সূক্ত 25

25.1

পাপমোচনম্। ১-৭ মৃগারঃ। সবিতা, বায়ুঃ। ত্রিষ্টুপ্, ৩ অতিশক্বরী, ৭ পথ্যাবৃহতী।

বায়োঃ সবিতুর্বিদথানি মন্মহে যাবাত্মন্বদ্ বিশথো যৌ চ রক্ষথঃ ।
যৌ বিশ্বস্য পরিভূ বভূবথুস্তৌ নো মুঞ্চতমংহসঃ ॥১॥

যয়োঃ সংখ্যাতা বরিমা পার্থিবানি যাভ্যাং রজো যুপিতমন্তরিক্ষে ।
যয়োঃ প্রায়ং নান্বানশে কশ্চন তৌ নো মুঞ্চতমংহসঃ ॥২॥

তব ব্রতে নি বিশন্তে জনাসস্ত্বয্যুদিতে প্রেরতে চিত্রভানো ।
যুবং বায়ো সবিতা চ ভুবনানি রক্ষথস্তৌ নো মুঞ্চতমংহসঃ ॥৩॥

অপেতো বায়ো সবিতা চ দুষ্কৃতমপ রক্ষাংসি শিমিদাং চ সেধতম্।
সং হ্যূ৩র্জয়া সৃজথঃ সং বলেন তৌ নো মুঞ্চতমংহসঃ ॥৪॥

রয়িং মে পোষং সবিতোত বায়ুস্তনূ দক্ষমা সুবতাং সুশেবম্।
অয়ক্ষ্মতাতিং মহ ইহ ধত্তং তৌ নো মুঞ্চতমংহসঃ ॥৫॥

প্র সুমতিং সবিতর্বায় ঊতয়ে মহস্বন্তং মত্সরং মাদয়াথঃ ।
অর্বাগ্ বামস্য প্রবতো নি যচ্ছতং তৌ নো মুঞ্চতমংহসঃ ॥৬॥

উপ শ্রেষ্ঠা ন আশিষো দেবয়োর্ধামন্নস্থিরন্।
স্তৌমি দেবং সবিতারং চ বায়ুং তৌ নো মুঞ্চতমংহসঃ ॥৭॥