সূক্ত 20

20.1

রয়িসংবর্ধনম্। ১-১০ বসিষ্ঠঃ। ১-২ অগ্নিঃচ ৩ অর্যমা, ভগঃ, বৃহস্পতিঃ, দেবীঃ, ৪ সোমঃ, অগ্নিঃ, আদিত্যঃ, বিষ্ণুঃ, ব্রহ্মা, বৃহস্পতিঃ, ৫ অগ্নিঃ, ৬ ইন্দ্রবায়ূ, ৭ অর্যমা, বৃহস্পতিঃ, ইন্দ্রঃ, বাতঃ, বিষ্ণুঃ, সরস্বতী, সবিতা, বাজী, ৮ বিশ্বা ভুবনানি, ৯ পঞ্চ প্রদিশঃ, ১০ বায়ুস্ত্বষ্টা। অনুষ্টুপ্, ৬ পথ্যাপঙ্ক্তিঃ, ৮ বিরাড্ জগতী।

অয়ং তে যোনিরৃত্বিয়ো যতো জাতো অরোচথাঃ ।
তং জানন্নগ্ন আ রোহাধা নো বর্ধয় রয়িম্ ॥১॥

20.2

অগ্নে অচ্ছা বদেহ নঃ প্রত্যঙ্ নঃ সুমনা ভব ।
প্র ণো যচ্ছ বিশাং পতে ধনদা অসি নস্ত্বম্ ॥২॥

20.3

প্র ণো যচ্ছত্বর্যমা প্র ভগঃ প্র বৃহস্পতিঃ ।
প্র দেবীঃ প্রোত সূনৃতা রয়িং দেবী দধাতু মে ॥৩॥

20.4

সোমং রাজানমবসেঽগ্নিং গীর্ভির্হবামহে ।
আদিত্যং বিষ্ণুং সূর্যং ব্রহ্মাণং চ বৃহস্পতিম্ ॥৪॥

20.5

ত্বং নো অগ্নে অগ্নিভির্ব্রহ্ম যজ্ঞং চ বর্ধয় ।
ত্বং নো দেব দাতবে রয়িং দানায় চোদয় ॥৫॥

20.6

ইন্দ্রবায়ূ উভাবিহ সুহবেহ হবামহে ।
যথা নঃ সর্ব ইজ্জনঃ সংগত্যাং সুমনা অসদ্ দানকামশ্চ নো ভুবৎ ॥৬॥

20.7

অর্যমণং বৃহস্পতিমিন্দ্রং দানায় চোদয় ।
বাতং বিষ্ণুং সরস্বতীং সবিতারং চ বাজিনম্ ॥৭॥

20.8

বাজস্য নু প্রসবে সং বভূবিমেমা চ বিশ্বা ভুবনান্যন্তঃ ।
উতাদিত্সন্তং দাপয়তু প্রজানন্ রয়িং চ নঃ সর্ববীরং নি যছ ॥৮॥

20.9

দুহ্রাং মে পঞ্চ প্রদিশো দুহ্রামুর্বীর্যথাবলম্।
প্রাপেয়ং সর্বা আকূতীর্মনসা হৃদয়েন চ ॥৯॥

20.10

গোসনিং বাচমুদেয়ং বর্চসা মাভ্যুদিহি ।
আ রুন্ধাং সর্বতো বায়ুস্ত্বষ্টা পোষং দধাতু মে ॥১০॥