Sukta 19

19.1

Apamargah, 1-8 shukrah, apamargo vanaspatih, anushtup, 2 pathyapanktih

उ॒तो अ॒स्यब॑न्धुकृदु॒तो अ॑सि॒ नु जा॑मि॒कृत्।
उ॒तो कृ॑त्या॒कृतः॑ प्र॒जां न॒डमि॒वा छि॑न्धि॒ वार्षि॑कम् ॥१॥

Uto asyabandhukriduto asi nu jamikrit
Uto krityakritah prajam nadamiva chhindhi varshikam

ब्रा॒ह्म॒णेन॒ पर्यु॑क्तासि॒ कण्वे॑न नार्ष॒देन॑ ।
सेने॑वैषि॒ त्विषी॑मती॒ न तत्र॑ भ॒यमस्ति॒ यत्र॑ प्रा॒प्नोष्यो॑षधे ॥२॥

Brahmanena paryuktasi kanvena narshadena
Senevaishi tvishimati na tatra bhayamasti yatra prapnoshyoshadhe

अग्र॑मे॒ष्योष॑धीनां॒ ज्योति॑षेवाभिदी॒पय॑न्।
उ॒त त्रा॒तासि॒ पाक॒स्याथो॑ ह॒न्तासि॑ र॒क्षसः॑ ॥३॥

Agrameshyoshadhinam jyotishevabhidipayan
Uta tratasi pakasyatho hantasi rakshasah

यद॒दो दे॒वा असु॑रां॒स्त्वयाग्रे॑ नि॒रकु॑र्वत ।
तत॒स्त्वमध्यो॑षधेऽपामा॒र्गो अ॑जायथाः ॥४॥

Yadado deva asuranstvayagre nirakurvata
Tatastvamadhyoshadhepamargo ajayathah

वि॒भि॒न्द॒ती श॒तशा॑खा विभि॒न्दन् नाम॑ ते पि॒ता।
प्र॒त्यग् वि भि॑न्धि॒ त्वं तं यो अ॒स्माँ अ॑भि॒दास॑ति ॥५॥

Vibhindati shatashakha vibhindan nama te pita
Pratyag vi bhindhi tvam tam yo asmam abhidasati

अस॒द् भूम्याः॒ सम॑भव॒त् तद् यामे॑ति म॒हद् व्यचः॑ ।
तद् वै ततो॑ विधू॒पाय॑त् प्र॒त्यक् क॒र्तार॑मृच्छतु ॥६॥

Asad bhumyah samabhavat tad yameti mahad vyachah
Tad vai tato vidhupayat pratyak kartaramrichchhatu

प्र॒त्यङ् हि सं॑ब॒भूवि॑थ प्रती॒चीन॑फल॒स्त्वम्।
सर्वा॒न् मच्छ॒पथाँ॒ अधि॒ वरी॑यो यावया व॒धम् ॥७॥

Pratyang hi sambabhuvitha pratichinaphalastvam
Sarvan machchhapatham adhi variyo yavaya vadham

श॒तेन॑ मा॒ परि॑ पाहि स॒हस्रे॑णा॒भि र॑क्ष मा ।
इन्द्र॑स्ते वीरुधां पत उ॒ग्र ओ॒ज्मान॒मा द॑धत् ॥८॥

Shatena ma pari pahi sahasrenabhi raksha ma
Indraste virudham pata ugra ojmanama dadhat