সূক্ত 20

20.1

পিশাচক্ষয়ণম্। ১-৯ মাতৃনামা। মাতৃনামা। অনুষ্টুপ্, ১ স্বরাট্, ৯ ভুরিক্।

আ পশ্যতি প্রতি পশ্যতি পরা পশ্যতি পশ্যতি ।
দিবমন্তরিক্ষমাদ্ ভূমিং সর্বং তদ্ দেবি পশ্যতি ॥১॥

তিস্রো দিবস্তিস্রঃ পৃথিবীঃ ষট্ চেমাঃ প্রদিশঃ পৃথক্।
ত্বয়াহং সর্বা ভূতানি পশ্যানি দেব্যোষধে ॥২॥

দিব্যস্য সুপর্ণস্য তস্য হাসি কনীনিকা ।
সা ভূমিমা রুরোহিথ বহ্যং শ্রান্তা বধূরিব ॥৩॥

তাং মে সহস্রাক্ষো দেবো দক্ষিণে হস্ত আ দধৎ।
তয়াহং সর্বং পশ্যামি যশ্চ শূদ্র উতার্যঃ ॥৪॥

আবিষ্কৃণুষ্ব রূপাণি মাত্মানমপ গূহথাঃ ।
অথো সহস্রচক্ষো ত্বং প্রতি পশ্যাঃ কিমীদিনঃ ॥৫॥

দর্শয় মা যাতুধানান্ দর্শয় যাতুধান্যঃ ।
পিশাচান্ত্সর্বান্ দর্শয়েতি ত্বা রভ ওষধে ॥৬॥

কশ্যপস্য চক্ষুরসি শুন্যাশ্চ চতুরক্ষ্যাঃ ।
বীধ্রে সূর্যমিব সর্পন্তং মা পিশাচং তিরস্করঃ ॥৭॥

উদগ্রভং পরিপাণাদ্ যাতুধানং কিমীদিনম্।
তেনাহং সর্বং পশ্যাম্যুত শূদ্রমুতার্যম্ ॥৮॥

যো অন্তরিক্ষেণ পততি দিবং যশ্চাতিসর্পতি ।
ভূমিং যো মন্যতে নাথং তং পিশাচং প্র দর্শয় ॥৯॥