Sukta 26

26.1

Papa-mochanam, 1-7 mrigarah, dyavaprithivi, trishtup, 1 ashtih, 2-3 jagati, 7 shakvaragarbhatimadhyejyotih

म॒न्वे वां॑ द्यावापृथिवी सुभोजसौ॒ सचे॑तसौ॒ ये अप्र॑थेथा॒ममि॑ता॒ योज॑नानि ।
प्र॒ति॒ष्ठे ह्यभ॑वतं॒ वसू॑नां॒ ते नो॑ मुञ्चत॒मंह॑सः ॥१॥

Manve vam dyavaprithivi subhojasau sachetasau ye aprathethamamita yojanani
Pratishthe hyabhavatam vasunam te no munchatamanhasah

26.2

प्र॒ति॒ष्ठे ह्यभ॑वत॒ वसू॑नां॒ प्रवृ॑द्धे देवी सुभगे उरूची ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥२॥

Pratishthe hyabhavata vasunam pravriddhe devi subhage uruchi
Dyavaprithivi bhavatam me syone te no munchatamanhasah

26.3

अ॒स॒न्ता॒पे सु॒तप॑सौ हुवे॒ऽहमु॒र्वी ग॑म्भी॒रे क॒विभि॑र्नम॒स्येऽ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥३॥

Asantape sutapasau huvehamurvi gambhire kavibhirnamasye
Dyavaprithivi bhavatam me syone te no munchatamanhasah

26.4

ये अ॒मृतं॑ बिभृ॒थो ये ह॒वींषि॒ ये स्रो॒त्या बि॑भृ॒थो ये म॑नु॒ष्याऽन्।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥४॥

Ye amritam bibhritho ye havinshi ye srotya bibhritho ye manushyan
Dyavaprithivi bhavatam me syone te no munchatamanhasah

26.5

ये उ॒स्रिया॒ बिभृ॒थो ये वन॒स्पती॒न् ययो॑र्वां॒ विश्वा॒ भुव॑नान्य॒न्तः ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥५॥

Ye usriya bibhritho ye vanaspatin yayorvam vishva bhuvananyantah
Dyavaprithivi bhavatam me syone te no munchatamanhasah

26.6

ये की॒लाले॑न त॒र्पय॑थो॒ ये घृ॒तेन॒ याभ्या॑मृ॒ते न किं च॒न श॑क्नु॒वन्ति ।
द्यावा॑पृथिवी॒ भव॑तं मे स्यो॒ने ते नो॑ मुञ्चत॒मंह॑सः ॥६॥

Ye kilalena tarpayatho ye ghritena yabhyamrite na kim chana shaknuvanti
Dyavaprithivi bhavatam me syone te no munchatamanhasah

26.7

यन्मे॒दम॑भि॒शोच॑ति॒ येन॑येन वा कृ॒तं पौरु॑षेया॒न्न दैवा॑त्।
स्तौमि॒ द्यावा॑पृथि॒वी ना॑थि॒तो जो॑हवीमि॒ ते नो॑ मुञ्चत॒मंह॑सः ॥७॥

Yanmedamabhishochati yenayena va kritam paurusheyanna daivat
Staumi dyavaprithivi nathito johavimi te no munchatamanhasah