Sukta 27

27.1

Papamochanam, 1-7 mrigarah, marutah, trishatup

म॒रुतां॑ मन्वे॒ अधि॑ मे ब्रुवन्तु॒ प्रेमं वाजं॒ वाज॑साते अवन्तु ।
आ॒शूनि॑व सु॒यमा॑नह्व ऊ॒तये॑ ते नो॑ मुञ्च॒न्त्वंह॑सः ॥१॥

Marutam manve adhi me bruvantu premam vajam vajasate avantu
Ashuniva suyamanahva utaye te no munchantvanhasah

उत्स॒मक्षि॑तं॒ व्यच॑न्ति॒ ये सदा॒ य आ॑सि॒ञ्चन्ति॒ रस॒मोष॑धीषु ।
पु॒रो द॑धे मरुतः॒ पृश्नि॑मातृंस्ते नो॑ मुञ्च॒न्त्वंह॑सः ॥२॥

Utsamakshitam vyachanti ye sada ya asinchanti rasamoshadhishu
Puro dadhe marutah prishnimatrinste no munchantvanhasah

पयो॑ धेनू॒नां रस॒मोष॑धीनां ज॒वमर्व॑तां कवयो॒ य इन्व॑थ ।
श॒ग्मा भ॑वन्तु म॒रुतो॑ नः स्यो॒नास्ते नो॑ मुञ्च॒न्त्वंह॑सः ॥३॥

Payo dhenunam rasamoshadhinam javamarvatam kavayo ya invatha
Shagma bhavantu maruto nah syonaste no munchantvanhasah

अ॒पः स॑मु॒द्राद् दिव॒मुद् व॑हन्ति दि॒वस्पृ॑थि॒वीम॒भि ये सृ॒जन्ति॑ ।
ये अ॒द्भिरीशा॑ना म॒रुत॒श्चर॑न्ति ते नो॑ मुञ्च॒न्त्वंह॑सः ॥४॥

Apah samudrad divamud vahanti divasprithivimabhi ye srijanti
Ye adbhirishana marutashcharanti te no munchantvanhasah

ये की॒लाले॑न त॒र्पय॑न्ति ये घृ॒तेन॒ ये वा॒ वयो॒ मेद॑सा संसृ॒जन्ति॑ ।
ये अ॒द्भिरीशा॑ना म॒रुतो॑ व॒र्षय॑न्ति॒ ते नो॑ मुञ्च॒न्त्वंह॑सः ॥५॥

Ye kilalena tarpayanti ye ghritena ye va vayo medasa sansrijanti
Ye adbhirishana maruto varshayanti te no munchantvanhasah

यदीदि॒दं मरु॑तो॒ मारु॑तेन॒ यदि॑ देवा॒ दैव्ये॑ने॒दृगार॑ ।
यू॒यमी॑शिध्वे वसव॒स्तस्य॒ निष्कृ॑ते॒स्ते नो॑ मुञ्च॒न्त्वंह॑सः ॥६॥

Yadididam maruto marutena yadi deva daivyenedrigara
Yuyamishidhve vasavastasya nishkriteste no munchantvanhasah

ति॒ग्ममनी॑कं विदि॒तं सह॑स्व॒न्मारु॑तं॒ शर्धः॒ पृत॑नासू॒ग्रम्।
स्तौमि॑ म॒रुतो॑ नाथि॒तो जो॑हवीमि॒ ते नो॑ मुञ्च॒न्त्वंह॑सः ॥७॥

Tigmamanikam viditam sahasvanmarutam shardhah pritanasugram
Staumi maruto nathito johavimi te no munchantvanhasah