সূক্ত 24

24.1

পাপমোচনম্। ১-৭ মৃগারঃ। ইন্দ্রঃ। ত্রিষ্টুপ্, ১ শাক্বরীগর্ভা পুরঃশক্বরী।

ইন্দ্রস্য মন্মহে শশ্বদিদস্য মন্মহে বৃত্রঘ্ন স্তোমা উপ মেম আগুঃ ।
যো দাশুষঃ সুকৃতো হবমেতি স নো মুঞ্চত্বংহসঃ ॥১॥

24.2

য উগ্রীণামুগ্রবাহুর্যয়ুর্যো দানবানাং বলমারুরোজ ।
যেন জিতাঃ সিন্ধবো যেন গাবঃ স নো মুঞ্চত্বংহসঃ ॥২॥

24.3

যশ্চর্ষণিপ্রো বৃষভঃ স্বর্বিদ্ যস্মৈ গ্রাবাণঃ প্রবদন্তি নৃম্ণম্।
যস্যাধ্বরঃ সপ্তহোতা মদিষ্ঠঃ স নো মুঞ্চত্বংহসঃ ॥৩॥

24.4

যস্য বশাস ঋষভাস উক্ষণো যস্মৈ মীয়ন্তে স্বরবঃ স্বর্বিদে ।
যস্মৈ শুক্রঃ পবতে ব্রহ্মশুম্ভিতঃ স নো মুঞ্চত্বংহসঃ ॥৪॥

24.5

যস্য জুষ্টিং সোমিনঃ কাময়ন্তে যং হবন্ত ইষুমন্তং গবিষ্টৌ ।
যস্মিন্নর্কঃ শিশ্রিয়ে যস্মিন্নোজঃ স নো মুঞ্চত্বংহসঃ ॥৫॥

24.6

যঃ প্রথমঃ কর্মকৃত্যায় জজ্ঞে যস্য বীর্যংঽ প্রথমস্যানুবুদ্ধম্।
যেনোদ্যতো বজ্রোঽভ্যায়তাহিং স নো মুঞ্চত্বংহসঃ ॥৬॥

24.7

যঃ সংগ্রামান্নয়তি সং যুধে বশী যঃ পুষ্টানি সংসৃজতি দ্বয়ানি ।
স্তৌমীন্দ্রং নাথিতো জোহবীমি স নো মুঞ্চত্বংহসঃ ॥৭॥