Sukta 18

18.1

Apamargah, 1-8 shukrah, apamargo vanaspatih, anushtup, 6 brihatigarbha

स॒मं ज्योतिः॒ सूर्ये॒णाह्ना॒ रात्री॑ स॒मावती॑ ।
कृ॒णोमि॑ स॒त्यमू॒तये॑ऽर॒साः स॑न्तु॒ कृत्व॑रीः ॥१॥

Samam jyotih suryenahna ratri samavati
Krinomi satyamutayerasah santu kritvarih

यो दे॑वाः कृ॒त्यां कृ॒त्वा हरा॒दवि॑दुषो गृ॒हम्।
व॒त्सो धा॒रुरि॑व मा॒तरं॒ तं प्र॒त्यगुप॑ पद्यताम् ॥२॥

Yo devah krityam kritva haradavidusho griham
Vatso dharuriva mataram tam pratyagupa padyatam

अ॒मा कृ॒त्वा पा॒प्मानं॒ यस्तेना॒न्यं जिघां॑सति ।
अश्मा॑न॒स्तस्यां॑ द॒ग्धायां॑ बहु॒लाः फट् क॑रिक्रति ॥३॥

Ama kritva papmanam yastenanyam jighansati
Ashmanastasyam dagdhayam bahulah phat karikrati

सह॑स्रधाम॒न् विशि॑खा॒न् विग्री॑वां छायया॒ त्वम्।
प्रति॑ स्म च॒क्रुषे॑ कृ॒त्यां प्रि॒यां प्रि॒याव॑ते हर ॥४॥

Sahasradhaman vishikhan vigrivam chhayaya tvam
Prati sma chakrushe krityam priyam priyavate hara

अ॒नया॒हमोष॑ध्या सर्वाः॑ कृ॒त्या अ॑दूदुषम्।
यां क्षेत्रे॑ च॒क्रुर्यां गोषु॒ यां वा॑ ते॒ पुरु॑षेषु ॥५॥

Anayahamoshadhya sarvah kritya adudusham
Yam kshetre chakruryam goshu yam va te purusheshu

यश्च॒कार॒ न श॒शाक॒ कर्तुं॑ श॒श्रे पाद॑म॒ङ्गुरि॑म्।
च॒कार॑ भ॒द्रम॒स्मभ्य॑मा॒त्मने॒ तप॑नं॒ तु सः ॥६॥

Yashchakara na shashaka kartum shashre padamangurim
Chakara bhadramasmabhyamatmane tapanam tu sah

अ॒पा॒मा॒र्गोऽप॑ मार्ष्टु क्षेत्रि॒यं श॒पथ॑श्च॒ यः ।
अपाह॑ यातुधा॒नीरप॒ सर्वा॒ अरा॒य्यः ॥७॥

Apamargopa marshtu kshetriyam shapathashcha yah
Apaha yatudhanirapa sarva arayyah

अ॒प॒मृज्य॑ यातु॒धाना॒नप॒ सर्वा॑ अरा॒य्यः ।
अपा॑मार्ग॒ त्वया॑ व॒यं सर्वं॒ तदप॒ मृज्महे ॥८॥

Apamrijya yatudhananapa sarva arayyah
Apamarga tvaya vayam sarvam tadapa mrijmahe