Sukta 23

23.1

Papa-mochanam, 1-7 mrigarah, pracheta agnih, trishatup, 3 purastajjyotishmati, 4 anushtup, 6 prastarapanktih

अ॒ग्नेर्म॑न्वे प्रथ॒मस्य॒ प्रचे॑तसः॒ पाञ्च॑जन्यस्य बहु॒धा यमि॒न्धते॑ ।
विशो॑ विशः प्रविशि॒वांस॑मीमहे॒ स नो मुञ्च॒त्वंह॑सः ॥१॥

Agnermanve prathamasya prachetasah panchajanyasya bahudha yamindhate
Visho vishah pravishivansamimahe sa no munchatvanhasah

23.2

यथा॑ ह॒व्यं वह॑सि जातवेदो॒ यथा॑ य॒ज्ञं क॒ल्पय॑सि प्रजा॒नन्।
ए॒वा दे॒वेभ्यः॑ सुम॒तिं न॒ आ व॑ह॒ स नो॑ मुञ्च॒त्वंह॑सः ॥२॥

Yatha havyam vahasi jatavedo yatha yagyam kalpayasi prajanan
Eva devebhyah sumatim na a vaha sa no munchatvanhasah

23.3

याम॑न्याम॒न्नुप॑युक्तं॒ वहि॑ष्ठं॒ कर्म॑न्कर्म॒न्नाभ॑गम् ।
अ॒ग्निमी॑डे र॒क्षो॒हणं॑ यज्ञ॒वॄधं॑ घृ॒ताहु॑तं॒ स नो॑ मुञ्च॒त्वंह॑सः ॥३॥

Yamanyamannupayuktam vahishtham karmankarmannabhagam
Agnimide rakshohanam yagyavridham ghritahutam sa no munchatvanhasah

23.4

सुजा॑तं जा॒तवे॑दसम॒ग्निं वै॑श्वान॒रं वि॒भुम्।
ह॒व्य॒वाहं॑ हवामहे॒ स नो॑ मुञ्च॒त्वंह॑सः ॥४॥

Sujatam jatavedasamagnim vaishvanaram vibhum
Havyavaham havamahe sa no munchatvanhasah

23.5

येन॒ ऋष॑यो ब॒लमद्यो॑तयन् यु॒जा येनासु॑राणा॒मयु॑वन्त मा॒याः ।
येना॒ग्निना॑ प॒णीनिन्द्रो॑ जि॒गाय॒ स नो॑ मुञ्च॒त्वंह॑सः ॥५॥

Yena rishayo balamadyotayan yuja yenasuranamayuvanta mayah
Yenagnina paninindro jigaya sa no munchatvanhasah

23.6

येन॑ दे॒वा अ॒मृत॑म॒न्ववि॑न्द॒न् येनौष॑धी॒र्मधु॑मती॒रकृण्वन्।
येन॑ दे॒वाः स्व॑१राभ॑र॒न्त्स नो॑ मुञ्च॒त्वंह॑सः ॥६॥

Yena deva amritamanvavindan yenaushadhirmadhumatirakrinvan
Yena devah sva1rabharantsa no munchatvanhasah

23.7

यस्ये॒दं प्र॒दिशि॒ यद् वि॒रोच॑ते॒ यज्जा॒तं ज॑नित॒व्यंऽ च॒ केव॑लम्।
स्तौम्य॒ग्निं ना॑थि॒तो जो॑हवीमि॒ स नो॑ मुञ्च॒त्वंह॑सः ॥७॥

Yasyedam pradishi yad virochate yajjatam janitavyan cha kevalam
Staumyagnim nathito johavimi sa no munchatvanhasah