Sukta 32

32.1

Senasanyojanam, 1-7 brahma skandah, manyuh, trishtup, 1 jagati

यस्ते॑ म॒न्योऽवि॑धद् वज्र सायक॒ सह॒ ओजः॒ पुष्य॑ति॒ विश्व॑मानु॒षक्।
सा॒ह्याम॒ दास॒मार्यं॒ त्वया॑ यु॒जा व॒यं सह॑स्कृतेन॒ सह॑सा॒ सह॑स्वता ॥१॥

Yaste manyovidhad vajra sayaka saha ojah pushyati vishvamanushak
Sahyama dasamaryam tvaya yuja vayam sahaskritena sahasa sahasvata

32.2

म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
म॒न्युर्विश॑ ईडते॒ मानु॑षी॒र्याः पा॒हि नो॑ मन्यो॒ तप॑सा स॒जोषाः॑ ॥२॥

Manyurindro manyurevasa devo manyurhota varuno jatavedah
Manyurvisha idate manushiryah pahi no manyo tapasa sajoshah

32.3

अ॒भीऽहि मन्यो त॒वस॒स्तवी॑या॒न् तप॑सा यु॒जा वि ज॑हि॒ शत्रू॑न्।
अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं नः॑ ॥३॥

Abhihi manyo tavasastaviyan tapasa yuja vi jahi shatrun
Amitraha vritraha dasyuha cha vishva vasunya bhara tvam nah

32.4

त्वं हि म॑न्यो अ॒भिभू॑त्योजाः स्वयं॒भूर्भामो॑ अभिमातिषा॒हः ।
वि॒श्वच॑र्षणिः॒ सहु॑रिः॒ सही॑यान॒स्मास्वोजः॒ पृत॑नासु धेहि ॥४॥

Tvam hi manyo abhibhutyojah svayambhurbhamo abhimatishahah
Vishvacharshanih sahurih sahiyanasmasvojah pritanasu dhehi

32.5

अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
तं त्वा॑ मन्यो अक्र॒तुर्जि॑हीडा॒हं स्वा त॒नूर्ब॑ल॒दावा॑ न॒ एहि॑ ॥५॥

Abhagah sannapa pareto asmi tava kratva tavishasya prachetah
Tam tva manyo akraturjihidaham sva tanurbaladava na ehi

32.6

अ॒यं ते॑ अ॒स्म्युप॑ न॒ एह्य॒र्वाङ् प्र॑तीची॒नः स॑हुरे विश्वदावन्।
मन्यो॑ वज्रिन्न॒भि न॒ आ व॑वृत्स्व॒ हना॑व॒ दस्यूं॑रुत बो॑ध्या॒पेः ॥६॥

Ayam te asmyupa na ehyarvang pratichinah sahure vishvadavan
Manyo vajrinnabhi na a vavritsva hanava dasyunruta bodhyapeh

32.7

अ॒भि प्रेहि॑ दक्षिण॒तो भ॑वा॒ नोऽधा॑ वृ॒त्राणि॑ जङ्घनाव॒ भूरि॑ ।
जु॒होमि॑ ते ध॒रुणं॒ मध्वो॒ अग्र॑मु॒भावु॑पां॒शु प्र॑थ॒मा पि॑बाव ॥७॥

Abhi prehi dakshinato bhava nodha vritrani janghanava bhuri
Juhomi te dharunam madhvo agramubhavupanshu prathama pibava