সূক্ত 19

19.1

অপামার্গঃ। ১-৮ শুক্রঃ। অপামার্গো বনস্পতিঃ। অনুষ্টুপ্, ২ পথ্যাপঙ্ক্তিঃ।

উতো অস্যবন্ধুকৃদুতো অসি নু জামিকৃৎ।
উতো কৃত্যাকৃতঃ প্রজাং নডমিবা ছিন্ধি বার্ষিকম্ ॥১॥

19.2

ব্রাহ্মণেন পর্যুক্তাসি কণ্বেন নার্ষদেন ।
সেনেবৈষি ত্বিষীমতী ন তত্র ভয়মস্তি যত্র প্রাপ্নোষ্যোষধে ॥২॥

19.3

অগ্রমেষ্যোষধীনাং জ্যোতিষেবাভিদীপয়ন্।
উত ত্রাতাসি পাকস্যাথো হন্তাসি রক্ষসঃ ॥৩॥

19.4

যদদো দেবা অসুরাংস্ত্বয়াগ্রে নিরকুর্বত ।
ততস্ত্বমধ্যোষধেঽপামার্গো অজায়থাঃ ॥৪॥

19.5

বিভিন্দতী শতশাখা বিভিন্দন্ নাম তে পিতা।
প্রত্যগ্ বি ভিন্ধি ত্বং তং যো অস্মাঁ অভিদাসতি ॥৫॥

19.6

অসদ্ ভূম্যাঃ সমভবৎ তদ্ যামেতি মহদ্ ব্যচঃ ।
তদ্ বৈ ততো বিধূপায়ৎ প্রত্যক্ কর্তারমৃচ্ছতু ॥৬॥

19.7

প্রত্যঙ্ হি সংবভূবিথ প্রতীচীনফলস্ত্বম্।
সর্বান্ মচ্ছপথাঁ অধি বরীয়ো যাবয়া বধম্ ॥৭॥

19.8

শতেন মা পরি পাহি সহস্রেণাভি রক্ষ মা ।
ইন্দ্রস্তে বীরুধাং পত উগ্র ওজ্মানমা দধৎ ॥৮॥