Sukta 20

20.1

Pishachakshayanam, 1-9 matrinama, matrinama, anushtup, 1 svarat, 9 bhurik

आ प॑श्यति॒ प्रति॑ पश्यति॒ परा॑ पश्यति॒ पश्य॑ति ।
दिव॑म॒न्तरि॑क्ष॒माद् भूमिं॒ सर्वं॒ तद् दे॑वि पश्यति ॥१॥

A pashyati prati pashyati para pashyati pashyati
Divamantarikshamad bhumim sarvam tad devi pashyati

ति॒स्रो दिव॑स्ति॒स्रः पृ॑थि॒वीः षट् चे॒माः प्र॒दिशः॒ पृथ॑क्।
त्वया॒हं सर्वा॑ भू॒तानि॒ पश्या॑नि देव्योषधे ॥२॥

Tisro divastisrah prithivih shat chemah pradishah prithak
Tvayaham sarva bhutani pashyani devyoshadhe

दि॒व्यस्य॑ सुप॒र्णस्य॒ तस्य॑ हासि क॒नीनि॑का ।
सा भूमि॒मा रु॑रोहिथ व॒ह्यं श्रा॒न्ता व॒धूरि॑व ॥३॥

Divyasya suparnasya tasya hasi kaninika
Sa bhumima rurohitha vahyam shranta vadhuriva

तां मे॑ सहस्रा॒क्षो दे॒वो दक्षि॑णे॒ हस्त॒ आ द॑धत्।
तया॒हं सर्वं॑ पश्यामि॒ यश्च॑ शू॒द्र उ॒तार्यः॑ ॥४॥

Tam me sahasraksho devo dakshine hasta a dadhat
Tayaham sarvam pashyami yashcha shudra utaryah

आ॒विष्कृ॑णुष्व रू॒पाणि॒ मात्मान॒मप॑ गूहथाः ।
अथो॑ सहस्रचक्षो॒ त्वं प्रति॑ पश्याः किमी॒दिनः॑ ॥५॥

Avishkrinushva rupani matmanamapa guhathah
Atho sahasrachaksho tvam prati pashyah kimidinah

द॒र्शय॑ मा यातु॒धाना॑न् द॒र्शय॑ यातुधा॒न्यः ।
पि॒शा॒चान्त्सर्वा॑न् दर्श॒येति॒ त्वा र॑भ ओषधे ॥६॥

Darshaya ma yatudhanan darshaya yatudhanyah
Pishachantsarvan darshayeti tva rabha oshadhe

क॒श्यप॑स्य॒ चक्षु॑रसि शु॒न्याश्च॑ चतुर॒क्ष्याः ।
वी॒ध्रे सूर्य॑मिव॒ सर्प॑न्तं॒ मा पि॑शा॒चं ति॒र॒स्क॑रः ॥७॥

Kashyapasya chakshurasi shunyashcha chaturakshyah
Vidhre suryamiva sarpantam ma pishacham tiraskarah

उद॑ग्रभं परि॒पाणा॑द् यातु॒धानं॑ किमी॒दिन॑म्।
तेना॒हं सर्वं॑ पश्याम्यु॒त शू॒द्रमु॒तार्य॑म् ॥८॥

Udagrabham paripanad yatudhanam kimidinam
Tenaham sarvam pashyamyuta shudramutaryam

यो अ॒न्तरि॑क्षेण॒ पत॑ति॒ दिवं॒ यश्चा॑ति॒सर्प॑ति ।
भूमिं॒ यो मन्य॑ते ना॒थं तं पि॑शा॒चं॑ प्र द॑र्शय ॥९॥

Yo antarikshena patati divam yashchatisarpati
Bhumim yo manyate natham tam pishacham pra darshaya