Sukta 21

21.1

Gavah, 1-7 brahma, gavah, trishtup, 2-4 jagati

आ गावो॑ अग्मन्नु॒त भ॒द्रम॑क्र॒न्त्सीद॑न्तु गो॒ष्ठे र॒णय॑न्त्व॒स्मे।
प्र॒जाव॑तीः पुरु॒रूपा॑ इ॒ह स्यु॒रिन्द्रा॑य पू॒र्वीरु॒षसो॒ दुहा॑नाः ॥१॥

A gavo agmannuta bhadramakrantsidantu goshthe ranayantvasme
Prajavatih pururupa iha syurindraya purvirushaso duhanah

21.2

इन्द्रो॒ यज्व॑ने गृण॒ते च॒ शिक्ष॑त॒ उपेद् द॑दाति॒ न स्वं मु॑षायति ।
भूयो॑भूयो र॒यिमिद॑स्य व॒र्धय॑न्नभि॒न्ने खि॒ल्ये नि द॑धाति देव॒युम् ॥२॥

Indro yajvane grinate cha shikshata uped dadati na svam mushayati
Bhuyobhuyo rayimidasya vardhayannabhinne khilye ni dadhati devayum

21.3

न ता न॑शन्ति॒ न द॑भाति॒ तस्क॑रो॒ नासा॑मामि॒त्रो व्य॒थिरा द॑धर्षति ।
दे॒वांश्च याभि॒र्यज॑ते॒ ददा॑ति च॒ ज्योगित् ताभिः॑ सचते॒ गोप॑तिः स॒ह ॥३॥

Na ta nashanti na dabhati taskaro nasamamitro vyathira dadharshati
Devanshcha yabhiryajate dadati cha jyogit tabhih sachate gopatih saha

21.4

न ता अर्वा॑ रे॒णुक॑काटोऽश्नुते॒ न सं॑स्कृत॒त्रमुप॑ यन्ति॒ ता अ॒भि।
उ॒रु॒गा॒यमभ॑यं॒ तस्य॒ ता अनु॒ गावो॒ मर्त॑स्य॒ वि च॑रन्ति॒ यज्व॑नः ॥४॥

Na ta arva renukakatoshnute na sanskritatramupa yanti ta abhi
Urugayamabhayam tasya ta anu gavo martasya vi charanti yajvanah

21.5

गावो॒ भगो॒ गाव॒ इन्द्रो॑ म इच्छा॒द् गावः॒ सोम॑स्य प्रथ॒मस्य॑ भ॒क्षः ।
इ॒मा या गावः॒ स ज॑नास॒ इन्द्र॑ इ॒च्छामि॑ हृ॒दा मन॑सा चि॒दिन्द्र॑म् ॥५॥

Gavo bhago gava indro ma ichchhad gavah somasya prathamasya bhakshah
Ima ya gavah sa janasa indra ichchhami hrida manasa chidindram

21.6

यू॒यं गा॑वो मेदयथ कृ॒शं चि॑दश्री॒रं चि॑त् कृणुथा सु॒प्रती॑कम्।
भ॒द्रं गृ॒हं कृ॑णुथ भद्रवाचो बृ॒हद् वो॒ वय॑ उच्यते स॒भासु॑ ॥६॥

Yuyam gavo medayatha krisham chidashriram chit krinutha supratikam
Bhadram griham krinutha bhadravacho brihad vo vaya uchyate sabhasu

21.7

प्र॒जाव॑तीः सू॒यव॑से रु॒शन्तीः॑ शु॒द्धा अ॒पः सु॑प्रपा॒णे पिब॑न्तीः ।
मा व॑ स्ते॒न ई॑शत॒ माघशं॑सः॒ परि॑ वो रु॒द्रस्य॑ हे॒तिर्वृ॑णक्तु ॥७॥

Prajavatih suyavase rushantih shuddha apah suprapane pibantih
Ma va stena ishata maghashansah pari vo rudrasya hetirvrinaktu