Sukta 17

17.1

Apamargah, 1-8 shukrah, apamargo vanaspatih, anushatup

ईशा॑णां त्वा भेष॒जाना॒मुज्जे॑ष॒ आ र॑भामहे ।
च॒क्रे स॒हस्र॑वीर्यं॒ सर्व॑स्मा ओषधे त्वा ॥१॥

Ishanam tva bheshajanamujjesha a rabhamahe
Chakre sahasraviryam sarvasma oshadhe tva

स॒त्य॒जितं॑ शपथ॒याव॑नीं॒ सह॑मानां पुनःस॒राम्।
सर्वाः॒ सम॒ह्व्योष॑धीरि॒तो नः॑ पारया॒दिति॑ ॥२॥

Satyajitam shapathayavanim sahamanam punahsaram
Sarvah samahvyoshadhirito nah parayaditi

या श॒शाप॒ शप॑नेन॒ याघं मूर॑माद॒धे।
या रस॑स्य॒ हर॑णाय जा॒तमा॑रे॒भे तो॒कम॑त्तु॒ सा ॥३॥

Ya shashapa shapanena yagham muramadadhe
Ya rasasya haranaya jatamarebhe tokamattu sa

यां ते॑ च॒क्रुरा॒मे पात्रे॒ यां च॒क्रुर्नी॑ललोहि॒ते।
आ॒मे मां॒से कृ॒त्यां यां च॒क्रुस्तया॑ कृत्या॒कृतो॑ जहि ॥४॥

Yam te chakrurame patre yam chakrurnilalohite
Ame manse krityam yam chakrustaya krityakrito jahi

दौष्व॑प्न्यं॒ दौर्जी॑वित्यं॒ रक्षो॑ अ॒भ्वऽमरा॒य्यः ।
दु॒र्णाम्नीः॒ सर्वा॑ दु॒र्वाच॒स्ता अ॒स्मन्ना॑शयामसि ॥५॥

Daushvapnyam daurjivityam raksho abhvamarayyah
Durnamnih sarva durvachasta asmannashayamasi

क्षु॒धा॒मा॒रं तृ॑ष्णामा॒रम॒गोता॑मनप॒त्यता॑म्।
अपा॑मार्ग॒ त्वया॑ व॒यं सर्वं॒ तदप॑ मृज्महे ॥६॥

Kshudhamaram trishnamaramagotamanapatyatam
Apamarga tvaya vayam sarvam tadapa mrijmahe

तृ॒ष्णा॒मा॒रं क्षु॑धामा॒रमथो॑ अक्षपराज॒यम्।
अपा॑मार्ग॒ त्वया॑ व॒यं सर्वं॒ तदप॒ मृज्महे ॥७॥

Trishnamaram kshudhamaramatho akshaparajayam
Apamarga tvaya vayam sarvam tadapa mrijmahe

अ॒पा॒मा॒र्ग ओष॑धीनां॒ सर्वा॑सा॒मेक॒ इद् व॒शी।
तेन॑ ते मृज्म॒ आस्थि॑त॒मथ॒ त्वम॑ग॒दश्च॑र ॥८॥

Apamarga oshadhinam sarvasameka id vashi
Tena te mrijma asthitamatha tvamagadashchara