৈ রুজন্ মৃণন্ প্রমৃণন্ প্রেহি শত্রূন্।
উগ্রং তে পাজো নন্বা রুরুধ্রে বশী বশং নয়াসা একজ ত্বম্ ॥৩॥

31.4

একো বহূনামসি মন্য ঈডিতা বিশংবিশং যুদ্ধায় সং শিশাধি ।
অকৃত্তরুক্ ত্বয়া যুজা বয়ং দ্যুমন্তং ঘোষং বিজয়ায় কৃণ্মসি ॥৪॥

31.5

বিজেষকৃদিন্দ্র ইবানবব্রবো৩ঽস্মাকং মন্যো অধিপা ভবেহ।
প্রিয়ং তে নাম সহুরে গৃণীমসি বিদ্মা তমুত্সং যত আবভূথ ॥৫॥

31.6

আভূত্যা সহজা বজ্র সায়ক সহো বিভর্ষি সহভূত উত্তরম্।
ক্রত্বা নো মন্যো সহ মেদ্যেঽধি মহাধনস্য পুরুহূত সংসৃজি ॥৬॥

31.7

সংসৃষ্টং ধনমুভয়ং সমাকৃতমস্মভ্যং ধত্তাং বরুণশ্চ মন্যুঃ ।
ভিয়ো দধানা হৄদয়েষু শত্রবঃ পরাজিতাসো অপ নি লয়ন্তাম্ ॥৭॥