Sukta 24

24.1

Papamochanam, 1-7 mrigarah, indrah, trishtup, 1 shakvarigarbha purahshakvari

इन्द्र॑स्य मन्महे॒ शश्व॒दिद॑स्य मन्महे वृत्र॒घ्न स्तोमा॒ उप॑ मे॒म आगुः॑ ।
यो दा॒शुषः॑ सु॒कृतो॒ हव॒मेति॒ स नो॑ मुञ्च॒त्वंह॑सः ॥१॥

Indrasya manmahe shashvadidasya manmahe vritraghna stoma upa mema aguh
Yo dashushah sukrito havameti sa no munchatvanhasah

य उ॒ग्रीणा॑मु॒ग्रबा॑हुर्य॒युर्यो दा॑न॒वानां॒ बल॑मारु॒रोज॑ ।
येन॑ जि॒ताः सिन्ध॑वो॒ येन॒ गावः॒ स नो॑ मुञ्च॒त्वंह॑सः ॥२॥

Ya ugrinamugrabahuryayuryo danavanam balamaruroja
Yena jitah sindhavo yena gavah sa no munchatvanhasah

यश्च॑र्षणि॒प्रो वृ॑ष॒भः स्व॒र्विद् यस्मै॒ ग्रावा॑णः प्र॒वद॑न्ति नृ॒म्णम्।
यस्या॑ध्व॒रः स॒प्तहो॑ता॒ मदि॑ष्ठः॒ स नो॑ मुञ्च॒त्वंह॑सः ॥३॥

Yashcharshanipro vrishabhah svarvid yasmai gravanah pravadanti nrimnam
Yasyadhvarah saptahota madishthah sa no munchatvanhasah

यस्य॑ व॒शास॑ ऋष॒भास॑ उ॒क्षणो॒ यस्मै॑ मी॒यन्ते॒ स्व॒र॑वः स्व॒र्विदे॑ ।
यस्मै॑ शु॒क्रः पव॑ते॒ ब्रह्म॑शुम्भितः॒ स नो॑ मुञ्च॒त्वंह॑सः ॥४॥

Yasya vashasa rishabhasa ukshano yasmai miyante svaravah svarvide
Yasmai shukrah pavate brahmashumbhitah sa no munchatvanhasah

यस्य॒ जुष्टिं॑ सो॒मिनः॑ का॒मय॑न्ते॒ यं हव॑न्त॒ इषु॑मन्तं॒ गवि॑ष्टौ ।
यस्मि॑न्न॒र्कः शि॑श्रि॒ये यस्मि॒न्नोजः॒ स नो॑ मुञ्च॒त्वंह॑सः ॥५॥

Yasya jushtim sominah kamayante yam havanta ishumantam gavishtau
Yasminnarkah shishriye yasminnojah sa no munchatvanhasah

यः प्र॑थ॒मः क॑र्म॒कृत्या॑य ज॒ज्ञे यस्य॑ वी॒र्यंऽ प्रथ॒मस्यानु॑बुद्धम्।
येनोद्य॑तो॒ वज्रो॒ऽभ्याय॒ताहिं॒ स नो॑ मुञ्च॒त्वंह॑सः ॥६॥

Yah prathamah karmakrityaya jagye yasya viryan prathamasyanubuddham
Yenodyato vajrobhyayatahim sa no munchatvanhasah

यः सं॑ग्रा॒मान्नय॑ति॒ सं यु॒धे व॒शी यः पु॒ष्टानि॑ संसृ॒जति॑ द्व॒यानि॑ ।
स्तौमीन्द्रं॑ नाथि॒तो जो॑हवीमि॒ स नो॑ मुञ्च॒त्वंह॑सः ॥७॥

Yah sangramannayati sam yudhe vashi yah pushtani sansrijati dvayani
Staumindram nathito johavimi sa no munchatvanhasah