Sukta 25

25.1

Papamochanam, 1-7 mrigarah, savita, vayuh, trishtup, 3 atishakvari, 7 pathyabrihati

वा॒योः स॑वि॒तुर्वि॒दथा॑नि मन्महे॒ यावा॑त्म॒न्वद् वि॒शथो॒ यौ च॒ रक्ष॑थः ।
यौ विश्व॑स्य परि॒भू ब॑भू॒वथु॒स्तौ नो॑ मुञ्चत॒मंह॑सः ॥१॥

Vayoh saviturvidathani manmahe yavatmanvad vishatho yau cha rakshathah
Yau vishvasya paribhu babhuvathustau no munchatamanhasah

ययोः॒ संख्या॑ता॒ वरि॑मा॒ पार्थि॑वानि॒ याभ्यां॒ रजो॑ युपि॒तम॒न्तरि॑क्षे ।
ययोः॑ प्रा॒यं नान्वा॑न॒शे कश्च॒न तौ नो॑ मुञ्चत॒मंह॑सः ॥२॥

Yayoh sankhyata varima parthivani yabhyam rajo yupitamantarikshe
Yayoh prayam nanvanashe kashchana tau no munchatamanhasah

तव॑ व्र॒ते नि वि॑शन्ते॒ जना॑स॒स्त्वय्युदि॑ते॒ प्रेर॑ते चित्रभानो ।
यु॒वं वा॑यो सवि॒ता च॒ भुव॑नानि रक्षथ॒स्तौ नो॑ मुञ्चत॒मंह॑सः ॥३॥

Tava vrate ni vishante janasastvayyudite prerate chitrabhano
Yuvam vayo savita cha bhuvanani rakshathastau no munchatamanhasah

अपे॒तो वा॑यो सवि॒ता च॑ दुष्कृ॒तमप॒ रक्षां॑सि॒ शिमि॑दां च सेधतम्।
सं ह्यू॒३र्जया॑ सृ॒जथः॒ सं बले॑न॒ तौ नो॑ मुञ्चत॒मंह॑सः ॥४॥

Apeto vayo savita cha dushkritamapa rakshansi shimidam cha sedhatam
Sam hyu3rjaya srijathah sam balena tau no munchatamanhasah

र॒यिं मे॒ पोषं॑ सवि॒तोत वा॒युस्त॒नू दक्ष॒मा सु॑वतां सु॒शेव॑म्।
अ॒य॒क्ष्मता॑तिं॒ मह॑ इ॒ह ध॑त्तं॒ तौ नो॑ मुञ्चत॒मंह॑सः ॥५॥

Rayim me posham savitota vayustanu dakshama suvatam sushevam
Ayakshmatatim maha iha dhattam tau no munchatamanhasah

प्र सु॑म॒तिं स॑वितर्वाय ऊ॒तये॒ मह॑स्वन्तं मत्स॒रं मा॑दयाथः ।
अ॒र्वाग् वा॒मस्य॑ प्र॒वतो॒ नि य॑च्छतं॒ तौ नो॑ मुञ्चत॒मंह॑सः ॥६॥

Pra sumatim savitarvaya utaye mahasvantam matsaram madayathah
Arvag vamasya pravato ni yachchhatam tau no munchatamanhasah

उप॒ श्रेष्ठा॑ न आ॒शिषो॑ दे॒वयो॒र्धाम॑न्नस्थिरन्।
स्तौमि॑ दे॒वं स॑वि॒तारं॑ च वा॒युं तौ नो॑ मुञ्चत॒मंह॑सः ॥७॥

Upa shreshtha na ashisho devayordhamannasthiran
Staumi devam savitaram cha vayum tau no munchatamanhasah