Sukta 31

31.1

Senanirikshanam, 1-7 brahma skandah, manyuh, trishtup, 2, 4 bhurik, 5-7 jagati

त्वया॑ मन्यो स॒रथ॑मारु॒जन्तो हर्ष॑माणा हृषि॒तासो॑ मरुत्वन्।
ति॒ग्मेष॑व॒ आयु॑धा सं॒शिशा॑ना॒ उप॒ प्र य॑न्तु॒ नरो॑ अ॒ग्निरू॑पाः ॥१॥

Tvaya manyo sarathamarujanto harshamana hrishitaso marutvan
Tigmeshava ayudha sanshishana upa pra yantu naro agnirupah

अ॒ग्निरि॑व मन्यो त्विषि॒तः स॑हस्व सेना॒नीर्नः॑ सहुरे हू॒त ए॑धि ।
ह॒त्वाय॒ शत्रू॒न् वि भ॑जस्व॒ वेद॒ ओजो॒ मिमा॑नो॒ वि मृधो॑ नुदस्व ॥२॥

Agniriva manyo tvishitah sahasva senanirnah sahure huta edhi
Hatvaya shatrun vi bhajasva veda ojo mimano vi mridho nudasva

सह॑स्व मन्यो अ॒भिमा॑तिम॒स्मै रु॒जन् मृ॒णन् प्र॑मृ॒णन् प्रेहि॒ शत्रू॑न्।
उ॒ग्रं ते॒ पाजो॑ न॒न्वा रु॑रुध्रे व॒शी वशं॑ नयासा एकज॒ त्वम् ॥३॥

Sahasva manyo abhimatimasmai rujan mrinan pramrinan prehi shatrun
Ugram te pajo nanva rurudhre vashi vasham nayasa ekaja tvam

एको॑ बहू॒नाम॑सि मन्य ईडि॒ता विशं॑विशं यु॒द्धाय॒ सं शि॑शाधि ।
अकृ॑त्तरु॒क् त्वया॑ यु॒जा व॒यं द्यु॒मन्तं॒ घोषं॑ विज॒याय॑ कृण्मसि ॥४॥

Eko bahunamasi manya idita vishanvisham yuddhaya sam shishadhi
Akrittaruk tvaya yuja vayam dyumantam ghosham vijayaya krinmasi

वि॒जे॒ष॒कृदिन्द्र॑ इवानवब्र॒वो॒३ऽस्माकं॑ मन्यो अधि॒पा भ॑वे॒ह।
प्रि॒यं ते॒ नाम॑ सहुरे गृणीमसि वि॒द्मा तमुत्सं॒ यत॑ आब॒भूथ॑ ॥५॥

Vijeshakridindra ivanavabravo3smakam manyo adhipa bhaveha
Priyam te nama sahure grinimasi vidma tamutsam yata ababhutha

आभू॑त्या सह॒जा व॑ज्र सायक॒ सहो॑ बिभर्षि सहभूत॒ उत्त॑रम्।
क्रत्वा॑ नो मन्यो स॒ह मे॒द्येऽधि महाध॒नस्य पुरुहूत सं॒सृजि॑ ॥६॥

Abhutya sahaja vajra sayaka saho bibharshi sahabhuta uttaram
Kratva no manyo saha medyedhi mahadhanasya puruhuta sansriji

संसृ॑ष्टं धन॑मु॒भयं॑ स॒माकृ॑तम॒स्मभ्यं॑ धत्तां॒ वरु॑णश्च म॒न्युः ।
भियो॒ दधा॑ना॒ हॄदये॑षु॒ शत्र॑वः॒ परा॑जितासो अप॒ नि ल॑यन्ताम् ॥७॥

Sansrishtam dhanamubhayam samakritamasmabhyam dhattam varunashcha manyuh
Bhiyo dadhana hridayeshu shatravah parajitaso apa ni layantam