Sukta 28

28.1

Papamochanam, 1-7 mrigarotharva va, bhavasharvau rudro va, trishtup, 1 atijagatagarbha bhurik

भवा॑शर्वौ म॒न्वे वां॒ तस्य॑ वित्तं॒ ययो॑र्वामि॒दं प्र॒दिशि॒ यद् वि॒रोच॑ते ।
याव॒स्ये॑शा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥१॥

Bhavasharvau manve vam tasya vittam yayorvamidam pradishi yad virochate
Yavasyeshathe dvipado yau chatushpadastau no munchatamanhasah

28.2

ययो॑रभ्यभ्व॒ उ॒त यद् दू॒रे चि॒द् यौ वि॑दि॒तावि॑षु॒भृता॒मसि॑ष्ठौ ।
याव॒स्येशा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥२॥

Yayorabhyabhva uta yad dure chid yau viditavishubhritamasishthau
Yavasyeshathe dvipado yau chatushpadastau no munchatamanhasah

28.3

स॒ह॒स्रा॒क्षौ वृ॑त्र॒हना॑ हुवे॒हं दू॒रेग॑व्यूती स्तु॒वन्ने॑म्यु॒ग्रौ।
याव॒स्येशा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥३॥

Sahasrakshau vritrahana huveham duregavyuti stuvannemyugrau
Yavasyeshathe dvipado yau chatushpadastau no munchatamanhasah

28.4

यावा॑रे॒भाथे॑ ब॒हु सा॒कमग्रे॒ प्र चेद॑स्रा॑ष्ट्रमभि॒भां जने॑षु ।
याव॒स्येशा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥४॥

Yavarebhathe bahu sakamagre pra chedasrashtramabhibham janeshu
Yavasyeshathe dvipado yau chatushpadastau no munchatamanhasah

28.5

ययो॑र्व॒धान्नाप॒पद्य॑ते॒ कश्च॒नान्तर्दे॒वेषू॒त मानु॑षेषु ।
याव॒स्येशा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥५॥

Yayorvadhannapapadyate kashchanantardeveshuta manusheshu
Yavasyeshathe dvipado yau chatushpadastau no munchatamanhasah

28.6

यः कृ॑त्या॒कृन्मू॑ल॒कृद् या॑तु॒धानो॒ नि तस्मि॑न् धत्तं॒ वज्र॑मु॒ग्रौ।
याव॒स्येशा॑थे द्वि॒पदो॒ यौ चतु॑ष्पद॒स्तौ नो॑ मुञ्चत॒मंह॑सः ॥६॥

Yah krityakrinmulakrid yatudhano ni tasmin dhattam vajramugrau
Yavasyeshathe dvipado yau chatushpadastau no munchatamanhasah

28.7

अधि॑ नो ब्रूतं॒ पृत॑नासूग्रौ॒ सं वज्रे॑ण सृजतं॒ यः कि॑मी॒दी।
स्तौमि॑ भवाश॒र्वौ ना॑थि॒तो॑ जो॑हवीमि॒ तौ नो॑ मुञ्चत॒मंह॑सः ॥७॥

Adhi no brutam pritanasugrau sam vajrena srijatam yah kimidi
Staumi bhavasharvau nathito johavimi tau no munchatamanhasah